ជាតិ
CNRP គ្រោងកោះហៅលោក ទៀ បាញ់,លោក វេង សាខុន និងលោក អ៊ិត សំហេង ចូលបំភ្លឺ ពីឆ្វេងទៅស្តាំ៖ លោក ទៀ បាញ់ លោក វេង សាខុន និងលោក អ៊ិត សំហេង
× ភ្នំពេញ៖ គណបក្សសង្គ្រោះជាតិ នឹងដាក់លិខិតជូនប្រធានសភាឲ្យកោះហៅរដ្ឋមន្ត្រី៣រូប ចូលបំភ្លឺផ្ទាល់មាត់លើបញ្ហាការងារមួយចំនួន ក្នុងវិមានរដ្ឋសភា នាពេលខាងមុខនេះ។ លោក សុន ឆ័យ បានឲ្យដឹងថា គណៈកម្មការអចិន្ត្រៃយ៍គណបក្សបានឯកភាពគ្នារួចរាល់ហើយថា នឹងដាក់លិខិតកោះហៅរដ្ឋមន្ត្រី៣រូប ក្នុងនោះ រួមមាន លោក ទៀ បាញ់ រដ្ឋមន្ត្រីក្រសួងការពារជាតិ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
អ្នកតំណាងរាស្ត្រមកពីគណបក្សប្រឆាំងរូបនេះ បានបន្តថ្លែងក្នុងសន្និសីទកាសែត នាទីស្នាក់ការកណ្តាល CNRP ថា ពួកគេត្រៀមដាក់សំណួរមួយចំនួនសួរលោក ទៀ បាញ់ រដ្ឋមន្ត្រីក្រសួងការពារជាតិ ទាក់ទងនឹងតួនាទីរបស់កងទ័ពបម្រើជាតិ និងពលរដ្ឋ, នីតិវិធីដំឡើងយសសក្តិកងទ័ពទាំងចាស់ និងក្មេង និងការចំណាយថវិកាទិញសម្ភារៈយោធា ជាដើម។
ដោយឡែកសំណួរសួរលោក វេង សាខុន រដ្ឋមន្ត្រីកសិកម្មវិញ លោក សុន ឆ័យ និយាយថា អ្នកតំណាងរាស្ត្រនឹងដាក់សំណួរដែលជាបញ្ហាប្រឈមរបស់កសិករមួយចំនួន ដូចជា ការដោះស្រាយបញ្ហាជំពាក់លុយធនាគារធ្វើកសិកម្ម, ការរកទីផ្សារលក់ផលិតផល, ការចំណាយទិញជី ប្រេង ថ្នាំគីមីថ្លៃលើសទីផ្សារ, ការធ្វើកសិកម្មគ្មានបច្ចេកទេសត្រឹមត្រូវ និងការគ្រប់គ្រងប្រព័ន្ធធារាសាស្ត្រទាំងរដូវប្រាំង និងវស្សា ទូទាំងប្រទេស។
ដូចគ្នាដែរ ចំពោះការសួរលោក អ៊ិត សំហេងវិញ លោក សុន ឆ័យ បង្ហើបឲ្យដឹងទៀតថា លោក អ៊ិត សំហេង ត្រូវឆ្លើយបំភ្លឺការងាររបស់ក្រសួងការងារចំនួនពាក់ព័ន្ធនឹងការបញ្ជូនពលករក្រៅប្រទេស ពិសេសេ ថៃ និងកូរ៉េខាងត្បូង, ការងារធានាសុវត្ថិភាពលករ ការបណ្តុះបណ្តាលជំនាញដល់កម្មករ និងការជួយសម្រួលលិខិតស្នាមការងាររដ្ឋបាលពលរកនៅបរទេស ជាដើម។ លោកបញ្ជាក់ថា៖«គណបក្សសង្គ្រោះជាតិចង់ឲ្យរដ្ឋមន្ត្រីមក គឺមិនមែនមកស្តីឲ្យ មកបន្ទោសទេ។ យើងចង់ឲ្យមកបំភ្លឺប្រាប់ប្រជាជាតិអំពីសកម្មភាពការងារទាំងនេះ»។
បើតាមលោក សុន ឆ័យ លិខិតកោះអញ្ជើញរដ្ឋមន្ត្រីទាំងបីរូបនេះ នឹងត្រូវដាក់បញ្ជូនទៅប្រធានរដ្ឋសភានៅដើមខែកុម្ភៈ។ លោក សុន ឆ័យ បញ្ជាក់ថា ក្រុមការងារគណបក្សសង្គ្រោះជាតិ អាចចុះពិនិត្យតាមមូលដ្ឋានផងដែរ ដើម្បីប្រមូលបញ្ហាពលរដ្ឋរាយការណ៍ជូនរដ្ឋាភិបាលដោះស្រាយទៀតផង៕
Tag:
យឹម សុវណ្ណ
សុន ឆ័យ
ទៀ បាញ់
អ៊ិត សំហេង
វេង សាខុន
© រក្សាសិទ្ធិដោយ thmeythmey.com