អន្តរជាតិ
នយោបាយអន្តរជាតិ
ត្រាំ ជាប្រធានាធិបតីដំបូង ដែលមិនចូលរួមកម្មវិធីជួបជុំអ្នកកាសែតក្នុងរយៈពេល៣៦ឆ្នាំចុងក្រោយ
× ប្រធានាធិបតីអាមេរិក ដូណាល់ ត្រាំ បានប្រកាសថា លោកមិនចូលរួមកម្មវិធីបរិភោគអាហារល្ងាចជាមួយក្រុមអ្នកសារព័ត៌មានប្រចាំសេតវិមានដែលគេធ្លាប់ធ្វើរាប់ទសវត្សន៍មកហើយនោះឡើយ។ លោកក្លាយជាប្រធានាធិបតីដំបូងគេដែលធ្វើបែបនេះក្នុងរយៈពេល ៣៦ឆ្នាំចុងក្រោយនេះ ពោលគឺបន្ទាប់ពីប្រធានាធិបតី Ronald Reagan។
ប្រធានាធិបតីអាមេរិក តែងតែចូលរួមជួបអ្នកសារព័ត៌មានប្រចាំឆ្នាំ (White House Correspondents' Association Dinner) ដើម្បីទទួលបរិភោគអាហារពេលល្ងាចជុំគ្នាចាប់ពីឆ្នាំ ១៩២១មក។ ហើយក្នុងកម្មវិធីនេះ ប្រធានាធិបតីអាមេរិកបង្ហាញការគោរពនិងកោតសរសើរចំពោះអ្នកសារព័ត៌មានដោយផ្តល់ការលើកទឹកចិត្តជារង្វាន់និងអាហារូបករណ៍ជាដើម។
ប៉ុន្តែឆ្នាំនេះខុសពីសព្វមួយដង ប្រធានាធិបតីអាមេរិកថ្មីលោក ដូណាល់ ត្រាំ នឹងមិនចូលរួមក្នុងកម្មវិធីប្រពៃណីដែលនឹងត្រូវរៀបចំឡើងនៅចុងខែមេសាខាងមុខឡើយ។ លោកបានប្រកាសបែបនេះតាមប្រព័ន្ធទំនាក់ទំនង Twitter របស់ខ្លួន នាល្ងាចថ្ងៃសៅរ៍ទី ២៥ កុម្ភៈនេះ។
លោកបានបញ្ជាក់ដូច្នេះ៖« ខ្ញុំនឹងមិនចូលរួមក្នុងកម្មវិធីជួបជុំអ្នកកាសែតប្រចាំសេតវិមានឡើយនាឆ្នាំនេះ។ សូមជូនពរអ្នកទាំងអស់គ្នា និងសូមមានពេលវេលាដ៏ល្អមួយល្ងាចនេះ»។
យោងតាមសារព័ត៌មាន NPR តាមពិតទៅដូណាល់ ត្រាំ មិនមែនជាប្រធានាធិបតីអាមេរិកដំបូងឡើយដែលមិនចូលរួមក្នុងកម្មវិធីជួបជុំអ្នកសារព័ត៌មានប្រចាំឆ្នាំនោះ។ ប្រធានាធិបតីចុងក្រោយគេដែលមិនចូលរួមក្នុងកម្មវិធីនេះដែរគឺ លោក Ronald Reagan នៅក្នុងឆ្នាំ ១៩៨១ ប៉ុន្តែលោកមានហេតុផលសមរម្យព្រោះលោកទើបជាសះស្បើយពីរបួសដោយសារគេលួចបាញ់ប្រហារប៉ងធ្វើឃាត។
មិនដូចលោក ដូណាល់ ត្រាំ ដែលស្អប់អ្នកសារព័ត៌មាន លោក Ronald Reagan បានទូរសព្ទទៅចូលរួមក្នុងកម្មវិធី និងបាននិយាយលេងសើចពីការលួចធ្វើឃាតលោកដែរ។ លោកបានបញ្ជាក់ដូច្នេះ៖ « ប្រសិនខ្ញុំអាចផ្តល់អនុសាសន៍ឲ្យអ្នកទាំងអស់គ្នា ខ្ញុំចង់ប្រាប់ថា ពេលអ្នកណាម្នាក់ប្រាប់ឲ្យយើងចូលឡានឲ្យលឿន ប្រញាប់ធ្វើតាមគេទៅ»។
ប្រធានាធិបតីអាមេរិកម្នាក់ទៀតដែលមិនបានចូលរួមកម្មវិធីជួបជុំអ្នកកាសែតនេះគឺ លោក Richard Nixon នៅក្នុងឆ្នាំ ១៩៧២។ លោកស្អប់អ្នកកាសែត ហើយលោកក៏បានហៅអ្នកសារព័ត៌មានជាសត្រូវដូចលោក ដូណាល់ ត្រាំដែរ។
កន្លងមក ប្រធានាធិបតីអាមេរិក ដូណាល់ ត្រាំ បានរិះគន់សារព័ត៌មានឥតមានសំចៃមាត់ និងចោទប្រកាន់ថាសារព័ត៌មានជាសត្រូវរបស់ប្រជាជនអាមេរិកថែមទៀតផង។ លោកហ៊ានចោទប្រកាន់សារព័ត៌មានធំៗមួយចំនួនដូចជា New York Times, CNN និងសារព័ត៌មានមួយចំនួនទៀតថា ជាក្រុមប្រឆាំង ដែលលោកចង់ធ្វើសង្គ្រាមជាមួយ៕
Tag:
ដូណាល់ ត្រាំ
Ronald Reagan
Richard Nixon
White House Correspondents\' Association Dinner
© រក្សាសិទ្ធិដោយ thmeythmey.com