ខេត្តព្រៃវែង រៀបចំព្រឹត្តិការណ៍ «សង្ក្រាន្តព្រៃវែង» រយៈពេល៥ថ្ងៃ នៅបាភ្នំ

ជាតិ

ខេត្តព្រៃវែង រៀបចំព្រឹត្តិការណ៍ «សង្ក្រាន្តព្រៃវែង» រយៈពេល៥ថ្ងៃ នៅបាភ្នំ

04, Apr 2017 , 8:39 pm

រូបភាព

ដោយ: ញឹក ស្រីល័ក្ខ (Nhek Sreyleak)

ព្រៃវែង៖ នៅថ្ងៃទី០៥ ដល់ ០៩ ខែមេសានេះ ក្នុងខេត្តព្រៃវែង នឹងមានការរៀបចំព្រឹត្តិការណ៍ «សង្ក្រាន្តព្រៃវែង» ជាលក្ខណៈទ្រង់ទ្រាយធំ នៅក្នុងស្រុកបាភ្នំ។ ព្រឹត្តិការណ៍នេះ រៀបចំឡើង ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ។ «សង្ក្រាន្តព្រៃវែង» រៀបចំដោយសហភាពសហព័ន្ធយុវជនកម្ពុជាខេត្តព្រៃវែង រួមទាំងអភិបាលខេត្តព្រៃវែង និងមន្ត្រីពាក់ព័ន្ធនានា។

ព្រឹត្តិការណ៍ «សង្ក្រាន្តព្រៃវែង» នឹងរៀបចំរយៈពេល ៥ថ្ងៃ ចាប់ពីថ្ងៃទី៥ ដល់ទី៩ ខែមេសា ឆ្នាំ២០១៧ខាងមុខនេះ នៅទីលានបាល់ទាត់ ទល់មុខសាលាបឋមសិក្សាហ៊ុនសែនឈើកាច់ ឃុំឈើកាច់ ស្រុកបាភ្នំ ខេត្តព្រៃវែង។ «សង្ក្រាន្តព្រៃវែង» ត្រូវបានរៀបចំដោយសហភាពសហព័ន្ធយុវជនកម្ពុជាខេត្តព្រៃវែង សហការជាមួយអភិបាលខេត្ត និងមន្ត្រីពាក់ព័ន្ធនានា។

លោក ខៀវ ភារិទ្ធ ប្រធានសហភាពសហព័ន្ធយុវជនកម្ពុជាខេត្តព្រៃវែង បានប្រាប់សារព័ត៌មានថ្មីៗ តាមទូរសព្ទថា ការរៀបចំព្រឹត្តិការណ៍ «សង្ក្រាន្តព្រៃវែង» នេះ គឺរៀបចំដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ និងដើម្បីថែរក្សាវប្បធម៌ មរតក ប្រពៃណីជាតិខ្មែរ។ ជាពិសេស «សង្ក្រាន្តព្រៃវែង» នឹងមានការលេងល្បែងប្រជាប្រិយខ្មែរ ការប្រឡងចម្រៀង ការប្រឡងស្រីស្អាតប្រុសស្អាត ពិធីសាសនា ការតាំងពិព័រណ៍ផលិតផល និងការប្រគំតន្ត្រីពីតារាចម្រៀងល្បីៗ រួមទាំងផ្ទាំងទស្សនីយភាពផ្សេងៗទៀត។ ទន្ទឹមនឹងនេះ ក៏មានកម្មវិធីដង្ហែផលិតផលប្រចាំស្រុកនីមួយៗ របស់ស្រុកទាំង១៣ នៃខេត្តព្រៃវែងផងដែរ។

លោក ខៀវ ភារិទ្ធ បានបន្ថែមថា ព្រឹត្តិការណ៍នេះ រៀបចំដើម្បីភាពសប្បាយរីករាយដល់ប្រជាជនដែលរស់នៅខេត្តព្រៃវែងទាំងអស់ ដែលសម្រាប់ពីការប្រមូលផលស្រែចំការ ឬការងារផ្សេងៗ មកចូលរួមកម្សាន្តជាមួយសង្ក្រាន្តព្រៃវែង។ ប្រធានសហភាពសហព័ន្ធយុវជនកម្ពុជាខេត្តព្រៃវែងរូបនេះ បានអះអាងថា ព្រឹត្តិការណ៍នេះ នឹងលើកស្ទួយដល់ជីវភាពប្រជាពលរដ្ឋ ដែលយកផលិតផលរបស់ខ្លួន មកដាក់បង្ហាញនឹងលក់ក្នុងព្រឹត្តិការណ៍នេះ។ ដោយឡែក យុវជននាខេត្តព្រៃវែង នឹងទទួលបានចំណងមិត្តភាព ការកសាងសមត្ថភាព តាមរយៈការបង្ហាញស្នាដៃ បង្ហាញម្ហូបអាហារ និងការសាមគ្គីគ្នាផងដែរ។

ព្រឹត្តិការណ៍ «សង្ក្រាន្តព្រៃវែង» នេះ មានការដឹកនាំលេងល្បែងប្រជាប្រិយ១៣ប្រភេទ និងការបង្ហាញនំប្រពៃណីទាំង១៣ របស់ស្រុកទាំង ១៣ នៃខេត្តព្រៃវែងផងដែរ។ ក្នុងព្រឹត្តិការណ៍នេះ លោក ខៀវ ភារិទ្ធ រំពឹងថា ព្រឹត្តិការណ៍នេះ នឹងមានប្រជាពលរដ្ឋចូលរួមមិនតិចជាង ២ម៉ឺននាក់នោះទេ ក្នុងមួយថ្ងៃៗ។

សូមបញ្ជាក់ថា កាលពីឆ្នាំមុន នាស្រុកកញ្ជ្រាច ខេត្តព្រៃវែង បានរៀបចំកម្មវិធី «សង្ក្រាន្តស្រុកខ្ញុំ» ដែលជាលក្ខណៈស្រុក ប៉ុន្តែឆ្នាំនេះ បានរៀបចំជាលក្ខណៈខេត្ត ដោយចូលរួមពីស្រុកទាំង១៣ នៃខេត្តព្រៃវែង។ ដោយឡែក កាលពីឆ្នាំមុន ព្រឹត្តិការណ៍ «សង្ក្រាន្តស្រុកខ្ញុំ» មានប្រជាពលរដ្ឋចូលរួមលេងកម្សាន្តប្រមាណ ១ម៉ឺន ទៅ២ម៉ឺននាក់៕

ព័ត៌មានទាក់ទងនឹងសង្ក្រាន្តខេត្តផ្សេងទៀត៖
-ខេត្តស្វាយរៀង