ជាតិ
អ្នកជាប់ឃុំ សុំឲ្យបក្សប្រឆាំង រក្សាឧត្តមគតិ និង បន្តរួបរួមគ្នា ដើម្បីយកឈ្នះការបោះឆ្នោត លោក ហូរ វ៉ាន់ តំណាងរាស្រ្តមណ្ឌលរាជធានីភ្នំពេញ បានផ្តល់បទសម្ភាសដល់ក្រុមអ្នកសារព័ត៌មាន ក្រោយចាកចេញពីសួរសុខទុក្ខ មន្ត្រីនិងសកម្មជនគណបក្សសង្គ្រោះជាតិ ដែលកំពុងជាប់ឃុំនៅពន្ធនាគារព្រៃស។
× ភ្នំពេញ៖ មន្ត្រី និង សកម្មជនគណបក្សសង្គ្រោះជាតិ ដែលកំពុងជាប់ពន្ធនាគារ អស់រយៈពេលជាច្រើនខែមកហើយនោះ មិនចង់ឲ្យថ្នាក់ដឹកនាំគណបក្សសង្គ្រោះជាតិ បែកបាក់សាមគ្គី ឡើយ។ ពួកគេ សង្ឃឹមថា បើមិនបែកបាក់ផ្ទៃក្នុង គណបក្សសង្គ្រោះជាតិ នឹងអាចទទួលបានជ័យជំនះក្នុងការបោះឆ្នោត។
លោក ហូរ វ៉ាន់ រួមទាំងតំណាងរាស្ត្រគណបក្សសង្គ្រោះជាតិមួយចំនួន បានទៅសួរសុខទុក្ខមន្ត្រីនិងសកម្មជន នៅពន្ធនាគារព្រៃស នាថ្ងៃទី១១ ខែមេសា ឆ្នាំ២០១៧នេះ។ ក្រោយចាកចេញពីសួរសុខទុក្ខរួចហើយ លោក ហូរ វ៉ាន់ បានប្រាប់ក្រុមអ្នកសារព័ត៌មានថា អ្នកជាប់ឃុំទាំងនោះ នៅតែមានទឹកចិត្តតស៊ូ និងរក្សាឧត្តមគតិចំពោះប្រទេសជាតិដដែល ទោះជាជួបការលំបាកក្នុងពន្ធនាគារ យ៉ាងណាក៏ដោយ។
បើតាមលោក ហូរ វ៉ាន់ អ្នកជាប់ឃុំទាំងនោះ នៅតែមានភាពជឿជាក់ទៅលើថ្នាក់ដឹកនាំបក្សប្រឆាំង ដោយឥតងាករេ ថ្វីបើមួយរយៈកាលចុងក្រោយនេះ បក្សប្រឆាំង ហាក់មានបញ្ហាជាបន្តបន្ទាប់ក៏ដោយ។ តាមរយៈលោក ហូរ វ៉ាន់ ដដែល អ្នកជាប់ឃុំខាងលើ បានអំពាវនាវដល់ប្រជាពលរដ្ឋ និងថ្នាក់ដឹកនាំបក្សប្រឆាំង ឲ្យបន្តការប្រឹងប្រែង និងការរួបរួមគ្នា ដើម្បីទទួលបានជ័យជំនះក្នុងការបោះឆ្នោត នាពេសខាងមុខ។
លោក ហូរ វ៉ាន់ បាននិយាយដូច្នេះថា៖«ពួកគាត់ (អ្នកជាប់ឃុំ) បានជម្រាបហើយ ថាពួកគាត់នៅតែគាំទ្រ (បក្សប្រឆាំង)។ ពួកគាត់ សូមឲ្យតែយើង ដែលនៅខាងក្រៅ (ពន្ធនាគារ) កុំឲ្យបាត់សេចក្តីក្លាហាន និងការតស៊ូ ដើម្បីប្រទេសជាតិរបស់យើង»។
សម្រាប់សារចុងក្រោយ ដែលនិយាយនៅចំពោះមុខក្រុមអ្នកសារព័ត៌មាន លោក ហូរ វ៉ាន់ បានអំពាវនាវសាជាថ្មី ឲ្យមានការដោះលែងអ្នកជាប់ឃុំទាំងនោះ ឲ្យបានឆាប់រហ័ស។ វា ជាជំហររបស់បក្សប្រឆាំងទៅហើយ ដែលលោក ហូរ វ៉ាន់ អះអាងថា អ្នកជាប់ឃុំទាំងនោះ គឺជាអ្នកទោសមនសិការ ដែលធ្វើកិច្ចការ ដើម្បីប្រយោជន៍របស់ប្រជាពលរដ្ឋ ដោយមិនបានប្រព្រឹត្តបទឧក្រិដ្ឋអ្វីឡើយ។
សូមបញ្ជាក់ថា អ្នកជាប់ឃុំទាំងនោះ មានលោក អ៊ុំ សំអាន តំណាងរាស្ត្រគណបក្សសង្គ្រោះជាតិ និងលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី។ ក្រៅពីនេះ លោក មាជ សុវណ្ណារ៉ា មន្ត្រីជាន់ខ្ពស់គណបក្សសង្គ្រោះជាតិ និងសកម្មជនជាង១០នាក់ទៀត ក៏កំពុងជាប់ឃុំ ផងដែរ៕
© រក្សាសិទ្ធិដោយ thmeythmey.com