នេះគឺជាពេលដែលលោក Jose Mourinho ខឹងសម្បារយ៉ាងខ្លាំងទៅនឹង Gareth Bale ដោយលើកឡើងថា ខ្សែប្រយុទ្ធសញ្ជាតិវេលស៍រូបនេះមិននិយាយរកខ្លួន និងព្រមទាំបញ្ចប់ការចង់បានរូបគេមកកាន់ទឹកដី Old Trafford ថែមទៀត។
នៅក្រោយការប្រកួតពាន International Champions Cup កាលពីថ្ងៃទី២៤ ខែកក្កដា រវាងក្រុម Manchester United និងក្រុម Real Madrid ក្នុងកីឡដ្ឋាន Levi's ទីក្រុង Santa Clara សហរដ្ឋអាមេរិក ទូរទស្សន៍អេស្ប៉ាញបានបញ្ជាក់ពីសម្តីរបស់ Mourinho ថាមិនអាចទិញ Bale ទេ ព្រោះគេមិននិយាយចូលខ្ញុំ។
កន្លងទៅអ្នកចាត់ការសញ្ជាតិព័រទុយហ្គាល់ បានបង្ហាញការចាប់អារម្មណ៍ខ្លាំងដោយចង់បានខ្សែប្រយុទ្ធវ័យ២៨ឆ្នាំរូបនេះមកចូលរួមជាមួយ Manchester United នៅរដូវកាលថ្មីខាងមុខនេះ។ ប៉ុន្តែក្រោយមកក៏បានប្រកាសបញ្ចប់ការចង់បានអតីតសមាជិកក្រុម Spurs នេះវិញ។
នៅមុនពេលការប្រកួតចាប់ផ្តើម អ្នកចាត់ការក្រុមបិសាចក្រហម វ័យ៥៤ឆ្នាំ បានឈររង់ចាំស្វាគមន៍កីឡាកររបស់ Real Madrid ជាច្រើននាក់ដែលលោកធ្លាប់ដឹកនាំកាលនៅកាន់តំណែងនៅទីនោះ។ តែនៅពេល Bale ដើរមកដល់ Mourinho បានចាប់ដៃ និងអោនខ្សិបដាក់ត្រចៀកថា៖«ខ្ញុំមិនអាចទិញអ្នកបានទេ ព្រោះអ្នកមិននិយាយរកខ្ញុំ»៕