អន្តរជាតិ
ម៉ាឡេស៊ីត្រៀមខ្លួនជួយដោះស្រាយជម្លោះរដ្ឋឈូងសមុទ្រ ប្រសិនជាកាតាស្នើសុំ
× ម៉ាឡេស៊ីជឿថាសម្ព័ន្ធភាពដែលខ្លួនមានជាមួយរដ្ឋឈូងសមុទ្រជាប់ពាក់ព័ន្ធនៅក្នុងជម្លោះអាចឲ្យម៉ាឡេស៊ីមានតួនាទីកាន់តែស៊ីជម្រៅក្នុងការដោះស្រាយជម្លោះឈូងសមុទ្រ។រដ្ឋមន្ត្រីក្រសួងការពារជាតិម៉ាឡេស៊ីក៏បាននិយាយដែរថា ម៉ាឡេស៊ីត្រៀមខ្លួនរួចជាស្រេចដើម្បីដើរតួនាទីជាអាជ្ញាកណ្ដាលដោះស្រាយជម្លោះនេះ ប្រសិនមានការស្នើសុំ។
រដ្ឋមន្ត្រីក្រសួងការពារជាតិម៉ាឡេស៊ីលោក Hishammuddin Hussein សប្តាហ៍នេះបានថ្លែងនៅក្នុងសភាថា ម៉ាឡេស៊ីក៏អាចរួមចំណែកក្នុងការដោះស្រាយជម្លោះរវាងកាតានិងរដ្ឋឈូងសមុទ្រដែរ។
«យើងនឹងឃ្លាំមើលយ៉ាងតឹងរឹង សម្ព័ន្ធភាពដែលយើងមានជាមួយនឹងរដ្ឋឈូងសមុទ្រជាប់ពាក់ព័ន្ធក្នុងជម្លោះអាចឲ្យម៉ាឡេស៊ីមានតួនាទីយុទ្ធសាស្ដ្រ និងកាន់តែស៊ីជម្រៅក្នុងការដោះស្រាយបញ្ហាជម្លោះរដ្ឋឈូងសមុទ្រ»។ នេះជាការឆ្លើយតបរបស់លោករដ្ឋមន្ត្រីការពារជាតិម៉ាឡេស៊ីទៅនឹងសំនួរបន្ថែមរបស់សមាជិកសភា Kota Tinggi លោកNoor Ehsanuddin Mohd Harun Narrashid ដែលសួរថាតើម៉ាឡេស៊ីត្រៀមខ្លួនហើយ ឬនៅ ប្រសិនជាកាតាស្នើសុំឲ្យធ្វើជាអាជ្ញាកណ្ដាលក្នុងជម្លោះរដ្ឋឈូងសមុទ្រ។
ទោះជាយ៉ាងនេះក្ដី ម៉ាឡេស៊ីយល់ថាតួនាទីជាអាជ្ញាកណ្ដាលដោះស្រាយជម្លោះរវាងកាតានិងបណ្ដារដ្ឋឈូងសមុទ្រនេះគួរតែផ្ដល់ទៅឲ្យកូវ៉ែតជាអ្នកដើរតួជាមុនសិន។យ៉ាងណាមិញ នេះក៍ជាជំហររបស់អង្គការសហប្រតិបត្តិការឥស្លាមដែលមានប្រទេសមូស្លីម៥៧ប្រទេសជាសមាជិក។
សូមបញ្ជាក់ថា កាតាប្រឈមមុខបញ្ហាខ្លាំង ដោយសារបណ្តាប្រទេសអារ៉ាប់ជិតខាង ហ៊ុមព័ទ្ធសេដ្ឋកិច្ច កាត់ផ្តាច់អស់រាល់ទំនាក់ទំនងផ្លូវទឹក ផ្លូវគោក និងផ្លូវអាកាស ក្រោយកាត់ចំណងការទូត ដោយចោទថា កាតាជារដ្ឋគាំទ្រភេរវកម្មនៅថ្ងៃ ទី ៥ខែមិថុនាកន្លងទៅ។ មកដល់ពេលបច្ចុប្បន្នជម្លោះមិនមានថមថយកម្តៅឡើយ ថ្វីបើមានប្រទេសឯទៀតជួយសម្រុះសម្រួលក៏ដោយ។ រដ្ឋអារ៉ាប់បក្សពួកអារ៉ាប៊ីសាអូឌីតបន្តទាមទារឲ្យកាតាធ្វើតាមចំណុចដែលខ្លួនទាមទារ ខណៈដែលកាតាចោទវិញថា ក្រុមរដ្ឋអារ៉ាប់ទាំងនោះបំពានច្បាប់អន្តរជាតិដាក់គំនាបលើខ្លួនជាដើម៕
© រក្សាសិទ្ធិដោយ thmeythmey.com