អន្តរជាតិ
រុស្ស៊ី៖« កូរ៉េខាងជើងត្រូវការពេលវែងទៀត ទម្រាំអាចផលិតអាវុធនុយក្លេអ៊ែរបាន» រូបភាព៖ អនុរដ្ឋមន្ត្រីការបរទេសរុស្ស៊ីលោក Sergei Ryabkov (Sputnik)
× អ្នកការទូតរុស្ស៊ីបានលើកឡើងថា វានៅពេលវែងឆ្ងាយណាស់ ទម្រាំកូរ៉េខាងខាងជើងបំពាក់មីស៊ីលបាលីស្ទិកឆ្លងទ្វីបជាមួយក្បាលគ្រាប់នុយក្លេអ៊ែរបាន ហើយគេក៏មិនគួរបន្តនិយាយបំភ្លើសពីគ្រោះថ្នាក់ដែលបង្កឡើងដោយកូរ៉េខាងជើងដែរ។ ខណៈដែលកូរ៉េខាងជើងបន្តបាញ់សាកល្បងមីស៊ីលបាលីស្ទិកជាបន្តបន្ទាប់ និងគំរាមបាញ់កម្ទេចអាមេរិកផង។
អនុរដ្ឋមន្ត្រីការបរទេសរុស្ស៊ីលោក Sergey Ryabkov បានថ្លែងក្នុងបទសម្ភាសមួយជាមួយសារព័ត៌មាន ABC នៅសប្តាហ៍នេះថា កូរ៉េខាងជើងត្រូវការពេលយូរទៀតទម្រាំគេអាចផលិតនិងប្រើប្រាស់អាវុធនុយក្លេអ៊ែរបាន ហើយគេក៏មិនគួរណាបន្តព្យាយាមបំប៉ោងស្ថានការណ៍ និងបំភ្លើស ព័ត៌មានពាក់ព័ន្ធការគំរាមកំហែងរបស់កូរ៉េខាងជើងចំពោះពិភពលោកដែរ។
លោកបានបញ្ជាក់ដូច្នេះ៖« ខ្ញុំគិតថា វានៅសល់ច្រើនឆ្នាំទៀតទម្រាំយើងអាចឃើញកូរ៉េខាងជើងផលិតអាវុធនុយក្លេអ៊ែរបាន។ អ្វីដែលគេកំពុងបាញ់សាកល្បងនេះគឺជាឧបករណ៍កម្រិតទាបបំផុតមួយ ហើយអ្វីដែលសំខាន់វាមានភ្ជាប់ជាមួយខ្សែភ្លើងច្រើន ហើយត្រូវប្រើឧបករណ៍ផ្សេងទៀតជាច្រើននៅជុំវិញនោះ។ និយាយឲ្យស្រួលស្តាប់ទៅ កូរ៉េខាងជើងមិនទាន់អាចយកអាវុធទាំងនោះបំពាក់លើមីស៊ីលរបស់ខ្លួនបានឡើយ»។
បន្ថែមពីការលើកឡើងថា កូរ៉េខាងជើងនៅមិនមានលទ្ធភាពផលិតអាវុធនុយក្លែរ អនុរដ្ឋមន្ត្រីការបរទេសរូបនេះបានអះអាថា ខ្លួនក៏ចង់ឃើញឧបទ្វីបកូរ៉េគ្មានអាវុធនុយក្លេអ៊ែរដូចអាមេរិកដែរ។ ប៉ុន្តែរុស្ស៊ីចង់ឲ្យសហគមន៍អន្តរជាតិចាត់វិធានការដែលសមរម្យ សមស្រប និងមិនចាត់ទុកកូរ៉េខាងជើងទាំងមូលប្រៀបដូចជាបីសាចឡើយ។
«យើងកំពុងស្ថិតនៅក្នុងដំណាក់កាលពិភាក្សាគ្នាពាក់ព័ន្ធសេចក្តីព្រាងដំណោះស្រាយក្រុមប្រឹក្សាសន្តិសុខអង្គការសហប្រជាជាតិដែលនឹងមានបន្ថែមចំណាត់ជាដុំកំភួនផ្សេងទៀត ហើយយើងក៏ត្រៀមខ្លួនរួចរាល់ដែលដើម្បីចាត់វិធានការ។ប៉ុន្តែដំណោះស្រាយនេះគួរតែមិនភ្ជាប់វិធានការដែលហាមឃាត់សកម្មភាពខុសច្បាប់របស់កូរ៉េខាងជើងពាក់ព័ន្ធការផលិតអាវុធនិងអភិវឌ្ឍមីស៊ីលជាមួយដង្ហើមសេដ្ឋកិច្ចប្រទេសទាំងមូលឡើយ»។ លោក Sergey Ryabkov បានបញ្ជាក់យ៉ាងដូច្នេះ។
អ្នកការទូតជាន់ខ្ពស់រូបនេះជឿជាក់ថា អាមេរិក និងរុស្ស៊ីប្រហែលជាអាចរកដំណោះស្រាយបានសមស្របសម្រាប់ឆ្លើយតបនឹងបញ្ហានេះ។ ហើយលោកបានសង្កត់ធ្ងន់ផងដែរថា ពាក់ព័ន្ធបញ្ហាកើតឡើងឧបទ្វីបកូរ៉េ រុស្ស៊ីក៏បារម្ភខ្លាំងជាងគេដែរព្រោះកូរ៉េខាងជើងក៏ស្ថិតនៅកៀករុស្ស៊ីដែរ៕
Tag:
កូរ៉េខាងជើង
រុស្ស៊ី
Sergey Ryabkov
© រក្សាសិទ្ធិដោយ thmeythmey.com