វិបត្តិឧបទ្វីបកូរ៉េ៖ ត្រាំ ថាយោធាមិនមែនជាជម្រើសទីមួយ តែអាមេរិកត្រៀមរួចស្រេចហើយ

អន្តរជាតិ

វិបត្តិឧបទ្វីបកូរ៉េ៖ ត្រាំ ថាយោធាមិនមែនជាជម្រើសទីមួយ តែអាមេរិកត្រៀមរួចស្រេចហើយ

27, Sep 2017 , 12:12 pm

រូបភាព

ដោយ: តន ចាន់រិទ្ធារ៉ា

បន្ទាប់ពីប្រើប្រាស់សម្ដីព្រមានខ្លាំងៗដាក់កូរ៉េខាងជើងរួច ប្រធានាធិបតី ដូណាល់ ត្រាំ ហាក់បន្ថយសំឡេងគំរាមរបស់លោក និងប្រកាសដោះស្រាយបញ្ហារញ៉េរញ៉ៃនៃកម្មវិធីនុយក្លេអ៊ែរកូរ៉េខាងជើង ដែលលោកអះអាងថាបន្សល់ទុកដោយមេដឹកនាំអាមេរិកជំនាន់មុន។ សម្រាប់លោក ត្រាំ យោធាមិនមែនជាជម្រើសទីមួយក្នុងការដោះស្រាយបញ្ហានេះទេ តែលោកក៏ប្រាប់ឲ្យកូរ៉េខាងជើងកុំធ្វើទង្វើដែលបង្ខំឲ្យលោកជ្រើសរើសផ្លូវនេះឲ្យសោះ។

ប្រធានាធិបតីអាមេរិក ដូណាល់ ត្រាំ បានផ្ញើសារព្រមានជាថ្មីទៀតទៅកាន់របបដឹកនាំកូរ៉េខាងជើង ដែលទើបតែចោទអាមេរិកថាបានប្រកាសសង្គ្រាម។ លោក ត្រាំ បាននិយាយគំរាមថា អាមេរិកប្រុងប្រៀបរួចស្រេចហើយក្នុងការបើកប្រតិបត្តិការយោធាដែលអាចបង្កវិនាសកម្មឲ្យកូរ៉េខាងជើង បើស្ថានការណ៍ចាំបាច់មែន។ ប៉ុន្តែរដ្ឋបាលក្រុងវ៉ាស៊ីនតោននឹងប្រើប្រាស់មធ្យោបាយសន្តិភាពឲ្យអស់ចិត្ត ដើម្បីបញ្ចប់វិបត្តិនេះ។

ក្នុងសន្និសីទកាសែតជាមួយនាយករដ្ឋមន្ត្រីអេស្ប៉ាញនៅសួនច្បារសេតវិមាននៅថ្ងៃទី២៦ ខែកញ្ញា ប្រធានាធិបតីអាមេរិករូបនេះបញ្ជាក់ថា ជម្រើសយោធាមិនមែនជាដំណោះស្រាយអាទិភាពដំបូងទេ តែជាជម្រើសទីពីរ។ លោកបន្តថា អាមេរិកក៏បានត្រៀមអនុវត្តជម្រើសទីពីរនេះរួចស្រេចហើយដែរ ហើយបើពិតជាចៀសមិនផុតនោះ ចំណាត់ការយោធានេះនឹងក្លាយមហន្តរាយដ៏ធំសម្រាប់កូរ៉េខាងជើងតែម្ដង។

ទំនងដូចការលើកឡើងរបស់លោក ត្រាំ ដែលមិនទាន់ចង់ប្រើវិធានការយោធា ក្រុងវ៉ាស៊ីនតោនបានបន្តដាក់សម្ពាធសេដ្ឋកិច្ចកាន់តែខ្លាំងលើក្រុងព្យុងយ៉ាង។ ក្រសួងរតនាគារអាមេរិកទើបដាក់ទណ្ឌកម្មថ្មីលើធនាគារចំនួន៩ ដែលខ្លះរកស៊ីជាមួយចិន និងជនជាតិកូរ៉េខាងជើងច្រើននាក់ ដែលជាប់សង្ស័យថាជួយរកហិរញ្ញវត្ថុឲ្យរបបដឹកនាំក្រុងព្យុងយ៉ាងដើម្បីអភិវឌ្ឍកម្មវិធីនុយក្លអ៊ែរ។ ជនជាតិកូរ៉េខាងជើងដែលរងទណ្ឌកម្មលើកនេះមកពីលីប៊ី ចិន រុស្ស៊ី និងក្រុងឌូបៃជាដើម។

ការផ្លោងពាក្យសម្ដីគំរាមគ្នាទៅវិញទៅមករវាងអាមេរិក និងកូរ៉េខាងជើង បានធ្វើឲ្យអន្តរជាតិបារម្ភខ្លាំង ព្រោះការវាយតម្លៃស្ថានការណ៍ខុសអាចបង្កជាជម្លោះប្រដាប់អាវុធបាន។ ចិនដែលជាអ្នកជិតខាងរបស់កូរ៉េខាងជើង មិនសូវពេញចិត្តការបរិហារគ្នានេះឡើយ។ ក្រៅពីការស្នើឲ្យរក្សាការអត់ធ្មត់ខ្ពស់នោះ ក្រុងប៉េកាំង ក៏ព្រមានដែរថា សង្គ្រាមនៅឧបទ្វីបកូរ៉េ នឹងមិនមានអ្នកណាឈ្នះឡើយ និងបង្កតែវិនាសកម្មប៉ុណ្ណោះ។

ដោយឡែកទណ្ឌកម្មសេដ្ឋកិច្ច និងសម្ពាធការទូត ដែលរដ្ឋបាលលោក ត្រាំ ចាត់ទុកជាជម្រើសទីមួយក្នុងការដោះស្រាយបញ្ហានេះ នៅតែផ្ដល់លទ្ធផលតិចតួស្ដួចស្ដើងដដែល។ កូរ៉េខាងជើងហាក់មិនខ្វល់ទណ្ឌកម្មអ្វីទេ ហើយរឹតតែប្រឹងប្រែងបង្កើនល្បឿនផែនការអភិវឌ្ឍនុយក្លេអ៊ែរ និងមីស៊ីលដដែល។ ខណៈដែលចិន និងរុស្ស៊ី គ្មានជំហរប្រើប្រាស់យោធានោះ អាមេរិកក៏អាចត្រឹមតែប្រើប្រាស់ជម្រើសទីមួយរបស់ខ្លួនក្នុងការបង្ខំឲ្យកូរ៉េខាងជើងបញ្ឈប់មហិច្ឆតារបស់ខ្លួន៕