អន្តរជាតិ
តុលាការថៃកាត់ទោសលោកស្រី យីងឡាក់ ជាប់គុក៥ឆ្នាំលើករណីធ្វេសប្រហែសការងារ
× តុលាការកំពូលថៃបានកាត់ទោសអតីតនាយករដ្ឋមន្ត្រី យីងឡាក់ ស៊ីណាវ៉ាត់ ឲ្យជាប់ពន្ធនាគារ៥ឆ្នាំលើសំណុំរឿងធ្វេសប្រហែសក្នុងការដឹកនាំដែលធ្វើឲ្យរដ្ឋខាតបង់ទឹកប្រាក់រាប់លានដុល្លារជុំវិញកម្មវិធីទិញអង្ករតម្លៃថោក។ សវនាការថ្ងៃទី២៧ ខែកញ្ញា ធ្វើឡើងដោយមិនមានវត្តមានលោកស្រី យីងឡាក់ ឡើយ ដ្បិតលោកស្រីគេចខ្លួនទៅបរទេសតាំងពីខែមុនមកម្ល៉េះ។ របបសឹកថៃក៏កំពុងស្វះស្វែងរកកន្លែងលាក់ខ្លួនរបស់លោកស្រី យីងឡាក់ ផងដែរ។
តុលាការថៃបានប្រកាសសាលដីកាប្រឆាំងអតីតនាយករដ្ឋមន្ត្រី យីងឡាក់ ស៊ីណាវ៉ាត់ ដោយបានរកឃើញថាលោកស្រី យីងឡាក់ ពិតជាមានកំហុសក្នុងការអនុវត្តកម្មវិធីទិញអង្ករតម្លៃថ្លៃ ដែលពោរពេញដោយអំពើពុករលួយ និងភាពមិនប្រក្រតីជាច្រើន។ ខុសពីការរំពឹងទុក តុលាការបានកាត់ទោសអតីតនាយករដ្ឋមន្ត្រីរូបនេះត្រឹមការជាប់ពន្ធនាគារ៥ឆ្នាំប៉ុណ្ណោះ ខណៈអតីតមន្ត្រីលោកស្រីពីរនាក់ជាប់ពន្ធនាគារចាប់លើស៣០ឆ្នាំឯណោះ។
បើតាមសារព័ត៌មាន The Nation អ្នកគាំទ្រអតីតនាយករដ្ឋមន្ត្រីរូបនេះជាច្រើនបានប្រមូលផ្ដុំគ្នាខាងមុខតុលាការដើម្បីបង្ហាញការគាំទ្ររបស់ខ្លួន ទោះជាដឹងថាលោកស្រី យីងឡាក់ មិនមានវត្តមានក្នុងប្រទេសក្ដី។ មេធាវីលោកស្រី គឺលោក Norrawit Larlaeng បាននិយាយមុនការប្រកាសសាលដីកាថា លោកក៏មិនដឹងពីកន្លែងរស់នៅរបស់កូនក្ដីលោកដែរ ព្រោះបានបាត់ដំណឹងសូន្យឈឹងតាំងពីខែសីហាមកម្ល៉េះ។
ដោយឡែក នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី២៦ ខែកញ្ញា បានបង្ហើបថា លោកបានដឹងពីកន្លែងលាក់ខ្លួនរបស់លោកស្រី យីងឡាក់ ហើយ ប៉ុន្តែលោករង់ចាំដល់ពេលតុលាការប្រកាសសាលដីកាសិនទើបលោកបញ្ចេញព័ត៌មាននេះ។ ជាមួយគ្នានេះដែរ លោកឧត្តមសេនីយ៍ ប្រាយុទ្ធ ក៏នឹងសម្រេចចិត្តថានឹងលុបចោលលិខិតឆ្លងដែនរបស់លោកស្រី យីងឡាក់ ឬអត់ នៅក្រោយការប្រកាសរបស់តុលាការកំពូលដូចគ្នាដែរ។
សវនាការកំបាំងមុខរយៈពេលជិតបួនម៉ោងថ្ងៃទី២៧ ខែកញ្ញា ធ្វើឡើងមួយខែក្រោយការពន្យារពេលសវនាការលើកទីមួយថ្ងៃទី២៥ ខែសីហា។ លោកស្រី យីងឡាក់ បានរត់គេចខ្លួនមុនការប្រកាសសាលដីកា ដែលធ្វើឲ្យតុលាការសម្រេចចិត្តផ្អាកសវនាការ និងចេញសាលដីកាចាប់ខ្លួនអតីតនាយករដ្ឋមន្ត្រីស្ត្រីរូបនេះដែរ។ ចាប់ពីពេលនោះ របបយោធាក៏ចាប់ផ្ដើមប្រតិបត្តិការរុករកលោកស្រី ដែលគេជឿថា រត់ទៅជួបបងប្រុស ថាក់ស៊ីន ស៊ីណាវ៉ាត់ នៅទីក្រុងឌូបៃ។
អវត្តមានចំពោះមុខតុលាការនៅពេលនេះ ទំនងជាប៉ះពាល់ដល់សិទ្ធិជំទាស់សាលដីការបស់លោកស្រី។ យ៉ាងណាមិញ ក្រុមមេធាវីរបស់លោកស្រី ក៏មិនទាន់សម្រេចចិត្តបែបណាដែរ ហើយទំនងជាពិភាក្សាជាមួយកូនក្ដីរបស់ខ្លួនសិន៕
Tag:
ថៃ
យីងឡាក់ ស៊ីណាវ៉ាត់
© រក្សាសិទ្ធិដោយ thmeythmey.com