សេវាកម្មធ្វើឲ្យលិង្គស នៅថៃ ដែលមានអតិថិជនខ្មែរផងដែរនោះ រងការព្រមាន

សុខភាព

អន្តរជាតិ

សេវាកម្មធ្វើឲ្យលិង្គស នៅថៃ ដែលមានអតិថិជនខ្មែរផងដែរនោះ រងការព្រមាន

10, Jan 2018 , 10:19 pm

រូបភាព

ដោយ: ធីតា

ក្រសួងសុខាភិបាលថៃ បានព្រមានពីគ្រោះថ្នាក់ដែលអាចកើតឡើងចំពោះបុរសដែលទទួលសេវាកម្មដ៏ចម្លែកនៅមន្ទីរពេទ្យមួយក្នុងក្រុងបាងកក។ មិនមែនជាសេវាកម្មកែសម្ផស្សដើម្បីឲ្យស្បែក មុខ ឬធ្មេញសស្អាតនោះឡើយ តែជាសេវាកម្មសម្រាប់បុរសដែលចង់ឲ្យលិង្គរបស់ខ្លួនស។

នារយៈពេល៤ខែកន្លងមកនេះ មន្ទីរពេទ្យ Lelux ដែលស្ថិតនៅក្នុងទីក្រុងបាងកក បានបើកសេវាកម្មថ្មីបំផុតមួយសម្រាប់បុរសដែលចង់បានលិង្គពោរពេញទៅដោយការទាក់ទាញ។ លោក Popol Tansakul ប្រធានទីផ្សារនៃមន្ទីរពេទ្យ បានរៀបរាប់ប្រាប់ BBC ថា វាជាសេវាកម្មធ្វើឲ្យលិង្គស ដែលមានតម្លៃជាកញ្ចប់ចំនួន៦៥០ដុល្លារអាមេរិក សម្រាប់រយៈពេល៥ដង។

បើតាមការបញ្ជាក់របស់លោក Popol គ្លីនិករបស់លោកទទួលបានអតិថិជនចន្លោះពី២០ ទៅ៣០នាក់ក្នុងមួយខែ ដែលក្រៅពីជនជាតិថៃ ក៏មានអតិថិជនពីប្រទេសមីយ៉ាន់ម៉ា កម្ពុជា និងហុងកុងផងដែរ។ «អតិថិជនភាគច្រើន គឺបុរសដែលស្រឡាញ់ភេទដូចគ្នា ដោយពួកគាត់ចង់ឲ្យគ្រប់ផ្នែកនៃរាងកាយរបស់ខ្លួនស្រស់ស្អាតទាំងអស់»។ នេះជាការពន្យល់របស់លោក Popol។

បន្ទាប់ពីបានពិនិត្យឃើញការផ្សព្វផ្សាយសេវាកម្មនេះ តាមឃ្លីបវីដេអូមួយ រដ្ឋមន្ត្រីក្រសួងសុខាភិបាលថៃ បានចេញសារព្រមានពីគ្រោះថ្នាក់ដែលអាចកើតចំពោះអតិថិជន ដូចជាការឈឺចាប់ ការរលាក ឬស្លាកស្នាម រួមទាំងផលប៉ះពាល់លើប្រព័ន្ធបន្តពូជ និងការរួមភេទ។

លោកវេជ្ជបណ្ឌិត Thongchai Keeratihuttayakorn មន្ត្រីក្រសួងសុខាភិបាល បានព្រមានថា៖ «ការបាញ់ឡាស៊ែរដើម្បីឲ្យលិង្គស មិនមែនជារឿងចាំបាច់ដែលត្រូវធ្វើនោះឡើយ ដោយក្រៅពីចំណាយលុយអត់ប្រយោជន៍ វាថែមទាំងបង្កផលប៉ះពាល់អវិជ្ជមានជាងវិជ្ជមានទៀតផង»។

ទោះបីជាយ៉ាងណាក៏ដោយ អតិថិជនមួយចំនួនដែលបានទទួលសេវាកម្មនេះ បានរៀបរាប់ប្រាប់ BBC ទាំងរីករាយចំពោះអ្វីដែលពួកគេបានធ្វើ។ ពួកគេអះអាងថា ខ្លួនមានទំនុកចិត្ត និងរីករាយជាងមុន៕