ប្រធានអាស៊ានសិង្ហបុរី៖«យើងនឹងជួយដោះស្រាយបញ្ហាអាស៊ាន មិនមែនធ្វើឲ្យបញ្ហាកាន់តែអាក្រក់ឡើយ

អន្តរជាតិ

ប្រធានអាស៊ានសិង្ហបុរី៖«យើងនឹងជួយដោះស្រាយបញ្ហាអាស៊ាន មិនមែនធ្វើឲ្យបញ្ហាកាន់តែអាក្រក់ឡើយ

02, Feb 2018 , 9:19 pm

រូបភាព

ដោយ: ថ្មីៗ

រដ្ឋមន្ត្រីការបរទេសសិង្ហបុរីបានបញ្ជាក់នៅថ្ងៃព្រហស្បតិ៍ទី ១ ខែកុម្ភៈថា ក្នុងនាមជាប្រធានអាស៊ានប្តូរវេន សិង្ហបុរីនឹងព្យាយាមដើរតួនាទីជាអ្នកជួយសម្របសម្រួលដើម្បីដោះស្រាយបញ្ហាប្រឈម ហើយសិង្ហបុរីមិនព្យាយាមគេចពីបញ្ហា ហើយក៏មិនធ្វើឲ្យស្ថានការណ៍អាក្រក់ជាងមុនដែរ។

«យើងមិនមែនធ្វើឲ្យតែល្អមើលឡើយ ហើយយើងក៏មិនព្យាយាមគេចពីបញ្ហាប្រឈមដូចគ្នា។ យើងមិនត្រឹមតែលើកឡើង ឬបង្ហាញថាវាជាបញ្ហាឡើយ យើងក៏ព្យាយាមស្វែងរកដំណោះស្រាយដែរ»។ ប្រមុខការទូតសិង្ហបុរី វីវៀន បាឡាគ្រីស្នាន់ (Vivian Balakrisnan) ថ្លែងដូច្នេះ ក្នុងបទសម្ភាសជាមួយសារព័ត៌មាន Straits Times មុនកិច្ចប្រជុំចង្អៀតថ្នាក់រដ្ឋមន្ត្រីការបរទេសអាស៊ាន។

«បើទោះបីជាយើងមិនអាចរកដំណោះស្រាយបានពេញលេញក្តី យ៉ាងហោចណាស់យើងមិនធ្វើឲ្យវាអាក្រក់ជាងមុនដែរ។ យ៉ាងហោចណាស់ យើងព្យាយាមស្វែងរកជំហានដំបូងដែលអាចឲ្យយើងអាចធ្វើឲ្យស្ថានការប្រសើរឡើងដែរ»។ លោក បាឡាគ្រីស្នាន់ បន្ថែមដូច្នេះ។

សមុទ្រចិនខាងត្បូងនៅតែជាបញ្ហារសើបសម្រាប់អាស៊ាន ប៉ុន្តែលោក បាឡាគ្រីស្នាន់ កត់សម្គាល់ថា ស្ថានភាពជម្លោះបច្ចុប្បន្នស្ងប់ស្ងាត់ច្រើនហើយ ហើយភាគីនឹងចាប់ផ្តើមពិភាក្សាលើការបង្កើតក្រមប្រតិបត្តិសមុទ្រចិនខាងត្បូង (COC)ដែរ។

ប៉ុន្តែសម្រាប់លោក អាស៊ានមិនចាំបាច់កំណត់កាលបរិច្ឆេទចុងក្រោយសម្រាប់ការបង្កើតក្រមនេះឡើយ ព្រោះទំនាក់ទំនងរវាងអាស៊ាន និងចិនមានប្រយោជន៍ធំធេងណាស់ ហើយគេមិនគួរមើលទំនាក់ទំនងនេះតាមក្រសែរភ្នែកជម្លោះឡើយ។

ការពិភាក្សាបង្កើតក្រមប្រតិបត្តិនឹងត្រូវចាប់ផ្តើមពិភាក្សាជាផ្លូវការនៅឆ្នាំនេះ ក្រោយភាគីពាក់ព័ន្ធអាស៊ាន និងចិនបានឯកភាពគ្នាលើក្របខណ្ឌក្រមប្រតិបត្តិនេះហើយកាលពីឆ្នាំមុន។
ពាក់ព័ន្ធវិបត្តិជនភៀសខ្លួនរ៉ូហ៊ីងយ៉ា និងជម្លោះនៅរដ្ឋរ៉ាក់ឃីន (Rakhine) លោក បាឡាគ្រីស្នាន់ ក៏បានផ្តល់យោបល់ថា វាត្រូវការពេលវេលាយូរដើម្បីដោះស្រាយ ហើយការប្រើឧគ្ឃោសនសព្ទនយោបាយដើម្បីទិតៀនភាគីណាមួយនោះមិនមែនជាដំណោះស្រាយឡើយ។

ក្នុងកម្រិតយុទ្ធសាស្ត្រ ប្រមុខការទូតសិង្ហបុរីខាងអះអាងថា អាស៊ានប្រឈមបញ្ហាធំបួនក្នុងនោះមានការផ្លាស់ប្តូរតុល្យភាពអំណាច,បដិវត្តន៍បច្ចេកវិទ្យា, ពាណិជ្ជកម្មសេរី និង ការឯកភាពគ្នាក្នុងចំណោមសមាជិកអាស៊ាន។

បច្ចុប្បន្ន មហាអំណាចដូចជាអាមេរិក ឥណ្ឌា និងចិនជាដើមកំពុងប្រកួតប្រជែងគ្នាដើម្បីរកប្រយោជន៍ផ្ទាល់ខ្លួននៅក្នុងតំបន់ ហើយអាស៊ានស្ថិតនៅក្នុងក្រសែរភ្នែករបស់មហាអំណាចទាំងនោះដូចគ្នា។

លោក បាឡាគ្រីស្នាន់ ផ្តល់យោបល់ថា វាជារឿងចាំបាច់ដែលអាស៊ានត្រូវពង្រឹងឯកភាពគ្នាដោយឈរលើគោលការឯកច្ឆ័ន ដើម្បីដោះស្រាយបញ្ហា រួមទាំងគ្រប់គ្រងទំនាក់ទំនងជាមួយមហាអំណាចទាំងនោះដែរ។ ប៉ុន្តែលោកសង្កត់ធ្ងន់ថា ទោះក្នុងកាលៈទេសៈណាក៏ដោយ អាស៊ានមិនត្រូវបានគេបង្ខំឲ្យជ្រើសរើសយកភាគីណាមួយជាខ្នងបង្អែកឡើយ៕