កីឡាអន្តរជាតិ
អន្តរជាតិ
ការយកនារីស្លៀកប៊ីគីនីទៅទទួលកីឡាករ U23 វៀតណាម ទទួលរងនូវការរិះគន់
× នារីស្លៀកប៊ីគីនី ត្រូវបានបញ្ជូនឲ្យទៅទទួលក្រុមកីឡាករ U23 វៀតណាម ក្នុងដំណើរត្រឡប់ពីព្រឹត្តិការណ៍ AFC U23 Championship នៅប្រទេសចិន ដោយវៀតណាមទទួលបានលេខពីរជាប្រវត្តិសាស្ត្រ ក្រោយចាញ់អ៊ូបេគីស្ថាន ២-១ នៅវគ្គផ្តាច់ព្រ័ត្រ។
ក្នុងដំណើរឆ្ពោះទៅកាន់ក្រុងហាណូយ ក្រុមយុវជន U23 វៀតណាម ទទួលបាននូវការស្វាគមន៍អបអរសាទរតាំងពីក្នុងយន្តហោះ ដោយនារីមួយក្រុមស្លៀកប៊ីគីនី។ សកម្មភាពរបស់នារីទាំងនោះ ត្រូវបានថតដោយក្រុមអ្នកដំណើរផ្សេងទៀត បន្ទាប់មកមានការល្បីសុះសាយពេញបណ្តាញសង្គម។
តាមរយៈរូបភាព និងវីដេអូ ក្រុមកីឡាករដែលនៅវ័យក្មេងនៅឡើយ ហាក់ដូចជាមានការអៀនប្រៀននៅពេលដែលស្រីស្អាតៗ ស៊ិចស៊ី អង្គុយ និងលេងសើចជាមួយខ្លួន។ ចំណែកអ្នកដំណើរមួយចំនួន ក៏ហាក់ដូចឃ្នើសចិត្តផងដែរ។
យោងតាមការផ្សាយរបស់សារព័ត៌មាន Reuters លោកស្រី Nguyen Phoung Thao នាយិកាប្រតិបត្តិក្រុមហ៊ុនអាកាសចរណ៍ VietJet បានសុំទោសជាសាធារណៈ ដោយបានអះអាងថា វាជាការរៀបចំរបស់ក្រុមភ្នាក់ងារធ្វើដំណើរ មិនមែនជាផ្នែកមួយនៃទីផ្សាររបស់ក្រុមហ៊ុននោះឡើយ។ បន្ថែមពីលើនេះ ក្រុមហ៊ុនបានអះអាងពីការបណ្តេញបុគ្គលិកដែលពាក់ព័ន្ធចេញពីការងារផងដែរ។
ក្រុមយុវជនជម្រើសជាតិអាយុក្រោម២៣ឆ្នាំវៀតណាម បានបង្កើតកំណត់ត្រាក្នុងនាមជាក្រុមអាស៊ានទីមួយដែលឈានដល់វគ្គផ្តាច់ព្រ័ត្រ AFC U23 Championship ឆ្នាំ២០១៨ នៅប្រទេសចិន កាលពីចុងខែមករា កន្លងមកនេះ។ ប៉ុន្តែពួកគេបានខកឱកាសទទួលបានពាន ក្រោយចាញ់អ៊ូបេគីស្ថាន ២-១ នៅវគ្គផ្តាច់ព្រ័ត្រ៕
© រក្សាសិទ្ធិដោយ thmeythmey.com