ខ្សែការពារជប៉ុនរបស់ណាហ្គាវើល Kento ផ្ទេរទៅក្លិបចំណូលថ្មីសូលទីឡូអង្គរ

កីឡាអន្តរជាតិ

ជាតិ

ខ្សែការពារជប៉ុនរបស់ណាហ្គាវើល Kento ផ្ទេរទៅក្លិបចំណូលថ្មីសូលទីឡូអង្គរ

10, Feb 2018 , 3:05 pm

រូបភាព

ខ្សែការពារ Kento Fujihara កាន់ឯកសណ្ឋានថ្មីជាមួយថ្នាក់ដឹកនាំក្លិបសូលទីឡូអង្គរ, រូបភាពពីហ្វេសប៊ុកក្លិបសូលទីឡូអង្គរ

ដោយ:

ខ្សែការពារជនជាតិជប៉ុន Kento Fujihara របស់ក្លិបណាហ្គាវើល បានផ្ទេរទៅក្លិបចំណូលថ្មីនៃក្របខណ្ឌលីគកំពូលកម្ពុជាសូលទីឡូអង្គរ សម្រាប់រដូវកាលឆ្នាំ២០១៨។ Kento ជាកីឡាករជប៉ុនទី៣ បន្ទាប់ពី Unno Tomoyuki និង Yuta Kikuch ដែលសូលទីឡូអង្គរ បានចុះកិច្ចសន្យានាំចូលកាលពីពេលថ្មីៗកន្លងទៅ។

ក្រោយលេងឲ្យណាហ្គាវើលបានមួយរដូវកាលឆ្នាំ២០១៧ ខ្សែការពារជប៉ុន Kento Fujihara បានផ្លាស់ទៅរួមរស់ជាមួយក្លិបចំណូលថ្មី ទើបឡើងពីក្របខណ្ឌទី២សូលទីឡូអង្គរ សម្រាប់ក្របខណ្ឌលីគកំពូលរដូវកាលឆ្នាំ២០១៨។ មុនផ្ទេរមកកាន់សូលទីឡូអង្គរ ខ្សែការពារវ័យ២៦ឆ្នាំរូបនេះ ធ្លាប់លេងឲ្យក្លិបក្របខណ្ឌលីគកំពូលសិង្ហបុរី Albirex Nigata Singapore ពីឆ្នាំ២០១៤ ដល់ឆ្នាំ២០១៦។ ហើយរូបគេ ក៏ជាអតីតសមាជិកជម្រើសជាតិអាយុក្រោម១៩ឆ្នាំ របស់ជប៉ុនផងដែរ។

Kento ដែលមានស្រុកកំណើតនៅទីក្រុង Kanagawa ប្រទេសជប៉ុន ជាកីឡាករជនជាតិជប៉ុនទី៣របស់សូលទីឡូអង្គរ បន្ទាប់ពីខ្សែបម្រើ Unno Tomoyuki និង Yuta Kikuchi។ ខ្សែបម្រើវ័យ២៦ឆ្នាំ Tomo មានបទពិសោធន៍ យ៉ាងច្រើននៅលើទឹកដីថៃ។ រូបគេធ្លាប់លេងឲ្យក្លិបក្របខណ្ឌទី២ និង៤ថៃរួមមាន Yasothon FC, Thai Honda FC, Phangnga FC និង Phayao FC។

ចំណែកខ្សែបម្រើវ័យ២៤ឆ្នាំ Yuta Kikuchi ដែលបានចុះកិច្ចសន្យា រួមរស់ជាមួយសូលទីឡូអង្គរ កាលពីថ្ងៃទី១៧ ខែមករា ធ្លាប់លេងឲ្យក្លិបក្របខណ្ឌលីគកំពូល របស់ប្រទេសម៉ុងតេណេហ្គោ FK Jedinstvo។ ក្រៅពីកីឡាករជនជាតិជប៉ុនទាំង៣ខាងលើ ក្លិបចំណូលថ្មីមួយនេះបាននាំចូលកីឡាករកម្ពុជាជាច្រើនរូបផងដែរ រួមមានអ្នកចាំទី គង់ រ៉ាហ្វាត់ (អតីត U15, U16), កូរណៃ អាន់សារី, លី ភិរុន, ចាន់ វាសនា និង សេង កូសែន (សុទ្ធតែមកពីក្លិបវេស្ទើន), អ៊ាង លីហួរ, នាង ផានិត និង ឡុង បុរាណ ជាដើម។

កីឡាករទាំងនេះ ត្រូវជួយក្រុមទើបឡើងមកពីក្របខណ្ឌលីគទី២មួយនេះ ប្រជែងដណ្តើមជើងឯកក្របខណ្ឌលីគកំពូលកម្ពុជា និងពានរង្វាន់សម្តេច ហ៊ុន សែន ប្រចាំឆ្នាំ២០១៨ ជាមួយក្រុម១១ផ្សេងទៀត៕