អន្តរជាតិ
តៃវ៉ាន់ពិចារណាទិញរថក្រោះ Abrams របស់អាមេរិក ដើម្បីទប់ទល់ចិន រថក្រោះ Abram របស់អាមេរិកដែលតៃវ៉ាន់ចង់ទិញ (រូបភាព AFP)
× ជាមួយនឹងការកើនឡើការគំរាមកំហែងរបស់ចិន កោះតៃវ៉ាន់បានសម្លឹងឃើញរថក្រោះអាមេរិក ដើម្បីពង្រឹងខឿនការពារជាតិរបស់ខ្លួន។ រដ្ឋមន្ត្រីការពារជាតិតៃវ៉ាន់ Yen Teh-fa និយាយថា ការសម្រេចចិត្តលើបញ្ជាទិញរថក្រោះ M1A2 Abrams របស់អាមេរិក នឹងត្រូវធ្វើនៅចុងឆ្នាំនេះ ប៉ុន្តែត្រូវទិញប៉ុន្មានគ្រឿង នៅមិនទាន់ច្បាស់នៅឡើយ។ មិនត្រឹមតែសមត្ថភាពការពារខ្លួនឡើយ ការទិញសព្វាវុធអាមេរិក នឹងជួយពង្រឹងឧស្សាហកម្មការពារជាតិរបស់តៃវ៉ាន់ដែរ។
ទំនាក់ទំនងច្រកសមុទ្រតៃវ៉ាន់រវាងចិនដីគោក និងកោះតៃវ៉ាន់ ហាក់កើនកម្ដៅកាន់តែខ្លាំង។ សមយុទ្ធជាញឹកញយរបស់កងទ័ពចិន នៅតំបន់ក្បែរកោះ ធ្វើឲ្យកោះតៃវ៉ាន់ បារម្ភយ៉ាងខ្លាំង និងគិតថា ចិនកំពុងសំលៀងក្រញាំ មុននឹងវាយប្រហារខ្លួន។ កោះតៃវ៉ាន់ ដែលប្រឈមមុខសកម្មភាពយោធាកាន់តែខ្លាំងរបស់ចិន សម្លឹងឃើញរថក្រោះស៊េរីទំនើបរបស់អាមេរិក ដើម្បីទុកការពារខ្លួន ក្នុងករណីចិនឈ្លានពាននោះ។
រដ្ឋមន្ត្រីការពារជាតិតៃវ៉ាន់ Yen Teh-fa បានប្រាប់សមាជិកសភា នៅថ្ងៃទី៣០ ខែមេសាថា រថក្រោះM1A2 Abrams អាចដើរតួជាបន្ទាត់ការពារជាតិចុងក្រោយរបស់តៃវ៉ាន់ ស្របតាមយុទ្ធសាស្ត្រថ្មី ដែលដាក់ចេញពីឆ្នាំមុន។ បើតាមទីភ្នាក់ងារព័ត៌មានតៃវ៉ាន់ ក្រៅពីការការពារប្រទេស ប្រមុខការពារជាតិតៃវ៉ាន់រូបនេះអះអាងថា រថក្រោះអាមេរិក នឹងជួយផ្ទេរបច្ចេកវិទ្យាទំនើប ទៅឲ្យវិស័យឧស្សាហកម្មការពារជាតិរបស់តៃវ៉ាន់ដែរ។
ជាមួយគ្នានេះ ប្រមុខការពារជាតិតៃវ៉ាន់រូបនេះ ក៏បានប្រមើល ពីការផ្លាស់ប្ដូរ បរិបទតំបន់ ដោយទំនាក់ទំនងឆ្លងច្រកសមុទ្រតៃវ៉ាន់ នឹងក្លាយជាបញ្ហាក្ដៅ ជំនួសវិបត្តិនៅឧបទ្វីបកូរ៉េ ដែលស្ថានភាពបានធូរស្រាលខ្លាំង។ ឆ្លើយតបនឹងស្ថានភាពប្រែប្រួលបែបនេះ លោក Yen សង្កត់ធ្ងន់ថា យោធាតៃវ៉ាន់ ត្រូវតែពង្រឹងការត្រៀមខ្លួនប្រយុទ្ធឲ្យរឹងមាំ។ លោកក៏រំពឹងថា ចិននឹងបង្កើនការធ្វើសមយុទ្ធយោធា នៅក្បែរដែនកោះតៃវ៉ាន់។
ទាក់ទងចំនួនរថក្រោះដែលអាចទិញ ដើម្បីបញ្ចូលក្នុងយោធាវិញ ប្រព័ន្ធផ្សព្វផ្សាយតៃវ៉ាន់ផ្សាយថា រដ្ឋាភិបាលគ្រោងទិញរថក្រោះ M1A2 Abrams របស់អាមេរិកចំនួនជាង១០០គ្រឿងឯណោះ ខណៈកងទ័ពសង្ឃឹមថា អាចទិញកាន់តែច្រើនជាងនេះ។ យ៉ាងណាមិញលោក Yen មិនបញ្ចេញតួលេខរថក្រោះត្រូវទិញឡើយ តែបង្ហើបថា អាចតិចជាងការទិញលើកមុន។
គម្រោងទិញរថក្រោះនេះ ប្រាកដជាធ្វើឲ្យចិនក្ដៅស្លឹកត្រចៀកមិនខាន។ ម្ដងជាពីរដង ក្រុងប៉េកាំងប្រកាសហើយថា តៃវ៉ាន់ជាទឹកដីមិនអាចបំបែកបាន របស់ចិនដីគោក ហើយក៏មិនខ្លាចប្រើកម្លាំងយោធា ដើម្បីដណ្ដើមតៃវ៉ាន់ ដើម្បីគ្រប់គ្រងដែរ។ កាលពីកិច្ចប្រជុំសភាក្នុងខែមីនា ប្រធានាធិបតី ស៊ី ជិនភីង បានផ្ញើសារព្រមានដែរថា គ្មានទឹកដីណាមួយ សូម្បីតែមីលីម៉ែត្រ ដែលអាចរបូតចេញពីទឹកដីចិនឡើយ ហើយក៏គ្មានកម្លាំងណាអាចបំបែកចិនបានដែរ៕
Tag:
តៃវ៉ាន់
ចិន
អាមេរិក
© រក្សាសិទ្ធិដោយ thmeythmey.com