ជាតិ
អាជ្ញាធរភ្នំពេញ ប្រាប់ពលរដ្ឋឲ្យផ្អាកធ្វើដំណើរ១ខែ លើផ្លូវដួងងៀប ដើម្បីដាក់លូរំដោះទឹក រូបភាពបានពីរដ្ឋបាលរាជធានីភ្នំពេញ
× រដ្ឋបាលរាជធានីភ្នំពេញ បានប្រាប់សាធារណជនដែលរស់នៅ និងធ្វើដំណើរ តាមបណ្តាយផ្លូវដួងងៀបចាប់ពីផ្លូវលេខ២០០៤ ដល់ផ្លូវចោមចៅ(វេងស្រេង) ត្រូវផ្អាកធ្វើចរាចរណ៍លើផ្លូវនេះ រយៈពេល១ខែ ដើម្បីឲ្យអាជ្ញាធរដាក់ប្រព័ន្ធលូរំដោះទឹកភ្លៀងក្នុងរដូវវស្សាដែលជន់លិច។ នេះបើយោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃទី១តុលា។
ការផ្អាកធ្វើចរាចរណ៍លើផ្លូវនេះ ត្រូវបានអនុវត្តន៍ ចាប់ពីថ្ងៃជូនដំណឹងខាងលើ រហូតដល់ការដ្ឋានត្រូវបញ្ចប់ ក្នុងរយៈពេល៣០ថ្ងៃ។ សាលារាជធានីភ្នំពេញ នឹងដាក់លូប្រអប់មេកាត់ទទឹងលើផ្លូវ ដួង ងៀប ទំហំមុខកាត់២,៥ម៉ែត្រ x ២,៥ម៉ែត្រ ចំនួន៣ជួរ ដោយភ្ជាប់ជាមួយប្រឡាយបារាំង ដើម្បីរំដោះទឹកចេញពីតំបន់ខាងកើត និងត្បូង អាកាសយានដ្ឋានអន្តរជាតិភ្នំពេញ ពិសេសតំបន់សឡា ផ្លូវ២០០៤។
ជាមួយគ្នានេះ អាជ្ញាធរ ក៏បានអំពាវនាវដល់អ្នកដំណើរលើផ្លូវនេះ ត្រូវធ្វើចរាចរណ៍លើផ្លូវផ្សេង ដើម្បីបញ្ចៀសការកកស្ទះ និងជួបបញ្ហាផ្សេងៗ ដែលអាចកើតឡើងជាយថាហេតុ៕
© រក្សាសិទ្ធិដោយ thmeythmey.com