ជាតិ
នយោបាយជាតិ
ព្រឹទ្ធសភា យល់ព្រមទាំងស្រុងលើការកែច្បាប់ ដែលបើកផ្លូវឲ្យក្រុមប្រឆាំងវិលមកវិញ
× តាមរយៈកិច្ចប្រជុំពេញអង្គនាព្រឹកថ្ងៃទី២៥ ខែធ្នូ ឆ្នាំ២០១៨នេះ ព្រឹទ្ធសភា បានអនុម័តលើសំណើ ដែលសុំឲ្យធ្វើវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ។
ជាដំណាក់កាលបន្ទាប់ ច្បាប់នេះ នឹងត្រូវបញ្ជូនទៅក្រុមប្រឹក្សាធម្មនុញ្ញ ដើម្បីពិនិត្យបន្ត។ ក្រោយក្រុមប្រឹក្សាធម្មនុញ្ញ ពិនិត្យនិងអនុម័តរួច ច្បាប់នេះ នឹងឈានដល់ជំហានចុងក្រោយ គឺត្រូវថ្វាយទៅព្រះមហាក្សត្រ ដើម្បីព្រះអង្គ ចេញព្រះរាជក្រម ប្រកាសឲ្យប្រើប្រាស់។
មាត្រ៤៥ថ្មី (ស្ទួន) បានប្រគល់អំណាចឲ្យតុលាការកំពូល ដើម្បីរំលាយគណបក្សណាមួយ ហើយក៏អាចហាមថ្នាក់ដឹកនាំនៃគណបក្សនោះ មិនឲ្យធ្វើនយោបាយរយៈពេល៥ឆ្នាំផងដែរ។ ដូច្នេះ បើបុគ្គលណា ជាប់បម្រាមនេះ បុគ្គលនោះ នឹងត្រូវខាតពេលដល់ទៅ៥ឆ្នាំ ក្នុងការធ្វើនយោបាយ។
ប៉ុន្តែ មាត្រា៤៥ថ្មី (ស្ទួន១) ដែលក្លាយមកពីមាត្រា៤៥ថ្មី (ស្ទួន) តាមរយៈការធ្វើវិសោធនកម្ម អាចធ្វើឲ្យបុគ្គលទាំងនោះ រួចផុតពីបម្រាមរបស់តុលាការកំពូល។ មាត្រា៤៥ថ្មី (ស្ទួន១) បានផ្តល់សិទ្ធិឲ្យនាយករដ្ឋមន្ត្រី ក្នុងការថ្វាយសំណើទៅព្រះមហាក្សត្រ ដើម្បីសុំឲ្យព្រះអង្គ អនុញ្ញាតឲ្យបុគ្គល ដែលជាប់បម្រាម បានវិលមកកាន់ឆាកនយោបាយវិញ មុនកាលកំណត់របស់តុលាការកំពូល។
យ៉ាងណាក៏ដោយ សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ប្រកាសថា ទោះជាច្បាប់នេះ ត្រូវបានកែប្រែរួច ហើយចូលជាធរមានក៏ដោយ ក៏មិនមែនថ្នាក់ដឹកនាំទាំងអស់នៃអតីតគណបក្សប្រឆាំង បានទទួលសិទ្ធិនយោបាយវិញ ដោយស្វយប្រវត្តិនោះទេ។ នាយករដ្ឋមន្ត្រី បញ្ជាក់ថា បើចង់បានសិទ្ធិនយោបាយវិញ អ្នកទាំងនោះ ត្រូវធ្វើសំណើម្នាក់ម្តង ឬក៏ធ្វើសំណើជាកញ្ចប់ ដែលមានគ្នា៤ទៅ៥នាក់។
ថ្វីបើប្រមុខរដ្ឋាភិបាល និយាយបើកផ្លូវបែបនេះក្តី ប៉ុន្តែ ក្នុងចំណោមថ្នាក់ដឹកនាំជាង១០០នាក់ នៃអតីតគណបក្សសង្គ្រោះជាតិ ដែលជាប់បម្រាមរបស់តុលាការកំពូល មានតែ២នាក់ប៉ុណ្ណោះ គឺលោក គង់ គាំ និង លោក គង់ បូរ៉ា ដែលបានប្រកាសថា នឹងធ្វើសំណើទៅរដ្ឋាភិបាល ដើម្បីសុំសិទ្ធិធ្វើនយោបាយ។
លោក សម រង្ស៊ី អំពាវនាវពីក្រៅប្រទេសមកថា ថ្នាក់ដឹកនាំទាំងអស់នៃអតីតគណបក្សសង្គ្រោះជាតិ មិនគួរឱនលំទោនទៅសុំសិទ្ធិនយោបាយ ពីរដ្ឋាភិបាលនោះទេ។ លោក ស្នើឲ្យថ្នាក់ដឹកនាំទាំងនោះ បន្តរួមគ្នាទាមទារឲ្យរដ្ឋាភិបាលដោះលែងលោក កឹម សុខា ជាមុនសិន ហើយចាំគិតពីដំណោះស្រាយផ្សេងទៀតតាមក្រោយ៕
Tag:
ច្បាប់នយោបាយ
ព្រឹទ្ធសភា
អនុម័ត
© រក្សាសិទ្ធិដោយ thmeythmey.com