កីឡាប្រពៃណីនិងទំនើបជាង១០ប្រភេទចូលរួមប្រកួតនិងសម្តែង នាថ្ងៃសម្ពោធវិមានឈ្នះ-ឈ្នះ

កីឡាជាតិ

ជាតិ

កីឡាប្រពៃណីនិងទំនើបជាង១០ប្រភេទចូលរួមប្រកួតនិងសម្តែង នាថ្ងៃសម្ពោធវិមានឈ្នះ-ឈ្នះ

26, Dec 2018 , 7:59 am

រូបភាព

ដោយ:

កីឡាវប្បធម៌ប្រពៃណីនិងទំនើបជាង១០ប្រភេទត្រូវបានដាក់ឲ្យប្រកួតនិងសម្តែងដើម្បីអបអរថ្ងៃសម្ពោធវិមានឈ្នះ-ឈ្នះ និងខួបលើកទី២០នៃនយោបាយឈ្នះៗរបស់សម្តេច ហ៊ុន សែន និងបុណ្យចូលឆ្នាំសកល។ ការប្រកួត និងសម្តែងកីឡានេះដែរ ក៏ដើម្បីផ្តល់ភាពសប្បាយរីករាយ រឹតចំណងសាមគ្គីភាព មិត្តភាព និងផ្សព្វផ្សាយពីកីឡាទាំងនេះឲ្យប្រជាពលរដ្ឋស្គាល់កាន់តែច្បាស់ផងដែរ។

កីឡាវប្បធម៌ប្រពៃណីនិងទំនើបជាង១០ប្រភេទបានត្រៀមខ្លួនរួចហើយ ដើម្បីប្រកួតនិងសម្តែងក្នុងថ្ងៃសម្ពោធវិមានឈ្នះៗចន្លោះពីថ្ងៃទី២៨-៣១ ខែធ្នូ ឆ្នាំ២០១៨។ ការប្រកួតនិងសម្តែងកីឡាទាំងនេះ ភាគច្រើនរៀបចំនៅបរិវេណនៃពហុកីឡដ្ឋានជាតិមរតកតេជោ និងនៅស្តូបវិមានឈ្នះៗនៅតំបន់អភិវឌ្ឍន៍របស់លោក លី យ៉ុងផាត់។

បើតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ក្រៅពីការប្រកួត និងសម្តែងកីឡាមហាជន ក៏មានការប្រកួតផ្លូវការមិត្តភាពជាតិនិងអន្តរជាតិ ដើម្បីដណ្តើមជើងឯកនិងខ្សែក្រវាត់ប្រចាំព្រឹត្តិការណ៍នេះផងដែរ។ កីឡាទាំងនេះរួមមានប្រដាល់គុនខ្មែរអន្តរជាតិ អុកចត្រង្គ ប្រណាំងកង់ និងវាយកូនគោលជាដើម។

«យើងមានភារកិច្ចទទួលខុសត្រូវរៀបចំព្រឹត្តិការណ៍កីឡា ដើម្បីអបអរក្នុងថ្ងៃសម្ពោធវិមានឈ្នះៗ និងខួប២០ឆ្នាំនៃការដាក់ចេញនយោបាយឈ្នះៗរបស់សម្តេច ហ៊ុន សែន។ ក្នុងនោះយើងនឹងរៀបចំកីឡាប្រពៃណីភាគច្រើន និងកីឡាទំនើបបែបមហាជន ដោយមានការប្រកួតនិងសម្តែងមិត្តភាពជាតិ និងអន្តរជាតិ»។ នេះជាការលើកឡើងរបស់ លោក វ៉ាត់ ចំរើន។

«យើងមានការប្រកួតចំបាប់បុរាណ ដោយយើងនឹងបើកឲ្យមហាជនចូលរួមលេងឲ្យបានច្រើន។ យើងមានការសម្តែងកីឡាគុនល្បុក្កតោជាទ្រង់ទ្រាយធំមួយ ដើម្បីបង្ហាញនិងផ្សព្វផ្សាយពីកីឡានេះឲ្យកាន់តែខ្លាំង។ ព្រោះយើងកំពុងត្រៀមលក្ខណៈដាក់កីឡានេះចូលក្នុងបញ្ជីបេតិកភណ្ឌអរូបីនៃមនុស្សជាតិរបស់អង្គការយូណេស្កូ បន្ទាប់ពីល្ខោនខោល ដែលទើបដាក់កាលពីពេលថ្មីៗ»។ លោក វ៉ាត់ ចំរើន លើកឡើងបែបនេះ ហើយបានអំពាវនាវឲ្យប្រជាពលរដ្ឋចូលរួមជិះកង់ឆ្ពោះទៅកាន់វិមានឈ្នះ-ឈ្នះឲ្យបានច្រើនកុះករនៅថ្ងៃទី២៨ ខែធ្នូ ឆ្នាំ២០១៨។

ក្រៅពីអបអរការសម្ពោធវិមានឈ្នះ-ឈ្នះ និងខួបលើកទី២០នៃនយោបាយឈ្នះៗរបស់សម្តេច ហ៊ុន សែន និងបុណ្យចូលឆ្នាំសកល ការប្រកួតនិងសម្តែងកីឡានេះ ក៏ដើម្បីបង្ហាញនិងផ្សព្វផ្សាយពីកីឡាវប្បធម៌ឲ្យប្រជាពលរដ្ឋស្គាល់កាន់តែច្បាស់ផងដែរ។ លើសពីនេះ ដើម្បីរឹតចំណងសាមគ្គីភាព មិត្តភាព និងបង្កើតបរិយាកាសសប្បាយរីករាយជូនប្រជាពលរដ្ឋ។ ក្រៅពីការប្រកួតនិងសម្តែងកីឡា ក៏មានការសម្តែងសិល្បៈ ប្រគំតន្ត្រី និងតាំងបង្ហាញស្តង់ពិព័រណ៍ផលិតផលជាតិនិងអន្តរជាតិផងដែរ។

កីឡាដែលគ្រោងដាក់ឲ្យប្រកួតនិងសម្តែងទាំងនោះរួមមានគុនល្បុក្កតោ ចំបាប់ អុកចត្រង្គ ប្រដាល់គុនខ្មែរអន្តរជាតិ ប្រណាំងគោ ក្របីនិងសេះ ប្រណាំងកង់អាជីពនិងមហាជន រត់កម្សាន្ត វាយកូនគោល កាយវប្បកម្ម និង Martial Art ដែលមានកីឡាជាតិនិងអន្តរជាតិជាង១០ប្រភេទសម្តែងរួមគ្នា៕