ជាតិ
នយោបាយជាតិ
សម្តេច ចំអកលោកសម រង្ស៊ី តាមចម្រៀង ឯលោកសម រង្ស៊ី បង្អាប់សម្តេចតាមរូបត្លុក
×![]()
ដោយ: ថ្មីៗ
សម្តេច ហ៊ុន សែន ប្រធានគណបក្សអំណាច និង លោក សម រង្ស៊ី មេប្រឆាំង តែងតែប្រើពាក្យសម្តីវាយប្រហារគ្នាចំៗ។ តែពេលនេះ អ្នកទាំងពីរ បែរជាប្តូរមកឌឺដងគ្នាតាមរបៀបផ្សេងវិញ ដោយម្នាក់ តែងជាបទចម្រៀង ហើយម្នាក់ទៀត គូររូបត្លុក (Cartoon)។
សម្តេច ហ៊ុន សែន បាននិពន្ធចម្រៀងដល់ទៅពីរបទនាពេលថ្មីៗនេះ ដែលគេ ដឹងថា បទចម្រៀងទាំងនោះ សុទ្ធតែបង្កប់ន័យបែបចំអកឲ្យលោក សម រង្ស៊ី ដែលកំពុងនិរទេស ហើយមិនទាន់ហ៊ានចូលស្រុកតាមការសន្យា។ ចម្រៀងទាំងពីរបទនោះ ត្រូវបានក្រុមតន្ត្រីគ្រួសារខ្មែរ យកទៅច្រៀង។
សម្តេច ហ៊ុន សែន សរសេរបទចម្រៀងទាំងនោះ ស្របពេលកាលបរិច្ឆេទនៃការភ្នាល់ចាញ់-ឈ្នះជាមួយលោក សម រង្ស៊ី ជិតឈានមកដល់។
ក្រោយចម្រៀងទាំងពីរបទ ត្រូវបានតែងឡើង លោក សម រង្ស៊ី មិនស្ងៀមទេ ដោយលោក បានធ្វើរូបត្លុក ដើម្បីបង្អាប់សម្តេច ហ៊ុន សែន វិញ។ រូបត្លុកនោះ គឺជារូបប្រកួតគ្នារវាងលោក សម រង្ស៊ី ជាបង្គោលខៀវ និង សម្តេច ហ៊ុន សែន ជាបង្គោលក្រហម។
រូបត្លុកនោះ មិនបង្ហាញពីសមភាពនៃការប្រកួតទេ ដោយរូបលោក សម រង្ស៊ី នៅខាងក្រៅសង្វៀន ហើយរូបសម្តេច ហ៊ុន សែន នៅខាងក្នុងសង្វៀនតែម្នាក់ឯង។ លើសពីនេះ លោក សម រង្ស៊ី ថែមទាំងគូររូបកងកម្លាំងប្រដាប់អាវុធថែមទៀត ដែលស្ថិតក្រោមការបញ្ជារបស់សម្តេច ហ៊ុន សែន។ លោក សម រង្ស៊ី ចង់មានន័យថា សម្តេច ហ៊ុន សែន មិនហ៊ានឲ្យលោក ចូលប្រកួនក្នុងសង្វៀនឡើយ។
លោក បានសរសេរសារអមជាមួយនឹងរូបត្លុកលើទំព័រហ្វេសប៊ុកថា៖«មនុស្សកំសាក គឺអ្នកដែលមិនហ៊ានតទល់ [ជាមួយ] គូបដិបក្ខរបស់ខ្លួនមួយទល់នឹងមួយ»។
លោក សម រង្ស៊ី និង សម្តេច ហ៊ុន សែន បានភ្នាល់គ្នាពីរឿងដោះលែងនិងមិនដោះលែងលោក កឹម សុខា។ លោក សម រង្ស៊ី អះអាងថា លោក កឹម សុខា នឹងត្រូវបានដោះលែងនៅត្រឹមថ្ងៃទី៣ ខែមីនា ឆ្នាំ២០១៩នេះ។ តែបើការអះអាងនេះខុស លោក នឹងវិលចូលស្រុកឲ្យសមត្ថកិច្ចចាប់តែម្តង។
ឯសម្តេច ហ៊ុន សែន តបថា នឹងចុះចេញពីតំណែង បើលោក កឹម សុខា ពិតជាត្រូវបានដោះលែង ដូចការអះអាងរបស់លោក សម រង្ស៊ី។ ប៉ុន្តែ សម្តេច ហ៊ុន សែន ទាមទារឲ្យលោក សម រង្ស៊ី ចូលមកកម្ពុជាតាមការសន្យា បើលោក កឹម សុខា មិនត្រូវបានដោះលែង៕
Tag:
សម រង្ស៊ី
ហ៊ុន សែន
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
