ជាតិ
សេដ្ឋកិច្ច
Amcham៖ ការដកប្រព័ន្ធអនុគ្រោះពន្ធ GSP ធ្វើឲ្យខូចខាតការខិតខំរបស់អាមេរិកនៅកម្ពុជា
លោក Allen Dodgson Tan, ប្រធានក្រុមប្រឹក្សាភិបាលនៃសភាពាណិជ្ជកម្ម អាមេរិកប្រចាំកម្ពុជា។ រូបថតហ្វេសប៊ុក Amcham Cambodia
×![]()
ដោយ: ថ្មីៗ
សភាពាណិជ្ជកម្មអាមេរិកប្រចាំកម្ពុជា (Amcham Cambodia) បានប្រឆាំងនឹងសមាជិកព្រឹទ្ធសភាអាមេរិក២រូប និងសមាជិករដ្ឋសភា២រូបទៀត ដែលបានធ្វើច្បាប់ស្នើឲ្យរដ្ឋាភិបាលបាលអាមេរិកដកប្រព័ន្ធអនុគ្រោះពន្ធពីកម្ពុជា។ Amcham Cambodia វាយតម្លៃថា ការសម្រេចដកប្រព័ន្ធអនុគ្រោះពន្ធ GSP ពីកម្ពុជា នឹងធ្វើឲ្យការខិតខំប្រឹងប្រែងរបស់អាមេរិកទាំងជាច្រើនទស្សវត្សរ៍ត្រូវបាត់បង់ទៅវិញ។
សភាពាណិជ្ជកម្មអាមេរិកប្រចាំកម្ពុជា បានបង្ហាញកង្វល់សារជាថ្មីអំពីការបាត់បង់ប្រយោជន៍អាមេរិកនៅកម្ពុជា បន្ទាប់សមាជិកព្រឹទ្ធសភាអាមេរិក លោក Ted Cruz និងលោក Chris Coons និងសមាជិករដ្ឋសភាអាមេរិក លោក Alan Lwoenthal និងលោក Steve Chabot បានស្នើច្បាប់បន្តបន្ទាប់គ្នាក្នុងខែមករា និងកុម្ភៈ ស្តីពីការដកប្រព័ន្ធអនុគ្រោះពន្ធរបស់អាមេរិកពីកម្ពុជា។
ការព្រួយបារម្ភនេះត្រូវបានសរសេររួមគ្នាដោយ ក្រុមប្រឹក្សាភិបាលរបស់សភាពាណិជ្ជកម្មអាមេរិកប្រចាំកម្ពុជានៅថ្ងៃទី១៣ខែមីនានេះ ដោយផ្ញើទៅព្រឹទ្ធសភា និងរដ្ឋសភារបស់អាមេរិក។
ក្រុមតំណាងវិនិយោគិនអាមេរិកដែលកំពុងធ្វើជំនួញនៅកម្ពុជាបានសរសេរពន្យល់ស្ថាប័ននីតិបញ្ញត្តិអាមេរិកថា ការដកប្រព័ន្ធអនុគ្រោះពន្ធពីកម្ពុជា នឹងប៉ះពាល់ភ្លាមដល់ជីវភាពរបស់កម្មករ និងគ្រួសាររបស់ពួកគេ។ លិខិតដដែលក៏បានគូសបញ្ជាក់ថែមទៀតថា បើសិនជាមានការដកភាពអនុគ្រោះពន្ធមែននោះ ជំនួញរបស់ក្រុមហ៊ុនអាមេរិកក៏នឹងរងផលប៉ះពាល់ពីស្ថានភាពនៃអស្ថិរភាពក្នុងបរិបទសេដ្ឋកិច្ច រួមទាំងការធ្លាក់ចុះនៃទំនាក់ទំនងរវាងប្រទេសទាំងពីរ។
លិខិតសភាពាណិជ្ជកម្មអាមេរិកសរសេរយ៉ាងដូច្នេះទៀត៖«យើងជឿជាក់ថា ការប្រើប្រាស់ប្រព័ន្ធអនុគ្រោះពន្ធ ដោយគ្រាន់តែដើម្បីផ្ញើសារនយោបាយនោះ នឹងធ្វើឱ្យធ្លាក់ចុះនូវឆន្ទៈ និងការរីកចម្រើនរបស់ប្រព័ន្ធមួយដែលត្រូវបានបង្កើតឡើងដើម្បីជាប្រយោជន៍របស់ពលរដ្ឋធម្មតា។ វាក៏នឹងធ្វើឲ្យខូចខាតដល់ការខិតខំរបស់កម្មវិធីជំនួយ អង្គការ ធុរកិច្ច និងពលរដ្ឋអាមេរិកដែលបានធ្វើជាច្រើនទស្សរត្សរ៍កន្លងមកដែរ»។
ដើម្បីទាញចំណាប់អារម្មណ៍ពីសមាជិកព្រឹទ្ធសភា និងរដ្ឋសភាអាមេរិកទាំងមូល ក្រុមប្រឹក្សាភិបាលនៃសភាពាណិជ្ជកម្មអាមេរិកបានរំឭកដល់ស្មារតីនៃច្បាប់ស្តីពាណិជ្ជកម្មអាមេរិកឆ្នាំ១៩៧៤ ដែលត្រូវផ្តល់ឱកាសដល់រាល់ប្រទេសក្រីក្រ ក្នុងការប្រើប្រាស់ការធ្វើពាណិជ្ជកម្មដើម្បីភាពរីកចម្រើន និងងើបចេញពីភាពក្រីក្រ។ ក្រុមអ្នកជំនួញអាមេរិកបញ្ជាក់ថា ស្មារតីនេះត្រូវបានអនុវត្តដោយជោគជ័យនៅកម្ពុជា។
«តាមរយៈស្មារតីនេះ សហរដ្ឋអាមេរិកបានរួមចំណែកដោយផ្ទាល់ក្នុងការលើកស្ទួយជីវភាពពលរដ្ឋខ្មែររាប់ម៉ឺននាក់ដែលមានចំណូលទាប។ ពួកគេម្នាក់ៗបានប្រើប្រាស់ប្រាក់បៀវត្សរ៍របស់ពួកគេ ដើម្បីចិញ្ចឹមគ្រួសារដែលមានសមាជិក៥នាក់ផ្សេងទៀត។ ក្រុមហ៊ុនអាមេរិកផលិតទំនិញនៅក្នុងរោងចក្រដែលប្រើប្រាស់កម្លាំងពលកម្មកម្ពុជា ក៏បានទទួលផលដ៏សម្បើមផងដែរ»។ នេះជាសេចក្តីលើកឡើងរបស់ក្រុមប្រឹក្សាភិបាលនៃសភាពាណិជ្ជកម្មអាមេរិក ដោយបានអះអាងផងដែរថា ការអនុវត្តសិទ្ធិកម្មករ និងលក្ខខណ្ឌការងារនៅកម្ពុជាមានការរីកចម្រើនគួរឱ្យកត់សម្គាល់ក្នុងរយៈពេល១០ឆ្នាំចុងក្រោយនេះ ហើយការកែទម្រង់ក៏នៅតែមានបន្តដែរ។
ដើម្បីបានបង្ហាញហេតុផលខាងលើទាំងអម្បាលមាននេះ សភាពាណិជ្ជកម្មអាមេរិកប្រចាំកម្ពុជាក៏បានអញ្ជើញសមាជិកព្រឹទ្ធសភាទាំងពីររូប និងសមាជិករដ្ឋសភាទាំងពីររូបដែលជាអ្នកស្នើច្បាប់ដកប្រព័ន្ធអនុគ្រោះពន្ធពីកម្ពុជានោះ មកទស្សនកិច្ចនៅកម្ពុជា ដើម្បីបានស្ថានភាពទាំងនេះដោយផ្ទាល់ភ្នែករបស់ពួកគេ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
1 ថ្ងៃ
