អន្តរជាតិ
រូបតំណាង
×![]()
ក្រុងតូក្យូ បានសម្រេចអភិវឌ្ឍជាលើកដំបូងនូវ មីស៊ីលរយៈចម្ងាយឆ្ងាយសម្រាប់បាញ់កម្ទេចនាវា ដែលនឹងត្រូវបំពាក់លើយន្តហោះចម្បាំង។ បើតាមប្រភពរដ្ឋាភិបាលជប៉ុននៅថ្ងៃទី១៧ ខែមីនា មីស៊ីលប្រភេទនេះ មានសមត្ថភាពបាញ់ប្រហារលើនាវាចម្បាំងពីក្រៅរយៈចម្ងាយរបស់សព្វាវុធរបស់សត្រូវ។
ផែនការថ្មីនេះ មានគោលដៅពង្រឹងសមត្ថភាពការពារខ្លួនរបស់ជប៉ុន ដោយពង្រីកលើរយៈចម្ងាយនៃការបាញ់មីស៊ីលពីយន្តហោះចម្បាំងទៅលើនាវាចម្បាំងរហូតដល់ជាង ៤០០គីឡូម៉ែត្រ។ នេះបើតាមសារព័ត៌មាន Japan Time ដកស្រង់ពីប្រភពពីរដ្ឋាភិបាលជប៉ុន។
អ្នកជំនាញ យល់ឃើញថា គម្រោងថ្មីរបស់រដ្ឋបាលលោកនាយករដ្ឋមន្ត្រីជប៉ុន ស៊ីនហ្សូ អាបេ នេះ គឺធ្វើឡើងខណៈក្រុងប៉េកាំងផ្តោតសំខាន់លើការពង្រឹងសមត្ថភាពកងទ័ពជើងទឹកខ្លួន ដែលក្រុងតូក្យូចាត់ថា ការគំរាមកំហែងដល់សន្តិសុខជាតិខ្លួន។
បើតាមប្រភពដដែលនេះ ការអភិវឌ្ឍថ្មី នឹងត្រូវធ្វើឡើងដោយផ្អែកលើមីស៊ីលបាញ់កម្ទេចនាវាប្រភេទ Supersonic XASM-3 របស់ជប៉ុន ដែលមានសមត្ថភាពបាញ់ទៅលើគោលដៅ ក្នុងរយៈចម្ងាយត្រឹម ២០០គីឡូម៉ែត្រប៉ុណ្ណោះ។ ទាក់ទិននឹងសំណើស្តីពីការអភិវឌ្ឍមីស៊ីលនេះវិញ ក្រសួងការពារជាតិជប៉ុន បានឲ្យដឹងថា ខ្លួនក៏នឹងបញ្ចូលលុយចំណាយចាំបាច់នានាសម្រាប់គម្រោងថ្មីនេះទៅក្នុងសេចក្តីព្រាងថវិកានាពេលឆាប់ៗនេះ។
សូមរម្លឹកផងដែរថា កាលពីខែមករាកន្លងទៅ នាយករដ្ឋមន្ត្រីជប៉ុន អាបេ និយាយនៅក្នុងរដ្ឋសភាថា លោកជឿជាក់ថា មីស៊ីលបាញ់នាវារយៈចម្ងាយវែង ពុំមែនជាសព្វាវុធ ដែលត្រូវហាមឃាត់ក្នុងរដ្ឋធម្មនុញជប៉ុននោះទេ។ យ៉ាងណាមិញ មាត្រទី ៩ នៃច្បាប់កំពូលរបស់ជប៉ុន ចែងថា ជប៉ុនបោះបង់សិទ្ធិក្នុងការធ្វើសង្គ្រាម ដែលជាសិទ្ធិអធិបតេយ្យរបស់រដ្ឋនីមួយៗ, ហាមឃាត់ការមានកងកម្លាំងយោធានានា និងអ្វីផ្សេងទៀត ដែលចាត់ទុកថា អាចយកទៅធ្វើសង្គ្រាមបាន៕
Tag:
ជប៉ុន
ការពារជាតិ
រដ្ឋធម្មនុញ
ចិន
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ថ្ងៃ
