ហេតុការណ៍បាញ់រះនៅហូឡង់ សមត្ថកិច្ចចាប់បានជនសង្ស័យដែលសម្លាប់មនុស្សបីនាក់

អន្តរជាតិ

ហេតុការណ៍បាញ់រះនៅហូឡង់ សមត្ថកិច្ចចាប់បានជនសង្ស័យដែលសម្លាប់មនុស្សបីនាក់

19, Mar 2019 , 2:19 pm

រូបភាព

ដោយ:

បុរសម្នាក់ត្រូវបានអាជ្ញាធរហូឡង់ចាប់ខ្លួន ក្រោយពីមនុស្ស៣នាក់ស្លាប់ និង៥នាក់រងរបួស ក្នុងហេតុការណ៍បាញ់រះលើរថភ្លើងអគ្គិសនីក្នុងទីក្រុង Utrecht កាលពីថ្ងៃទី ១៨ខែមីនា។ ការបាញ់រះនេះ បានបង្កឲ្យមានការប្រមាញ់ចាប់នៅទូទាំងទីក្រុង និងបិទសាលារៀនថែមទៀតផង។

ជនសង្ស័យរូបនោះឈ្មោះថា Gokmen Tanis អាយុ ៣៧ឆ្នាំ មានដើមកំណើតតួកគី ត្រូវបានរកឃើញ និងឃាត់ខ្លួនប៉ុន្មានម៉ោងប៉ុណ្ណោះក្នុងអគារមួយកន្លែង ដែលមានចម្ងាយជាង៣គីឡូម៉ែត្រពីកន្លែងកើតហេតុ។ បន្ទាប់ពីសាកសួរជនសង្ស័យរួច សមត្ថកិច្ចពុំទាន់ប្រាកដនៅឡើយទេចំពោះមូលហេតុនៃបើកការបាញ់រះរបស់បុរសដើមកំណើតគួកគីម្នាក់នេះ។

តើហេតុការណ៍បាញ់រះនេះកើតឡើងដោយរបៀបណា? នៅប្រហែលម៉ោង ១០:៤៥នាទីព្រឹក (ម៉ោងនៅហូឡង់) សមត្ថកិច្ចទទួលដំណឹងជុំវិញការបាញ់រះមួយករណីនៅលើរថភ្លើងអគ្គិសនីមួយក្នុងទីក្រុង Utrecht ដែលជាទីក្រុងធំបំផុតលំដាប់ទីបួនរបស់ហូឡង់។ សាក្សីម្នាក់បានប្រាប់សារព័ត៌ក្នុងស្រុកថា បុរសម្នាក់បានចាប់ផ្តើមបាញ់រះយ៉ាងព្រៃផ្សៃ ដែលបណ្តាលឲ្យមនុស្សជាច្រើននាក់រងរបួស និងស្លាប់ទៀតផង។

បុរសជាជនដៃដល់បានគេចខ្លួនចេញពីកន្លែងកើតហេតុ ទើបបង្កឲ្យមានប្រតិបត្តិការតាមចាប់ទ្រង់ទ្រាយធំកាលពីថ្ងៃចន្ទ។ សាលារៀន ត្រូវបានបិទទ្វារ ហើយសន្តិសុខត្រូវបានរឹតបន្តឹងនៅអាកាសយានដ្ឋាន និងវិហារសាសនា ខណៈសមត្ថកិច្ចប្រឆាំងអំពើភេរវកម្មព្យាយាមតាមប្រមាញ់ជនសង្ស័យដើមកំណើតតួកគីនោះ។ រូបថតសន្លឹកដែលបង្ហាញមុខជនសង្ស័យ ត្រូវបានសមត្ថកិច្ចបង្ហោះនៅលើបណ្តាញសង្គម ព្រមទាំងសរសេរសារព្រមានប្រជាជនជៀសឲ្យឆ្ងាយពីបុរសនេះទៀតផង។

សូមបញ្ជាក់ថា ហេតុការណ៍បាញ់រះនៅហូឡង់នេះ បានកើតឡើងមិនដល់មួយសប្តាហ៍ស្រួលបួលផង ក្រោយការបាញ់ប្រហារបង្ហូរឈាមមួយនៅវិហារឥស្លាមចំនួន២ក្នុងប្រទេសនូវែលសេឡង់ ដែលបណ្តាលឲ្យមនុស្សស្លាប់ប្រមាណ៥០នាក់៕