ជនជាតិភាគតិចរ៉ូហ៊ីងយ៉ាប្រហែល ៥០០នាក់ ជាប់កណ្តាលសមុទ្រ ខណៈគ្មានប្រទេសណាមួយព្រមទទួល

COVID-19

អន្តរជាតិ

ជនជាតិភាគតិចរ៉ូហ៊ីងយ៉ាប្រហែល ៥០០នាក់ ជាប់កណ្តាលសមុទ្រ ខណៈគ្មានប្រទេសណាមួយព្រមទទួល

26, Apr 2020 , 4:35 pm

រូបភាព

រូពភាព៖ AFP

ដោយ:

យ៉ាងហោចណាស់ មានជនជាតិភាគតិចរ៉ូហ៊ីងយ៉ាប្រមាណ៥០០នាក់ ដែលគេជឿជាក់ថាបានភៀសខ្លួនពីមីយ៉ាន់ម៉ា បានជាប់គាំងលើទូកនេសាទនៅកណ្តាលសមុទ្រទឹកជ្រៅ នៃឆ្នេរ Bengal។ ជនភៀសខ្លួនទាំងនេះ បានជាប់គាំងច្រើនសប្តាហ៍មកហើយ បន្ទាប់ពីគ្មានប្រទេសណាមួយក្នុងតំបន់ ព្រមទទួលផ្តល់ទីជម្រក ខណៈប្រទេសនីមួយៗ ក៏មានការភ័យខ្លាចពីការឆ្លងវីរុស Covid-19 ផងដែរនោះ។

តាមការចុះផ្សាយរបស់សារព័ត៌មាន Aljazeera នៅថ្ងៃ២៥ មេសា ទូកនេសាទពីរគ្រឿង ដែលផ្ទុកជនជាតិភាគតិចរ៉ូហ៊ីងយ៉ាប្រមាណជាង៥០០នាក់ ដែលមានរាប់បញ្ចូលទាំងមនុស្សចាស់ និងកុមារ មិនមានទិសដៅពិតប្រាកដឡើយ បន្ទាប់ម៉ាឡេស៊ី បានបដិសេធឲ្យចូលចត ក្រោមហេតុផលនៃការរឹតបន្តឹងវិធានការទប់ស្កាត់ នៃការឆ្លងវីរុស Covid-19។

ជាមួយគ្នានេះតាមការបញ្ជាក់របស់ភ្នាក់ងារទទួលបន្ទុកការងារជនភៀសខ្លួន របស់អង្គការសហប្រជាជាតិ ក្រុមជនជាតិរ៉ូហ៊ីងយ៉ា ដែលកំពុងតែជាប់គាំងនៅកណ្តាលសមុទ្រនោះ ទំនងជានៅលើសមុទ្រច្រើនសប្តាហ៍មកហើយ ដោយគ្មានអាហារ និងទឹកគ្រប់គ្រាន់ផង។

ជុំវិញបញ្ហានេះ ក្រុមអ្នកឃ្លាំមើលសិទ្ធិមនុស្ស ( HRW) បានស្នើឲ្យរដ្ឋាភិបាលបង់ក្លាដែសជួយស្រោចស្រង់ក្រុមជាប់គាំងទាំងនោះឲ្យស្នាក់នៅក្នុងជំរំជនភៀសខ្លួនរបស់ខ្លួន ហើយផ្តល់អាហារូបត្ថម្ភ និងការថែទាំដល់ពួកគេ។ ក្រុមសិទ្ធិមនុស្ស លើកឡើងថា បង់ក្លាដែស គួរតែបន្តអំពើមនុស្សធម៌នេះតទៅទៀត ជាពិសេសសម្រាប់ក្រុមដែលកំពុងតែត្រូវការជំនួយបន្ទាន់បែបនេះ។

យ៉ាងណាក៏ដោយ បង់ក្លាដែស បានបដិសេធសំណើនេះរួចហើយ។ តាមការអះអាងរបស់រដ្ឋមន្ត្រីការបរទេសបង់ក្លាដែស AK Abdul Momen បង់ក្លាដែស មិនអាចទទួលជនភៀសខ្លួនបានទៀតឡើយ ព្រោះបច្ចុប្បន្ន ប្រទេស កំពុងតែមានបន្ទុកធ្ងន់រួចទៅហើយក្នុងការទទួលផ្គត់ផ្គង់ជនភៀសខ្លួនជាងមួយលាននាក់់។ រដ្ឋមន្ត្រីរូបនេះ សង្កត់ធ្ងន់ថា ចិត្តសប្បុរសរបស់បង់ក្លាដែស បានមានលើសលុបហើយ។

ប្រមុខការទូតដដែលនេះ បានចោទជាសំណួរ ថាតើហេតុអ្វីបានជាត្រូវបង់ក្លាដែស ដែលត្រូវទទួលខុសត្រូវលើបញ្ហាទាំងនេះ ? ហេតុអ្វីក្រុមសិទ្ធិមនុស្ស មិនស្នើដល់រដ្ឋាភិបាលមីយ៉ាន់ម៉ា ជាមុនសិន ព្រោះប្រភពនៃក្រុមជនភៀសខ្លួនគឺមកពីមីយ៉ាន់ម៉ានោះទេ ?

គួរជម្រាបថា បញ្ហានៃការជាប់គាំងរបស់ជនជាតិភាគតិចរ៉ូហ៊ីងយ៉ានៅកណ្តាលសមុទ្រ មិនមែនជារឿងថ្មីឡើយនៅក្នុងតំបន់ ក៏ប៉ុន្តែបញ្ហានេះ ហាក់មិនមានដំណោះស្រាយទាន់ពេលផងដែរ។ មានក្រុមជនភៀសខ្លួនជាច្រើន ក៏បានស្លាប់ដោយសារតែការលិចលង់នៅកណ្តាលសមុទ្រ និងគ្មានចំណីអាហារហូបចុក។ បញ្ហានេះ ផ្តើមចេញឡើងពីវិបត្តិសន្តិសុខផ្ទៃក្នុងរបស់មីយ៉ាន់ម៉ា ដែលក្រុមសិទ្ធិមនុស្សចោទថា បង្កដោយក្រុមយោធា ក្នុងការរើសអើង និងធ្វើទុកបុកម្នេញទៅសហគមន៍ជនជាតិភាគតិចឥស្លាមរ៉ូហ៊ីងយ៉ា៕