ជាតិ
រដ្ឋមន្ត្រីក្រសួងវប្បធម៌ លោកស្រី ភឿង សកុណា៖«សៀវភៅគឺជាមិត្តដ៏ស្មោះត្រង់»
× ភ្នំពេញ៖ អ្វីទាំងអស់ដែលមានក្នុងសៀវភៅ គឺបានផ្ដល់ចំណេះដឹងដ៏ល្អិតល្អន់ ដ៏ទូលាយ ហើយនឹងជ្រៅជ្រះ។ ការរៀនសូត្រ ក៏ដូចជាការអានសៀវភៅនីមួយៗ រមែងទទួលបាននូវការរីករាយ និងផ្ដល់ចំណេះដឹងពិតប្រាកដ សម្រាប់អ្នកអានគ្រប់ប្រភេទ។ នេះជាការថ្លែងរបស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ក្នុងឱកាស សប្ដាហ៍សៀវភៅ ក្រោមប្រធានបទ “សម័យកូវីដ កាន់តែស្និទ្ធនឹងសៀវភៅ”។
ក្នុងវីដេអូខ្លីដែលមានរយៈពេលជិត៤នាទី លោក ស្រី ភឿង សកុណា បានថ្លែងថា សៀវភៅគឺជាមធ្យោបាយមួយ នាំមនុស្សទៅកាន់គ្រប់ទីកន្លែង គ្រប់ពេលវេលា និងពីប្រទេសមួយទៅប្រទេសមួយ ដើម្បីស្វែងយល់ពីទំនៀមទម្លាប់ អាថកម្បាំងរបស់ធម្មជាតិ អំពីជនជាតិ និងអំពីអ្វីទាំងអស់ដែលជាចំណេះដឹងក្នុងពិភពលោក។ សៀវភៅ ក៏បាននាំមនុស្សទៅកាន់ពេលវេលាកន្លងផុតទៅ បច្ចុប្បន្ន និងទៅអនាគតផងដែរ។
លោកស្រីបន្តថា «បើទោះបីជាបច្ចុប្បន្នមាន ទូរសព្ទស្មាតហ្វូន ទូរទស្សន៍ និងកំព្យូទ័រ ដែលអាចចាត់ទុកជាមិត្តរបស់មនុស្ស ប៉ុន្តែសៀវភៅជានិច្ចជាកាល នៅតែជាមិត្តដ៏ស្មោះត្រង់ដែលតាមជាប់ប្រជាជន និងប្រជាជាតិគ្រប់តំបន់ តាំងពីយូរលង់ណាស់មកហើយ»។
ពិព័រណ៍សៀវភៅឆ្នាំ២០២០នេះ ត្រូវរៀបចំឡើងតាមប្រព័ន្ធអនឡាញ ដោយសារការគំរាមកំហែងពីជំងឺកូវីដ-១៩។ ”សម័យកូវីដ កាន់តែស្និទ្ធនឹងសៀវភៅ” គឺជាប្រធានបទ ដែលនឹងប្រារព្ធឡើងចាប់ពីថ្ងៃទី១២ខែធ្នូ រហូតដល់ថ្ងៃទី១៩ខែធ្នូ ឆ្នាំ២០២០ ក្រោមកិច្ចសហប្រតិបត្តិការពីក្រសួងចំនួន៣ មានក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងក្រសួងអប់រំយុវជន និងកីឡា៕
Tag:
សៀវភៅ
អក្សរសាស្ត្រ
អក្សរសិល្ប៍
ពិព័រណ៍
សប្ដាហ៍សៀវភៅ
© រក្សាសិទ្ធិដោយ thmeythmey.com