ជាតិ
នយោបាយជាតិ
តុលាការចេញដីកាកោះហៅឯកឧត្តម សម រង្ស៊ី និងអ្នកស្រី ថាក់ ឡានី តាមបណ្ដឹងសម្ដេច ហ៊ុន សែន
× អយ្យការអមសាលាដំបូងរាជធានីភ្នំពេញ បានចេញដីកាកោះហៅអ្នកស្រី ថាក់ ឡានី សមាជិកព្រឹទ្ធសភាគណបក្ស សម រង្ស៊ី ឲ្យចូលបំភ្លឺនៅក្នុងតុលាការនៅថ្ងៃទី០៨ សីហា តាមពាក្យបណ្ដឹងរបស់មេធាវីសម្ដេច ហ៊ុន សែន ។ ចំណែកឯកឧត្តម សម រង្ស៊ី តុលាការបង្គាប់ឲ្យចូលបំភ្លឺនៅថ្ងៃទី១៩ សីហា ។ នេះបើតាមលោក លី សុផាន់ណា អ្នកនាំពាក្យសាលាដំបូងរាជធានីភ្នំពេញដែលសរសេរនៅលើបណ្ដាញសង្គម Telagram នៅថ្ងៃទី០៣ សីហា។
កាលពីថ្ងៃទី០១ សីហា មេធាវីរបស់សម្តេច ហ៊ុន សែន បានដាក់ពាក្យប្តឹងឯកឧត្តម សម រង្ស៊ី និងអ្នកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី ពាក់ព័ន្ធនឹងករណីឃាតកម្មលើលោក កែម ឡី។ បើតាមលោក គី តិច សម្តេចនាយករដ្ឋមន្ត្រី ហ៊ុន សែន បានឲ្យលោកប្តឹងឯកឧត្តម សម រង្ស៊ី ដែលសរសេរនៅលើទំព័រហ្វេសប៊ុកចោទរដ្ឋាភិបាលថា ជាអ្នករៀបចំអំពើភេរវកម្មសម្លាប់លោកបណ្ឌិត កែម ឡី និងប្តឹងអ្នកស្រី ថាក់ ឡានី ដែលចោទសម្តេច ហ៊ុន សែន ថា ជាអ្នកសម្លាប់លោក កែម ឡី ។ តែមេធាវីរូបនេះ មិនបញ្ជាក់ពីបទចោទប្រកាន់អ្វីឲ្យច្បាស់លើឯកឧត្តម សម រង្ស៊ី និង អ្នកស្រី ថាក់ ឡានី ព្រោះលោកទុកឲ្យតុលាការជាអ្នកចោទប្រកាន់។ លោក គី តិច មេធាវី ការពារក្តីសម្តេច ហ៊ុន សែន បានថ្លែងថា សម្តេច ហ៊ុន សែន ទាមទារសំណងជំងឺចិត្តពីឯកឧត្តម សម រង្ស៊ី និងអ្នកស្រី ថាក់ ឡានី តែម្នាក់ ១០០ រៀលតែប៉ុណ្ណោះ ព្រោះសម្តេចមិនចង់បានប្រាក់អ្វីនោះឡើយ តែសម្តេចចង់បានតែការបញ្ជាក់ពីភាពស្អាតស្អំសម្រាប់លោក ៕
© រក្សាសិទ្ធិដោយ thmeythmey.com