អន្តរជាតិ
នយោបាយអន្តរជាតិ
×![]()
ភ្នំពេញ៖ មេដឹកនាំគណបក្សប្រឆាំង ឯកឧត្តម សម រង្ស៊ី បានបង្ហាញជំហរស្របគ្នានឹងសម្តេច ហ៊ុន សែនដែរក្នុងការស្នើរដ្ឋាភិបាលបារាំង ឲ្យជួយផ្ដល់ជំនួយបច្ចេកទេសក្នុងការរៀបចំខ្នាតផែនទីប្រទេសកម្ពុជាសម្រាប់យកទៅដោះ ស្រាយបញ្ហាព្រំដែនជាមួយប្រទេសវៀតណាម។ 
កន្លងទៅពេលថ្មីៗនេះ សម្ដេចនាយករដ្ឋមន្ត្រី ហ៊ុន សែន បានបង្គាប់ឲ្យលោក ឡុង វីសាឡូ រដ្ឋលេខាធិការក្រសួង ការបរទេសកម្ពុជា ព្រាងឯកសារច្បាប់ជាមួយភាគីវៀតណាម ដើម្បីរៀបចំលិខិតស្នាមផ្លូវកាស្នើទៅបារាំងស្នើសុំ ជំនួយបច្ចេកទេសមកជួយរៀបចំផែនទីផ្ទេរពីខ្នាត១លើ១០០ពាន់ មកខ្នាត១លើ៥០ពាន់វិញ។ សម្តេចបានចេញការណែនាំដូច្នេះនៅក្នុងជំនួបពិភាក្សាទ្វេភាគីជាមួយនាយករដ្ឋមន្ត្រីវៀតណាម លោក ង្វៀន សួនហ្វ៊ុក នៅ ខេត្តសៀមរាប កាលពីថ្ងៃទី២៣ វិច្ឆិកា។ ប៉ុន្តែ សម្តេចនាយករដ្ឋមន្ត្រីមិនបានបញ្ជាក់ហេតុផលនៅពីក្រោយគោលបំណងបំលែងផែនទីពីខ្នាត១លើ១០០ពាន់ ដូចមានចែងក្នុងរដ្ឋធម្មនុញ្ញកម្ពុជា ទៅប្រើខ្នាត១លើ ៥០ពាន់វិញ ទេ។
ឧត្តម សម រង្ស៊ី ដែលសព្វថ្ងៃកំពុងរស់នៅក្រៅប្រទេស បានសម្តែងការគាំទ្រគំនិតថ្មីនេះរបស់សម្តេចនាយករដ្ឋមន្ត្រីដោយនិយាយថា ការពង្រីកផែនទីពីខ្នាត១លើ១០០ពាន់(១/១០០០០០) ទៅខ្នាត១លើ៥០ពាន់ (១/៥០០០០) វិញ មានលក្ខណៈមូលដ្ឋានច្បាស់លាស់សម្រាប់ដោះស្រាយបញ្ហាព្រំដែនកម្ពុជា-វៀតណាម។
ឯកឧត្តម សម រង្ស៊ី ដែលសរសេរលើហ្វេសប៊ុកខ្លួនថា៖ «បញ្ហាបូរណភាពទឹកដី គឺជាបញ្ហាកំណត់ព្រំដែន ទាំងដែន ដីគោក និងដែនដីទឹក ឲ្យបានត្រឹមត្រូវ និងយុត្តិធម៌។ បញ្ហាព្រំដែននេះឈានមកដល់ដំណាក់កាលមួយថ្មី ដែល តម្រូវឲ្យជនជាតិខ្មែរ អ្នកស្នេហាជាតិ ទាំងអស់ ចូលរួម ធ្វើការនិងតស៊ូជាមួយគ្នា ដើម្បីរកដំណោះស្រាយឲ្យបាន ត្រឹមត្រូវ ដោយឈរលើមូលដ្ឋានច្បាប់ ទាំងច្បាប់ជាតិ (ជាពិសេស រដ្ឋធម្មនុញ្ញ) ទាំងច្បាប់អន្តរជាតិ (ជាពិសេស កិច្ចព្រមព្រៀងទីក្រុងប៉ារីស ឆ្នាំ ១៩៩១)”។
ប្រធានគណបក្សប្រឆាំង ដែលត្រូវបានរាជរដ្ឋាភិបាលហាមមិនឲ្យចូលស្រុក បានសរសេរលើហ្វេសប៊ុករបស់ខ្លួនថា ការពង្រីកខ្នាតផែនទីពី ១/១០០.០០០ (គឺ ១សង់ទីម៉ែត្រ លើផែនទីក្រដាស ស្មើនឹង ១គីឡូម៉ែត្រ លើផែនដីជាក់ ស្តែង) ទៅ ១/៥០.០០០ (គឺ ២សង់ទីម៉ែត្រ លើផែនទីក្រដាស ស្មើនឹង ១គីឡូម៉ែត្រ លើផែនដីជាក់ស្តែង) នឹងធ្វើឲ្យផែនទី “លម្អិតជាង ២ដង ហើយក៏ច្បាស់ជាង ២ដង … ដោយគ្មានប្រែប្រួលអ្វីដែលជាលក្ខណៈមូលដ្ឋាន ឡើយ»។
លោកបន្ថែមថា៖ «យើងអាចជឿទុកចិត្តលើផែនទី រៀបចំដោយប្រទេសបារាំង ដែលមានគោលជំហរអព្យាក្រិត ជាជាងផែនទី ដែលរៀបចំដោយប្រទេសវៀតណាម ដែលមានផលប្រយោជន៍ ផ្ទុយពីផលប្រយោជន៍ប្រទេសកម្ពុជា ក្នុងការកំណត់ព្រំដែនរវាងប្រទេសទាំងពីរ»។
គេនៅមិនទាន់ដឹងថាតើជំហរថ្មីរបស់សម្តេចនាយករដ្ឋមន្ត្រី ជាមួយនឹងការគាំទ្ររបស់មេដឹកនាំគណៈបក្សប្រឆាំងដែរនេះ នឹងមានផលប៉ះពាល់បែបណាទៅលើមាត្រាពាក់ព័ន្ធបូរណភាពដែនដីកម្ពុជានៅក្នុងរដ្ឋធម្មនុញ្ញជាតិនៅ ឡើយទេ។ មាត្រា ២ នៃរដ្ឋធម្មនុញ្ញកម្ពុជា បានចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាច រំលោភបាន ដាច់ខាតក្នុងព្រំដែនរបស់ខ្លួនដែលមានកំណត់ក្នុងផែនទីខ្នាត ១/១០០,០០០ ធ្វើនៅចន្លោះ ឆ្នាំ១៩៣៣ និងឆ្នាំ១៩៥៣ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣ និងឆ្នាំ១៩៦៩។
ក្នុងពេលនេះ លោក ម៉ែន ណាត ប្រធានក្រុមប្រឹក្សាឃ្លាំមើលកម្ពុជា ដែលមានមូលដ្ឋាននៅប្រទេសន័រវេស៍ ចាត់ ទុកការសម្រេចរបស់រដ្ឋាភិបាលលោកនាយករដ្ឋមន្ត្រី ហ៊ុន សែន បែបនេះ គឺជាការរំលោភបំពានទៅលើមាត្រា ២ នៃរដ្ឋធម្មនុញ្ញកម្ពុជា។ ក្នុងសេចក្ដីប្រកាសព័ត៌មានចុះថ្ងៃទី២៥ ខែវិច្ឆិកា ប្រធានក្រុមប្រឹក្សាឃ្លាំមើលកម្ពុជា រូបនេះបញ្ជាក់ដូច្នេះថា៖ «នៅក្នុងបំណងនៃការផ្ទេរផែនទីនេះ គឺគ្រាន់តែជាការបន្លំភ្នែក និងកាឡៃឯកសារ ប្រវត្តិសាស្ត្រស្ដីពីព្រំដែនខ្មែរតាំងពីអនុសញ្ញាបារាំង-កម្ពុជា-កូសាំងស៊ីន ឆ្នាំ១៨៨៣»។
Tag:
សម រង្ស៊ី
ហ៊ុន សែន
ព្រំដែន
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
