អន្តរជាតិ
មហិច្ឆតា«នុយក្លេអ៊ែរ»ដោយឥតញញឺតលោក គីម ជុងអ៊ុន ហ៊ុចផលមកវិញនូវទណ្ឌកម្មធ្ងន់ធ្ងរពីរដងក្នុងឆ្នាំ២០១៦ ![](https://image.thmeythmey.com/pictures/2016/12/31/kim_jung_un.jpg)
×![]()
ការព្យាយាមបំពេញមហិច្ឆតារបស់ខ្លួនក្នុងការកសាងសមត្ថភាពយោធាតាមរយៈការអភិវឌ្ឍកម្មវិធីនុយក្លេអ៊ែររបស់កូរ៉េខាងជើង ដោយមិនមានការខ្លាចរអារពីបម្រាមសហគមន៍អន្តរជាតិ បានហ៊ុចផលមកវិញនូវទណ្ឌកម្មធ្ងន់ធ្ងរជាបន្តបន្ទាប់។ ជាពិសេសនោះ គ្រាន់តែឆ្នាំ២០១៦នេះ កូរ៉េខាងជើង ទទួលបានទណ្ឌកម្មពីរលើកដែលជាប្រភេទទណ្ឌកម្មធ្ងន់ធ្ងរបំផុតរបស់ក្រុមប្រឹក្សាសន្តិសុខអង្គការសហប្រជាជាតិ ដែលមានទិសដៅបិទច្រកសេដ្ឋកិច្ចរដ្ឋឯកោមួយនេះ ធ្វើបែបយ៉ាងណាមិនឲ្យមានលទ្ធភាពដើម្បីបន្តមហិច្ឆតានុយក្លេអ៊ែរទៀតនោះ។
ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី៣០ ខែវិច្ឆិកា បានអនុម័តជាឯកច្ឆន្ទលើសម្រេចដំណោះស្រាយថ្មីមួយបន្ថែមដើម្បីឆ្លើយតប ក៏ដូចជាប្រឆាំងនឹងសកម្មភាពដ៏គឃ្លើនរបស់កូរ៉េខាងជើងដែលស្ថិតក្រោមការដឹកនាំរបស់មេដឹកនាំវ័យក្មេងគីម ជុងអ៊ុន ដែលបានបញ្ជាបាញ់សាកល្បងគ្រាប់បែកនុយក្លេអ៊ែរលើកទី៥នៅថ្ងៃទី០៩ ខែកញ្ញាកន្លងទៅ។ ការបាញ់សាកល្បងនោះ ត្រូវបានអ្នកជំនាញចាត់ទុកជាការបាញ់មួយក្នុងបច្ចេកវិទ្យាដ៏ខ្លាំងក្លាបំផុត។
តាមរយៈសេចក្តីសម្រេចជាដំណោះស្រាយលេខ ២៣២១ សមាជិកទាំង១៥នៃក្រុមប្រឹក្សាសន្តិសុខ បានអះអាងជាថ្មីថា កូរ៉េខាងជើងមិនគួរបាញ់សាកល្បងអាវុធនុយក្លេអ៊ែរ បច្ចេកវិទ្យាមីស៊ីលបាលីស្ទីក ឬសកម្មភាពបង្កហេតុផ្សេងបន្ថែមទៀតឡើយ។ យោងតាមប្រការ២៦នៃសេចក្តីសម្រេច ដំណោះស្រាយ ២៣២១នោះ កូរ៉េខាងជើង មិនអាចផ្គត់ផ្គង់ លក់ ឬដឹកជញ្ជូនទាំងដោយផ្ទាល់ ឬដោយប្រយោលពីទឹកដីរបស់ខ្លួន ឬនាវាដឹកជញ្ជូនដែលមានទង់ជាតិកូរ៉េខាងជើងនូវ ធ្យូង និងថ្មទៀតបានឡើយ ហើយសមាជិកទាំងអស់អង្គការសហប្រជាជាតិទាំងអស់ ក៏ត្រូវបានហាមឃាត់ក្នុងការធ្វើលទ្ធកម្មពីកូរ៉េខាងជើងលើមុខទំនិញទាំងនោះផងដែរ។
ប្រការ២៦ ដែលជាបញ្ញត្តិមួយដែលត្រូវជំនួសលើប្រការ២៩ នៃដំណោះស្រាយ ២២៧០ មានទិសដៅធានាបិទច្រកសេដ្ឋកិច្ច និងហិរញ្ញវត្ថុ ដែលសំដៅការលក់ធ្យូងថ្មដែលជាដង្ហើមរបស់កូរ៉េខាងជើងតែម្តង។ បញ្ញត្តិនោះ បង្ហាញយ៉ាងច្បាស់ពីការព្រមព្រៀងគ្នាជាឯកច្ឆន្ទរបស់ក្រុមប្រឹក្សាសន្តិសុខ ដែលរួមមានទាំងចិន ដែលជាសម្ព័ន្ធមិត្តកូរ៉េខាងជើងដែរនោះ បានសម្រេចផ្ដាច់ការនាំចេញរបស់ធ្យូងថ្មរបស់កូរ៉េខាងជើងក្នុងបរិមាណធ្យូងថ្ម ៧.៥លានតោនសម្រាប់ឆ្នាំ២០១៧ ដែលមានតម្លៃប្រមាណ៤០០លានដុល្លារ។
សូមរម្លឹកផងដែរថា ក្រុមប្រឹក្សាសន្តិសុខអង្គការសហប្រជាតិ នៅថ្ងៃទី០២ ខែមីនា កន្លងទៅ ក៏បានអនុម័តជាឯកច្ឆន្ទលើសេចក្តីសម្រេចថ្មីមួយប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅថ្ងៃទី០៦ ខែមករា និងនៅថ្ងៃទី០៧ ខែកុម្ភៈ ឆ្នាំ២០១៦នេះ។ សេចក្តីសម្រេចលេខ២២៧០ ដែលបានបញ្ញាត្តិ៥២ចំណុចនោះ ត្រូវបានចាត់ទុកថាជាទណ្ឌកម្មមួយដ៏ធ្ងន់ធ្ងរមួយបន្ថែមលើទណ្ឌកម្មដែលបានអនុម័តដោយក្រុមប្រឹក្សាសន្តិសុខកន្លងមក។ តែសេចក្តីសម្រេចលេខ ២២៧០ ដែលជាសេចក្តីសម្រេចទណ្ឌកម្មលើកទី៥ប្រឆាំងនឹងកូរ៉េខាងជើងពេលនោះ មិនបានបញ្ជាក់ពីតួលេខច្បាស់លាស់ដូចសេចក្តីសម្រេចចុងក្រោយនេះឡើយ។
កន្លងទៅ មុនឆ្នាំ ២០១៦ ក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេចបួនលើករួចហើយដើម្បីប្រឆាំងនឹងកូរ៉េខាងជើង។ ក្នុងនោះរួមមានក្នុងឆ្នាំ២០០៦ ( សេចក្តីសម្រេចលេខ១៧១៨ ) ឆ្នាំ២០០៩ (សេចក្តីសម្រេចលេខ១៨៧៤) ឆ្នាំ២០១៣(២០៨៧) និង ឆ្នាំ២០១៣ (សេចក្តីលេខ២០៩៤) ។ សេចក្តីសម្រេចទាំងនេះដែលបានបញ្ញាត្តិទណ្ឌកម្មមួយចំនួនទាក់ទងនឹងការរឹតត្បិតលើប្រភពសេដ្ឋកិច្ចទៅកាន់កូរ៉េខាងជើងទាំងនេះ មិនបានធ្វើឲ្យកូរ៉េខាងជើងថមថយសកម្មភាពខ្លួននោះទេ៕
© រក្សាសិទ្ធិដោយ thmeythmey.com