ជាតិ
បាវស្កររបស់កូកាកូឡា ត្រូវបានកែច្នៃទៅជាកាបូបទាន់សម័យ
× ភ្នំពេញ៖ ក្រុមហ៊ុនកូកាកូឡា(កម្ពុជា) បានសហការជាមួយសហគ្រាសភូមិសិប្បកម្មកម្ពុជា ក្នុងការកែច្នៃបាវស្ករកូកាកូឡា ទៅជាកាបូបយួរដៃ កាបូបស្ពាយ យ៉ាងទាន់សម័យ។ ការកែច្នៃកាបូបទាន់សម័យ ពីបាវស្កររបស់កូកាកូឡា បានផ្តល់ការងារ និងប្រាក់ចំណូលដល់អ្នកមានពិការភាពជាង៣០០នាក់ ដែលបម្រើការនៅសហគ្រាភូមិសិប្បកម្មកម្ពុជា។ មិនត្រឹមតែប៉ុណ្ណោះ នេះគឺជាសកម្មភាពរួចំណែក កាត់បន្ថយសំណល់ប្លាស្ទិក នៅកម្ពុជាផងដែរ។
គម្រោងផលិតកាបូបទាន់សម័យពីបាវស្ករ រៀបចំធ្វើឡើងដោយក្រុមហ៊ុនកូកាកូឡា សហគ្រាសភូមិសិប្បកម្មកម្ពុជា និងសមាគមរោងចក្រកាត់ដេរនៅកម្ពុជា (GMAC)។ គោលដៅរួម នៃការសហការនេះ គឺចង់ចូលរួមចំណែកកាត់បន្ថយការប្រើប្រាស់ប្លាស្ទិក តាមរយៈការកែច្នៃបាវស្ករកូកាកូឡា ទៅជាកាបូបទាន់សម័យ សម្រាប់ប្រើប្រាស់ក្នុងស្រុក និងនាំចេញទៅក្រៅប្រទេសផងដែរ។
កញ្ញា វ៉ាន់ អាម៉ូនិច្ច ប្រធានផ្នែកទំនាក់ទំនង និងកិច្ចការសាធារណៈ នៃក្រុមហ៊ុនកូកាកូឡា លើកឡើងថា គម្រោងនេះ គឺជាផ្នែកមួយនៃទំនួលខុសត្រូវរបស់ក្រុមហ៊ុន ក្នុងការសម្អាតបរិស្ថាន ពិសេសសំណល់ប្លាស្ទិក ដូចជាបាវស្ករជាដើម។ ក្រុមហ៊ុនកូកាកូឡា បានផ្ដល់បាវស្កររាប់រយបាវ ទៅសហគ្រាសភូមិសិប្បកម្មកម្ពុជា ដើម្បីផលិតកាបូបទាន់សម័យបរិស្ថាន។
អ្នកស្រី ណោម ប៊ុនណាក់ នាយិកាសហគ្រាសភូមិសិប្បកម្មកម្ពុជា យល់ថា ការផលិតកាបូបពីបាវស្ករនេះ បានផ្ដល់សារសំខាន់លើផ្នែកបរិស្ថាន ព្រោះបានរួមចំណែកសម្អាតសំណល់ តាមរយៈការកែច្នៃបាវស្ករ ទៅជាកាបូបបរិស្ថាន អាចប្រើប្រាស់ឡើងវិញបានយ៉ាងមានតម្លៃ។
លើសពីការលើកកម្ពស់ផ្នែកបរិស្ថានក្នុងស្រុក គម្រោងផលិតកាបូបនេះ ក៏បានជួយដល់ជនពិការប្រមាណ៣៦០នាក់ ដែលកំពុងធ្វើការនៅក្នុងសហគ្រាសភូមិសិប្បកម្មកម្ពុជាផងដែរ។ អ្នកស្រី ប៊ុនណាក់ លើកឡើងដូច្នេះថា ការកែច្នៃកាបូបក្នុងសហគ្រាសខ្លួន បានផ្ដល់ឱកាសការងារដល់ជនពិការ ដើម្បីឲ្យពួកគេអាចមានលទ្ធភាពរកប្រាក់ចំណូលចិញ្ចឹមជីវិតបាន ហើយជៀសផុតពីការរើសអើង។
អ្នកស្រី ណោម ប៊ុនណាក់ រៀបរាប់ដូច្នេះ៖ «យើងសហការគ្នាផលិត ដោយទទួលបានបាវស្ករពីក្រុមហ៊ុនកូកាកូឡា ដោយឥតគិតថ្លៃ យកមកកែច្នៃ ហើយផ្សព្វផ្សាយរួមគ្នា ឲ្យប្រជាជនយល់ដឹងពីអត្ថប្រយោជន៍ក្នុងប្រើប្រាស់សំណល់កែច្នៃ។ ទី១ វាអាចជួយដល់បរិស្ថាន ដោយកាត់បន្ថយប្លាស្ទិក (បាវប្លាស្ទិក)។ ទី២ អាចផ្ដល់ការងារដល់អ្នកខ្វះលទ្ធភាព (ជនពិការ)។ ទី៣ អាចបង្កើនផលិតផលក្នុងស្រុក ធ្វើដោយដៃ នៅលើទីផ្សារទាំងក្នុងស្រុក និងបរទេស»។
កញ្ញា វ៉ាន់ អាម៉ូនិច្ច តំណាងក្រុមហ៊ុនកូកាកូឡា(កម្ពុជា) បង្ហាញការពេញចិត្ត និងគាំទ្រ លើគម្រោងផលិតកាបូបពីបាវស្ករនេះ ដោយឆ្លើយប្រាប់សារព័ត៌មាន ThmeyThmey25 ដូច្នេះថា៖«ពេលយើងឃើញ អ្នកធ្វើការក្នុងសហគ្រាសភូមិសិប្បកម្មកម្ពុជា សុទ្ធតែអ្នកពិការ ហើយភាគច្រើនជាស្ត្រី ដែលពួកគាត់តស៊ូនឹងជីវិត បានធ្វើឲ្យពួកយើងកាន់តែមានទឹកចិត្តជំរុញគម្រោងនេះបន្ថែមទៀត»។
កាបូបពីបាវស្កររបស់កូកាកូឡា កែច្នៃដោយជនពិការប្រមាណ៣៦០នាក់ ដែលមានជំនាញធ្វើកាបូបស្រាប់ក្នុងសហគ្រាសភូមិសិប្បកម្មកម្ពុជា។ ជនពិការ ដែលកំពុងបម្រើការងារទាំងនោះភាគច្រើនជាស្ត្រី មកពីបណ្ដាខេត្តផ្សេងគ្នា ហើយបច្ចុប្បន្នរស់នៅរាជធានីភ្នំពេញ។ នេះបើតាមអ្នកស្រី ណោម ប៊ុនណាក់ នាយិកាសហគ្រាសភូមិសិប្បកម្មកម្ពុជា។
ក្នុងនោះ លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា ក៏បង្ហាញការគាំទ្រលើការកែច្នៃបាវស្ករប្លាស្ទិក ដោយលើកឡើងដូច្នេះថា ការធ្វើអាជីវកម្ម ដើម្បីទទួលបានប្រាក់ចំណេញជាគោលដៅទី១ ប៉ុន្តែអាជីវករក៏ត្រូវមានទំនួលខុសត្រូវសង្គមផងដែរ។ តាមរយៈការច្នៃបាវប្លាស្ទិក ជាដំណោះស្រាយល្អ ព្រោះមិននាំឲ្យមានការបំពុលដល់បរិស្ថាន ហើយក៏បានជួយសម្រួលជីវភាពរស់ដល់ជនពិការផងដែរ៕
Tag:
សហគ្រាស
សិប្បកម្ម
កូកាកូឡា
កាបូបពីបាវស្ករ
វ៉ាន់ អាម៉ូនិច្ច
ណោម ប៊ុនណាក់
កាំង ម៉ូនីកា
© រក្សាសិទ្ធិដោយ thmeythmey.com