ជាតិ
នយោបាយជាតិ
កិច្ចប្រជុំកំពូលអាស៊ី-អឺរ៉ុប ដែលកម្ពុជាធ្វើជាម្ចាស់ផ្ទះ ត្រូវពន្យារពេលលើកទី២ សម្តេចនាយករដ្ឋមន្រ្តី ហ៊ុន សែន ពេលទៅចូលរួមកិច្ចប្រជុំកំពូលអាស៊ី-អឺរ៉ុប នៅទីក្រុងព្រុចសែល ប្រទេសបែលហ្សិក កាលពីអំឡុងខែតុលា ឆ្នាំ២០២១៨ (រូបពី AFP)
× កិច្ចប្រជុំកំពូលអាស៊ី-អឺរ៉ុបលើកទី១៣ (ASEM) ដែលកម្ពុជា ធ្វើជាម្ចាស់ផ្ទះ ហើយគ្រោងរៀបចំឡើងនៅអំឡុងខែមិថុនា ឆ្នាំ២០២១នេះ ត្រូវពន្យារពេលម្តងទៀត ដោយគ្រោងនឹងរៀបចំឡើងនៅចុងឆ្នាំ២០២១វិញ។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃកិច្ចប្រជុំចង្អៀតថ្នាក់ឧត្តមមន្ត្រីអាស៊ី-អឺរ៉ុប តាមប្រព័ន្ធវីដេអូ កាលពីទី១ និងទី២ ខែមីនា។
កិច្ចប្រជុំចង្អៀតថ្នាក់ឧត្តមមន្ត្រីអាស៊ី-អឺរ៉ុប បានគាំទ្រកម្ពុជា ចំពោះការលើកពេលប្រជុំកំពូលអាស៊ី-អឺរ៉ុប។ ការពន្យារពេលនៃប្រជុំកំពូលអាស៊ី-អឺរ៉ុបម្តងហើយម្តងទៀតបែបនេះ គឺដោយសារការរាលដាលជំងឺកូវីដ-១៩។ សេចក្តីប្រកាសព័ត៌មាន បញ្ជាក់ថា ការលើកពេលកិច្ចប្រជុំនេះ គឺដើម្បីធានាសុត្ថិភាពរបស់ថ្នាក់ដឹកនាំអាស៊ី-អឺរ៉ុប ពីរាលដាលជំងឺកូវីដ-១៩។
ដើមឡើយ កិច្ចប្រជុំកំពូលអាស៊ី-អឺរ៉ុបលើកទី១៣ គ្រោងប្រព្រឹត្តទៅនៅឆ្នាំ២០២០ ក្រោមការរៀបចំរបស់កម្ពុជា ដែលជាម្ចាស់ផ្ទះ តែដោយសារតែជំងឺកូវីដ-១៩ រដ្ឋាភិបាលកម្ពុជា ក៏លើកពេលមករៀបចំកិច្ចប្រជុំកំពូលនេះ នៅខែមិថុនា ឆ្នាំ២០២១។ យ៉ាងណា កិច្ចប្រជុំកំពូលអាស៊ី-អឺរ៉ុប នៅតែមិនទាន់អាចរៀបចំនៅខែមិថុនា ឆ្នាំ២០២១ តាមការគ្រោងទុកដដែល ដោយសារតែបច្ចុប្បន្ន កម្ពុជា កំពុងផ្ទុះជំងឺកូវីដ-១៩ ហៅថា ព្រឹត្តិការណ៍សហគមន៍២០កុម្ភៈ។ ទីបំផុត រដ្ឋាភិបាលកម្ពុជា សម្រេចលើកកិច្ចប្រជុំនេះ ទៅចុងឆ្នាំ២០២១នេះ។
កិច្ចប្រជុំកំពូលអាស៊ី-អឺរ៉ុបលើកទី១២ ត្រូវបានប្រារព្ធឡើយនៅក្រុងព្រុចសែល ប្រទេសបែលហ្ស៊ិក កាលអំឡុងខែតុលា ឆ្នាំ២០១៨ ដោយមានការចូលរួមពីប្រមុខរដ្ឋ និងប្រមុខរដ្ឋាភិបាល ៥១រូប ពីតំបន់អាស៊ី និងតំបន់អឺរ៉ុប៕
Tag:
COVID-19
កម្ពុជា
ASEM
ពន្យារពេល
© រក្សាសិទ្ធិដោយ thmeythmey.com