ការបរិភោគអាហារបួសកំពុងមានប្រជាប្រិយភាពក្នុងពេលបច្ចុប្បន្ន។ ការសិក្សាបានបង្ហាញថា មនុស្សជ្រើសយកទម្លាប់បរិភោគអាហារបួស ស្ថិតក្រោយហេតុផលមួយចំនួនដូចជា ការគិតពីក្រមសីលធម៌ គិតពីបរិស្ថាន និងបញ្ហាសុខភាព។ នេះបើតាមការចុះផ្សាយលើទំព័រសុខភាព Healthline។
ក្រុមអ្នកបរិភោគអាហារបួស មានតាំងពីឆ្នាំ ១៩៤៤ មកម្លេះ។ ពួកគេបានសម្រេចចិត្តមិនទទួលទាន សាច់សត្វគ្រប់ប្រភេទ ចំណីអាហារដែលធ្វើពីទឹកដោះសត្វ, ស៊ុតសត្វ, និងផលិតផលកែច្នៃចេញពីសត្វផ្សេងទៀតផងដែរ។ លើសពីនេះ ក្រុមនេះបានព្យាយាមរស់នៅដោយមិនពាក់ព័ន្ធជាមួយការសម្លាប់ និងការជួញដូរសត្វ មិនថាតែសម្រាប់ចំណីអាហារ, សម្លៀកបំពាក់ ឬក្នុងគោលបំណងណាមួយក៏ដោយ។
អាហារដែលអ្នកបួសអាចទទួលទានបានត្រូវតែជាអាហារដែលធ្វើពីបន្លែ ផ្លែឈើ ឬម្សៅមិនមានជាតិសាច់សត្វ ដូចជា តៅហ៊ូ នំប៉័ង ដែលធ្វើពីទឹកដោះគោរុក្ខជាតិជាដើម។ នៅពីក្រោយការសម្រេចចិត្តរបស់មនុស្សមួយចំនួន ក្នុងការបរិភោគអាហារបួសមានហេតុផល ៣ធំៗ ដូចជា ក្រមសីលធម៌ បញ្ហាបរិស្ថាន និងគិតពីសុខភាព។
អ្នកបរិភោគបួសជឿថា រាល់ជីវិតក្នុងលោកនេះសុទ្ធតែមានសិទ្ធិរស់រាន និងមានសេរីភាព។ ដូចនេះទើបពួកគេមិនសម្លាប់ជីវិតសត្វដើម្បីយកសាច់មកបរិភោគ ផឹកទឹកដោះ ឬយករោម ស្បែកមកធ្វើជាសម្លៀកបំពាក់ជាដើម ខណៈពេលមានរបស់ជាច្រើនផ្សេងទៀតអាចបរិភោគ និងប្រើប្រាស់ជំនួសបាន។ ពួកគេថែមទាំងប្រឆាំងនឹងឧស្សាហកម្មកសិកម្មចិញ្ចឹមសត្វ និងទិញតែផលិតផលណាមិនមានពាក់ព័ន្ធប៉ុណ្ណោះ។
លើសពីនេះ មនុស្សមួយចំនួនបានសម្រេចចិត្តមិនប្រើប្រាស់ផលិតផលកែច្នៃពីសត្វពីព្រោះពួកគេគិតពីផលប៉ះពាល់នៃកសិកម្មចិញ្ចឹមសត្វទៅលើបរិស្ថាន។ កសិកម្មចិញ្ចឹមសត្វបានរួមចំណែកក្នុងការបំភាយឧស្ម័នផ្ទះកញ្ចក់ទៅក្នុងបរិយាកាស រួមមាននីត្រូសែនអុកស៊ីត ៦៥ភាគរយ, មេតាន ពី ៣៥ ទៅ ៤០ភាគរយ, និងកាបូនឌីអុកស៊ីត ៩ភាគរយ។ ឧស្ម័នទាំងនោះ ជាកត្តាដ៏សំខាន់ ដែលជំរុញឱ្យមានបម្រែបម្រួលអាកាសធាតុ។ កសិកម្មចិញ្ចឹមសត្វក៏នាំឱ្យមានការកាប់ ឬដុតបំផ្លាញព្រៃឈើ ដើម្បីយកដី ដែលបណ្តាលឱ្យបាត់បង់ជម្រកសត្វព្រៃ និងសត្វមួយចំនួនត្រូវស្លាប់ផុតពូជជាដើម។
ចំពោះហេតុផលចុងក្រោយវិញនោះ គឺបញ្ហាសុខភាព។ អ្នកខ្លះជ្រើសបរិភោគអាហារបួសដោយសារតែពួកគេគិតគូរពីបញ្ហាសុខភាព ដែលបណ្តាលមកពីការបរិភោគសាច់សត្វ។ ការទទួលទានអាហារបួសអាចកាត់បន្ថយហានិភ័យនៃជំងឺបេះដូង ជំងឺទឹកនោមផ្អែមប្រភេទទី២ ជំងឺមហារីក និងប្រឈមហានិភ័យជំងឺផ្សេងទៀត ដែលអាចស្លាប់មុនអាយុ។ មួយវិញទៀត ការបរិភោគបួសក៏បានចូលរួមក្នុងការរក្សាទម្ងន់រាងកាយឱ្យបានល្អដែរ។
សូមបញ្ជាក់ថា ការបរិភោគអាហារបួសមានអត្ថប្រយោជន៍សម្រាប់សុខភាព លុះត្រាតែអ្នកចេះរៀបចំរបបអាហាររបស់អ្នកឱ្យបានត្រឹមត្រូវដោយស្វែងរកអាហារណាមានវីតាមីន និងប្រូតេអ៊ីនគ្រប់គ្រាន់សម្រាប់ជំនួសប្រតេអ៊ីនដែលមានក្នុងសាច់សត្វ ព្រោះរាងកាយមនុស្សត្រូវការវាដើម្បីទ្រទ្រង់ជីវិត៕