ជាតិ
លោក ហេ ជុនសិក តន្ត្រីករវីយូឡុងដែលស្និទ្ធជាមួយលោក ស៊ីន ស៊ីសាមុត ទទួលមរណភាពដោយសារកូវីដ-១៩
×![]()
ដោយ: ប៉ូ សាគុន
ភ្នំពេញ៖ តន្ត្រីករវីយូឡុង លោក ហេ ជុនសិក និងជាជំនិតរបស់អធិរាជសំឡេងមាស ស៊ីន ស៊ីសាមុត បានចែកឋានក្នុងជន្មាយុ៨២ឆ្នាំ ដោយសារជំងឺកូវីដ-១៩ នៅថ្ងៃទី១០ ខែតុលា ឆ្នាំ២០២១ នៅវេលាម៉ោង១២ និង៤៣នាទីថ្ងៃត្រង់។
លោក សិក សីលា ត្រូវជាកូនប្រុសពៅរបស់តន្ត្រីករ ហេ ជុនសិក បានប្រាប់សារព័ត៌មានថ្មីៗថា ឪពុករបស់លោក បានចែកឋានក្នុងមណ្ឌលព្យាបាលជំងឺកូវីដ-១៩ នៅពហុកីឡដ្ឋានជាតិអូឡាំពិក។ លោកថា គ្រួសារបានដឹងថាលោក ជុនសិក មានផ្ទុកជំងឺកូវីដ-១៩ ប្រហែល៣ថ្ងៃមុន ក្រោយពីទៅព្យាបាលជំងឺនៅមន្ទីរពេទ្យឯកជនមួយ។ ក្នុងថ្ងៃដដែលគ្រូពេទ្យក៏បញ្ជូនលោក ទៅមណ្ឌលព្យាបាលជំងឺកូវីដ-១៩ នៅស្ដាតអូឡាំពិក។
យ៉ាងណាក៏ដោយ នៅពេលនេះលោក សិក សីលា នៅពុំទាន់ដឹងថានឹងធ្វើពិធីបុណ្យ ដើម្បីឧទ្ទិសកុសលជូនឪពុកនៅពេលណានៅឡើយទេ។ លោក សីលា បញ្ជាក់៖«យើងចាំពិភាក្សាបងប្អូនទាំងអស់គ្នាសិន អំពីការធ្វើបុណ្យបញ្ជូនកុសលទៅប៉ា។ ជំហានដំបូងនេះ គេបូជាសពនៅត្រង់ណា យើងទៅឱ្យបានទាន់ពេល ដើម្បីយកធាតុមកផ្ទះ។ ពេលនេះគេកំពុងវេចខ្ចប់សព ហើយរង់ចាំលិខិតអនុញ្ញាតឱ្យយកសពចេញ»។
ម្ចាស់បទ «សោភិនីមាសស្នេហ៍” លោក ហេ ជុនសិក គឺជាតន្ត្រីករវីយូឡុងអស់រយៈពេល៥០ឆ្នាំមកហើយ។ លោក ក៏ជាអ្នកនិពន្ធបទភ្លេង និងទំនុកច្រៀង កាលពីអំឡុងទ.វឆ្នាំ៦០ផងដែរ។ លោកមានកូនចំនួន៣នាក់ ដោយមានស្រីម្នាក់។ កូនទាំងអស់សុទ្ធតែមានឧបនិស្ស័យខាងតន្ត្រី ប៉ុន្តែពួកគេមិនបានចាប់ជាអាជីពឡើយ។ លោក ហេ ជុនសិក មានជំងឺត្បៀតសរសៃឈាមបេះដូងប្រហែលជា១០ឆ្នាំមកហើយ ដោយលោកបានបន្តលេបថ្នាំ និងព្យាបាលជាប្រចាំ រហូតដល់ថ្ងៃរកឃើញថាមានផ្ទុកជំងឺកូវីដ-១៩។
ក្នុងបទសម្ភាសមួយជាមួយវិទ្យុបារាំងអន្តរជាតិ (RFI) លោក ហេ ជុនសិក បានអះអាងថា លោកបានរួមចំណែកយ៉ាងច្រើនក្នុងដំណើរជីវិតសិល្បៈជាមួយលោក ស៊ីន ស៊ីសាមុត។ លោកក៏បានចូលរួមលេងវីយូឡុងសម្រាប់បទ «ចម្ប៉ាបាត់ដំបង» និងបទជាច្រើន ដែលច្រៀង និងនិពន្ធដោយលោក ស៊ីន ស៊ីសាមុត ផងដែរ៕
Tag:
សិល្បៈ
តន្ត្រី
តន្រ្តីករ
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
