អន្តរជាតិ
ឥណ្ឌា បាញ់សាកល្បងមីស៊ីលបាលីស្ទិក ខណៈភាពតានតឹងជាមួយចិននៅតែបន្ត មីស៊ីល Agni-5 របស់យោធាក្នុងពិធីដង្ហែរកន្លងមក។ រូបថត AP
× ឥណ្ឌានៅថ្ងៃទី ២៧ ខែ តុលា បានសាកល្បងមីស៊ីលបាលីស្ទិកឆ្លងទ្វីបដែលមានសមត្ថភាពពាំក្បាលគ្រាប់នុយក្លេអ៊ែរដែលអាចបាញ់បានចម្ងាយ៥ពាន់គីឡូម៉ែត្រចេញពីកោះមួយនៅឆ្នេរសមុទ្រភាគខាងកើតរបស់ខ្លួន ខណៈភាពតានតឹងនៅតាមព្រំដែនជាមួយចិននៅតែមិនធូរស្រាល។
យោងតាមសេចក្តីថ្លែងការណ៍របស់រដ្ឋាភិបាលឥណ្ឌា នៅថ្ងៃទី ២៧ ខែ តុលាឥណ្ឌាបានបាញ់សាកល្បងមីស៊ីលបាលីស្ទិកឆ្លងទ្វីបដែលមានសមត្ថភាពបំពាក់អាវុធនុយក្លេអ៊ែរដោយជោគជ័យ។ មីស៊ីល Agni-5 ដែលឥណ្ឌាអះអាងថា មានសមត្ថភាពបាញ់ចំគោលដៅយ៉ាងច្បាស់ បានបាញ់ចេញពីកោះមួយនៅឆ្នេរសមុទ្រភាគខាងកើតចូលទៅក្នុងឈូងសមុទ្រ Bengal។
សមត្ថភាពមីស៊ីលរបស់ទីក្រុងប៉េកាំងដែលកើនឡើងឥតឈប់ឈរ បានជំរុញទីក្រុងញូវដែលីឱ្យកែលម្អប្រព័ន្ធសព្វាវុធរបស់ខ្លួនក្នុងប៉ុន្មានឆ្នាំថ្មីៗនេះ។ មីស៊ីល Agni-5 នេះ ត្រូវបានគេជឿថា អាចវាយប្រហារលើទឹកដីចិនបានស្ទើរតែទាំងអស់។
គួរបញ្ជាក់ថា ឥណ្ឌាបានអភិវឌ្ឍប្រព័ន្ធនុយក្លេអ៊ែរ និងមីស៊ីលរយៈចម្ងាយមធ្យម និងរយៈចម្ងាយឆ្ងាយរបស់ខ្លួន ចាប់តាំងពីទសវត្សរ៍ឆ្នាំ១៩៩០ មក ស្របពេលការកើនឡើងនៃការប្រកួតប្រជែងជាយុទ្ធសាស្ត្រជាមួយចិន និងជាការពង្រឹងសមត្ថភាពការពាររបស់ប្រទេស។
ភាពតានតឹងរវាងចិននិងឥណ្ឌា បានផ្ទុះឡើងកាលពីឆ្នាំមុន លើបញ្ហាព្រំដែននៅតំបន់ភ្នំ Ladakh ដែលមានជម្លោះរ៉ាំរ៉ៃយូរឆ្នាំមកហើយ។ លើសពីនេះទៀត ឥណ្ឌាក៏មានការព្រួយបារម្ភចំពោះ ទីក្រុងប៉េកាំងដែលបង្កើនឥទ្ធិពលរបស់ខ្លួននៅមហាសមុទ្រឥណ្ឌា។
កន្លងមក ចិននិងឥណ្ឌាក៏បានរៀបចំកិច្ចពិភាក្សាដើម្បីបន្ធូរបន្ថយភាពតាងតឹងដែរ។ កិច្ចពិភាក្សារវាងមេបញ្ជាការកងទ័ពឥណ្ឌានិងចិនដែលបានប្រព្រឹត្តទីកាលពីខែនេះ ក្នុងគោលបំណងបន្ធូរបន្ថយភាពតានតឹងនៅតំបន់ដែលមានការប៉ះទង្គិចតាមព្រំដែន បានបញ្ចប់ដោយភាពជាប់គាំងនិងបរាជ័យក្នុងការបន្ធូរបន្ថយការប្រឈមមុខ។ ឥណ្ឌានិងចិនមានជម្លោះនៅតាមបណ្ដោយព្រំដែនចាប់ផ្តើមឡើងតាំងពីចប់សង្រ្គាមតាំងពីឆ្នាំ១៩៦២ មកទល់បច្ចុប្បន្ន៕
© រក្សាសិទ្ធិដោយ thmeythmey.com