អន្តរជាតិ
ការរាលដាលអូមីក្រុង នាំឲ្យជប៉ុនសម្រេចហាមអ្នកដំណើរបរទេសចូលប្រទេសខ្លួនសារជាថ្មី
ជប៉ុនហាមឃាត់សារជាថ្មីអ្នកដំណើរបរទេសដើម្បីទប់ស្កាត់ការរាលដាលអូមីក្រុង។ រូបថត Xinhua
×![]()
ដោយ: សារព័ត៌មានថ្មីៗ
រដ្ឋាភិបាលជប៉ុន នាថ្ងៃចន្ទ ទី២៩ ខែវិច្ឆិកា នេះ បានប្រកាសពីការហាមប្រាមអ្នកដំណើរបរទេសចូលទៅទឹកដីរបស់ខ្លួនសារជាថ្មី ដើម្បីទប់ស្កាត់ការរាលដាលវីរុសកូវីដ-១៩ បំប្លែងថ្មី អូមីក្រុង។ នេះបើតាមការផ្សាយរបស់ AFP ដោយការហាមប្រាមនឹងអនុវត្តចាប់ពីថ្ងៃអង្គារ។
ទើបតែបន្ធូរបន្ថយការរឹតត្បឹតរបស់ខ្លួនមិនទាន់ដល់បីសប្តាហ៍ផង ជប៉ុនសម្រេចបិទព្រំដែន និងហាមឃាត់វត្តមានទេសចរបរទេសសារជាថ្មីនៅទឹកដីរបស់ខ្លួន ខណៈវីរុសអូមីក្រុង ដែលរកឃើញដំបូងនៅអាហ្វ្រិកខាងត្បូង បន្តធ្វើដំណើររីករាលដាលទៅកាន់បណ្តាប្រទេសនានាលើពិភពលោក។
«យើងនឹងហាមឃាត់សារជាថ្មីចំពោះការចូលរបស់ភ្ញៀវបរទេសពីពាសពេញពិភពលោកចាប់ពីថ្ងៃទី៣០ ខែវិច្ឆិកា តទៅ»។ នេះជាការប្រកាសរបស់លោកនាយករដ្ឋមន្ត្រីជប៉ុន Fumio Kishida ដោយបន្ថែមថា ជនជាតិជប៉ុនដែលធ្វើដំណើរមកពីប្រទេសចំនួន៩នៅអាហ្វ្រិក និងប្រទេសមួយចំនួន ក៏នឹងត្រូវស្ថិតក្រោមវិធានចត្តាឡីស័កយ៉ាងតឹងរ៉ឹងផងដែរ។
មុនពេលសម្រេចហាមឃាត់អ្នកដំណើរបរទេស រដ្ឋាភិបាលជប៉ុនបានបង្កើតពេលដល់១០ថ្ងៃសម្រាប់វិធានចត្តាឡីស័កនៅសណ្ឋាគារចំពោះអ្នកដំណើរដែលមកពីអាហ្វ្រិកខាងត្បូង បុតស្វាណា ឡេសូតូ ណាមីប៊ី និងស៊ីមបាវ៉េ រួមទាំងចាប់ផ្តើមរឹតបន្តឹងអ្នកដំណើរពីម៉ាឡាវី ម៉ូសំប៊ិក និងសំប៊ី ផងដែរ។
រកឃើញដំបូងនៅអាហ្វ្រិកខាងត្បូង វីរុសបំប្លែងថ្មីអូមីក្រុងដែលអង្គការសុខភាពពិភពលោក (WHO) ព្រួយបារម្ភថា មានគ្រោះថ្នាក់ខ្លាំងជាងមុន បានបន្តរាលដាលនៅបណ្តាប្រទេសផ្សេងៗ ដូចជា បុតស្វាណា ហូឡង់ ហុងកុង អូស្ត្រាលី អាល្លឺម៉ង់ ចក្រភពអង់គ្លេស ដាណឺម៉ាក កាណាដា អ៊ីស្រាអែល អ៊ីតាលី បែលហ្ស៊ិក សាធារណរដ្ឋឆែក និងអូទ្រីសជាច្រើន៕
Tag:
COVID-19
© រក្សាសិទ្ធិដោយ thmeythmey.com
«ទាយជ្ជទាន»មានន័យដូចម្តេច?
1 សប្តាហ៍
