កីឡាអន្តរជាតិ
អន្តរជាតិ
ថៃ និងឥណ្ឌូណេស៊ី គ្មានសិទ្ធិប្រើទង់ជាតិខ្លួនក្នុងព្រឹត្តិការណ៍ AFF Suzuki Cup 2020 ក្រុមជម្រើសជាតិថៃ ឈ្នះទីម័រខាងកើត ២ ទល់នឹង ០ នាជំនួបកាលពីថ្ងៃអាទិត្យ
× ក្នុងព្រឹត្តិការណ៍ AFF Suzuki Cup នេះ ថៃ និងឥណ្ឌូណេស៊ី គ្មានសិទ្ធិប្រើប្រាស់ទង់ជាតិ ឬភ្លេងជាតិរបស់ខ្លួននោះឡើយ។ ប្រទេសទាំងពីរក៏ដូចជាកូរ៉េខាងជើង ត្រូវបានទីភ្នាក់ងារប្រឆាំងសារធាតុលើកកម្លាំងពិភពលោក (WADA) មិនបានអនុលោមក្រមប្រឆាំងសារធាតុញៀនលើពិភពលោក (World Anti-Doping Code)។
ថៃ ឥណ្ឌូណេស៊ី កូរ៉េខាងជើង និងស្ថាប័នកីឡាពីរទៀត ប្រឈមនឹងការពិន័យដ៏តឹងរ៉ឹងពីសំណាក់ WADA ដោយសារតែមិនគោរពតាមច្បាប់ប្រឆាំងការប្រើប្រាស់សារធាតុញៀនឲ្យពេញលេញ នាឆ្នាំ២០២១ នេះ។ តាមសេចក្តីសម្រេចរបស់ WADA កាលពីថ្ងៃទី៧ ខែតុលា ប្រទេសទាំងបី គ្មានសិទ្ធិរៀបចំព្រឹត្តិការណ៍កីឡាថ្នាក់តំបន់ ទ្វីប ឬជើងឯកពិភពលោកនោះឡើយ នាអំឡុងរយៈពេល១ឆ្នាំ រហូតដល់ពួកគេមានការប្តេជ្ញាចិត្តសារជាថ្មី។
ជាមួយគ្នានេះ ការប្រើប្រាស់ទង់ជាតិ និងភ្លេងជាតិសម្រាប់ព្រឹតិការណ៍កីឡាធំៗ មិនត្រូវបានអនុញ្ញាតនោះឡើយ។ ការហាមប្រាមនេះ មានន័យថា ឥណ្ឌូណេស៊ី និងថៃ មិនអាចប្រើប្រាស់ទង់ជាតិ ក៏ដូចជាភ្លេងជាតិខ្លួន ក្នុងព្រឹត្តិការណ៍ AFF Suzuki Cup ក៏ដូចជា ស៊ីហ្គេមនៅក្រុងហាណូយ បានឡើយ។
តំណាងពីស្ថាប័នកីឡាថៃ ឥណ្ឌូណេស៊ី និងកូរ៉េខាងជើង គ្មានសិទ្ធិឈរលើវេទិកានៃការរៀបចំប្រកួតកីឡា ឬព្រឹត្តិការណ៍ដែលរៀបចំដោយ WADA នោះឡើយ ហើយពួកគេក៏មិនមានសមាជិកនៅក្នុងគណៈកម្មការណាមួយរបស់ WADA នោះដែរ។
បច្ចុប្បន្ន ស្ថាប័នជាតិប្រឆាំងសារធាតុលើកកម្លាំងរបស់សហគមន៍បែលហ្ស៊ិកនិយាយភាសាអាល្លឺម៉ង់, ម៉ុងតេណេហ្គ្រោ និងរូម៉ានី ក៏ត្រូវបាន WADA ព្រមានផងដែរ ដោយតម្រូវឲ្យពួកគេផ្តល់ភស្តុតាងបន្ថែម នាអំឡុងពេល៤ខែ ដោយគិតចាប់តាំងពីថ្ងៃទី១៤ ខែកញ្ញា។
តាមពិតទៅ ថៃ និងឥណ្ឌូណេស៊ី បានតវ៉ាចំពោះការសម្រេចចិត្តនេះ ដោយស្នើឲ្យ WADA ពិចារណាសារជាថ្មី។ អាជ្ញាធរកីឡាថៃ បានអះអាងថា ខ្លួនបានបញ្ចប់វិសោធនកម្មបទប្បញ្ញត្តិប្រឆាំងសារធាតុញៀនរួចហើយ ប៉ុន្តែមិនទាន់ចេញផ្សាយផ្លូវការដោយសារបញ្ហាដំណើរការច្បាប់ផ្ទៃក្នុង។
រីឯឥណ្ឌូណេស៊ីវិញ លោករដ្ឋមន្ត្រីកីឡា Zainudin Amali បានលើកឡើងពីវិបត្តិកូវីដ-១៩ ដែលរារាំងស្ថាប័នជំនាញរបស់លោកក្នុងការបញ្ជូនសំណៅឯកសារទៅកាន់ WADA ឲ្យបានទាន់ពេលវេលា៕
© រក្សាសិទ្ធិដោយ thmeythmey.com