ជាតិ
សម្តេច ហ៊ុន សែន ទូន្មានឪពុកម្តាយកុំហែកហួរគ្នាតាមហ្វេសប៊ុកក្រោយលែងលះ គួរទុកកិត្តិយសឲ្យកូន
× នាពិធីប្រគល់ប្រាក់រង្វាន់ដល់ម្ចាស់មេដាយមាសប៉េតង់ អ៊ុក ស្រីមុំ និងលោក សុខ ម៉ុង ដែលជាគ្រូបង្វឹកនៅវិមានសន្តិភាព សម្តេចនាយករដ្ឋមន្ត្រី ហ៊ុន សែន បានបង្ហាញពីការកត់សម្គាល់របស់ខ្លួន ទាក់ទងនឹងការហែកហួរគ្នាតាមហ្វេសប៊ុករបស់គូស្រករមួយចំនួន ក្រោយការលែងលះគ្នា។
«តើកិត្តិយសកូន វាទៅអ្វី ចំណុចនៅត្រង់កន្លែងហ្នឹង»។ សម្តេចនិយាយបែបអង្វរក ដល់គូស្វាមីភរិយា ដែលចូលចិត្តនិយាយបរិហារគ្នាតាមហ្វេសប៊ុកក្រោយការលែងលះ ដោយសម្តេចកត់សម្គាល់ឃើញមានចំនួនកាន់តែច្រើននៅភ្នំពេញ។
នៅចំឱកាសខួប៤៦ឆ្នាំនៃអាពាហ៍ពិពាហ៍របស់ខ្លួន ប្រមុខរដ្ឋាភិបាល ស្នើដល់គូស្នេហ៍បែកបាក់ថា បើមិនត្រូវគ្នា គួរចែកផ្លូវស្ងៀមស្ងាត់ ដោយទុករាប់អានគ្នាទៅថ្ងៃក្រោយ ជាពិសេសការទុកកិត្តិយសឲ្យកូនៗ។
«គេមើលងាយយើងឥឡូវ ប៉ុន្តែគេបន្តមើលងាយកូនទៅថ្ងៃក្រោយ»។ សម្តេចបានលើកឡើងយ៉ាងដូច្នេះ ដោយបញ្ជាក់ថា រូបភាពវីដេអូហែកហួរគ្នាតាមហ្វេសប៊ុក នឹងមិនងាយផុតរលត់ឡើយ៕
© រក្សាសិទ្ធិដោយ thmeythmey.com