COVID-19
អន្តរជាតិ
ក្រុមហ៊ុន Moderna ចាប់ផ្ដើមសាកល្បងដូសជំរុញសម្រាប់ប្រឆាំងវីរុសបំប្លែងអូមីក្រុង
× ក្រុមហ៊ុនជីវបច្ចេកវិទ្យាអាម៉េរិក Moderna នៅថ្ងៃទី២៦ ខែមករា បានប្រកាសពីការចាប់ផ្ដើមការតេស្តដូសជំរុញដែលត្រូវបានផលិតឡើងជាពិសេសដើម្បីប្រឆាំងវីរុសបំប្លែងខ្លួនថ្មីអូមីក្រុង។
ការសាកល្បងសាកល្បងពិសេសសម្រាប់ប្រឆាំងវីរុសអូមីក្រុងរបស់ក្រុមហ៊ុន Moderna នឹងរួមបញ្ចូលមនុស្សពេញវ័យចំនួន៦០០នាក់។ អ្នកចូលរួមពាក់កណ្តាល ត្រូវទទួលវ៉ាក់សាំងបង្ការជំងឺកូវីដ-១៩ របស់ក្រុមហ៊ុន Moderna ចំនួន២ដូសរួចយ៉ាងហោចណាស់ប្រាំមួយខែមុន ឯពាក់កណ្តាលទៀតបានទទួលដូសទី៣។ ដូច្នេះ ដូសជំរុញដែលផលិតឡើងនេះ នឹងអាចប្រើប្រាស់ជាដូសជំរុញទី៣ ឬដូសជំរុញទី៤។
លើសពីនេះ ក្រុមហ៊ុនផលិតវ៉ាក់សាំងមួយនេះក៏បានរាយការណ៍ពីប្រសិទ្ធភាពនៃដូសជំរុញ ឬដូសទី៣របស់ខ្លួនដែលត្រូវបានអនុញ្ញាតឱ្យប្រើប្រាស់កន្លងមកផងដែរ។ បើតាមទីភ្នាក់ងារព័ត៌មាន AFP របាយការណ៍របស់ Moderna បញ្ជាក់ថា រយៈពេលប្រាំមួយខែបន្ទាប់ពីការចាក់ដូសជំរុញ កម្រិត អង់ទីករប្រឆាំងនឹងវីរុសអូមីក្រុងធ្លាក់ចុះ៦ដងពីកម្រិតខ្ពស់បំផុត។ ទោះជាយ៉ាងណា ក្រុមហ៊ុននេះ នៅតែប្ដេជ្ញាពង្រឹងសមត្ថភាពរបស់ខ្លួន។
«ដោយសារការគំរាមរយៈពេលវែងដែលបង្ហាញដោយការគេចចេញពីភាពស៊ាំរបស់វីរុសអូមីក្រុង យើងកំពុងបង្កើនសមត្ថភាព ដូសជំរុញថ្មីរបស់យើងដែលផលិតឡើងដើម្បីប្រឆាំងនឹងវីរុសអូមីក្រុង»។ លោក Stephane Bancel នាយកប្រតិបត្តិរបស់ Moderna លើកឡើងបែបនេះ មុនបានបន្តថា ក្រុមហ៊ុនកំពុងចាប់ផ្ដើមការសិក្សាដំណាក់កាលទីពីរចំពោះដូសជំរុញសម្រាប់ទប់ទល់នឹងវីរុសអូមីក្រុងនេះ។
ការប្រកាសរបស់ក្រុមហ៊ុន Moderna ធ្វើឡើងមួយថ្ងៃបន្ទាប់ពីក្រុមហ៊ុនឱសថ Pfizer បានប្រកាសថា ពួកគេបានចាប់ផ្តើមការចុះឈ្មោះសម្រាប់ការ ពិសោធវ៉ាក់សាំងដែលផលិតឡើងពិសេសសម្រាប់ប្រឆាំងវីរុសអូមីក្រុងដែរ។ វ៉ាក់សាំងរបស់ក្រុមហ៊ុនទាំងពីរសុទ្ធតែផ្អែកលើបច្ចេកវិទ្យានាំសារ RNA ដែលធ្វើឱ្យវាមានភាពងាយស្រួលក្នុងការធ្វើឱ្យប្រព័ន្ធភាពស៊ាំសម្របខ្លួននឹងវីរុសបំប្លែងខ្លួនថ្មីណាមួយ៕
© រក្សាសិទ្ធិដោយ thmeythmey.com