អន្តរជាតិ
លោក ពូទីន ចោទលោកខាងលិចថា កំពុងព្យាយាមអូសរុស្ស៊ីឱ្យធ្លាក់ចូលសង្គ្រាម ប្រធានាធិបតីរុស្ស៊ី វ៉ា្លឌីមៀ ពូទីន នាសន្និសីទសារព័ត៌មានជាមួយនាយករដ្ឋមន្រ្តីហុងគ្រី។ រូបថត AFP
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី១ ខែកុម្ភៈ បានចោទបណ្ដាប្រទេសលោកខាងលិចថាបានបង្កើតសេណារីយ៉ូដោយចេតនាដោយមានបំណងអូសទាញរុស្ស៊ីឱ្យធ្លាក់ចូលក្នុងសង្គ្រាម។ លោក ពូទីន ក៏អះអាងថា បស្ចិមលោក មិនអើពើពីការព្រួយបារម្ភផ្នែកសន្តិសុខរបស់រុស្ស៊ី ក្នុងរឿងអ៊ុយក្រែនទៀតផង។
ខណៈដែលវិបត្តិអ៊ុយក្រែនតានតឹងខ្លាំង លោក វ៉ា្លឌីមៀ ពូទីន មិនបានថ្លែងជាសាធារណៈអ្វីច្រើនអំពីវិបត្តិនេះឡើយ ដែលបានបន្សល់ទុកភាពមិនច្បាស់លាស់អំពីជំហរផ្ទាល់ខ្លួនរបស់លោក ខណៈអ្នកការទូតរុស្ស៊ី និងលោកខាងលិចបានចូលរួមក្នុងកិច្ចចរចាម្តងហើយម្តងទៀត។ អំឡុងសន្និសីទកាសែតថ្ងៃទី១ ខែកុម្ភៈ ជាមួយនាយករដ្ឋមន្ត្រីហុងគ្រី មេដឹកនាំរុស្ស៊ីរូបនេះ ប្រើពាក្យសម្ដីខ្លាំងដាក់លោកខាងលិចដែលលោកយល់ថា មិនសម្របសម្រួលការទាមទារផ្នែកសន្តិសុខដែលរុស្ស៊ីបានស្នើ។
«មកដល់ពេលនេះ វាច្បាស់ណាស់ដែលថា ការព្រួយបារម្ភជាមូលដ្ឋានរបស់រុស្ស៊ីមិនត្រូវបានអើពើនោះឡើយ»។ លោក ពូទីន បញ្ជាក់បែបនេះ រួចបន្តថា បើអ៊ុយក្រែនអាចត្រូវបញ្ចូលជាសមាជិកសម្ព័ន្ធណាតូនោះ ការគំរាមកំហែងសន្តិសុខរុស្ស៊ីនឹងរឹតតែកើនឡើង ហើយរុស្ស៊ីប្រហែលនឹងត្រូវធ្វើសង្គ្រាមជាមួយណាតូទៀតផង។ លោក ពូទីន ក៏បានលើកឡើងថា ទីក្រុង វ៉ាស៊ីនតោនមិនដែលខ្វល់ខ្វាយនឹងសន្តិសុខអ៊ុយក្រែនជាចម្បងឡើយ ប៉ុន្តែអ្វីដែលប្រទេសមួយនេះចង់បាន គឺការទប់ស្កាត់ឥទ្ធិពលរុស្ស៊ីប៉ុណ្ណោះ។
និយាយមិនទុកឱ្យលោកខាងលិចអ្វីបន្តិច លោក ពូទីន បានរិះគន់សម្ព័ន្ធណាតូទៀតថា ពួកគេបានប្រើប្រាស់អ៊ុយក្រែនជាឧបករណ៍ដើម្បីសម្រេចផលប្រយោជន៍។ បន្ថែមពីនេះ ប្រមុខរដ្ឋរុស្ស៊ី ប្រាប់អ្នកកាសែតទៀតថា អាម៉េរិក និងលោកខាងលិច កំពុងប្រើប្រាស់មធ្យោបាយផ្សេងៗដើម្បីទាញរុស្ស៊ីធ្លាក់ចូលក្នុងជម្លោះប្រដាប់អាវុធ ហើយដោយមានទាំងការជ្រោមជ្រែងពីសម្ព័ន្ធមិត្តអាម៉េរិក និងការគ្រោងដាក់ទណ្ឌកម្មយ៉ាងឃោរឃៅដើម្បីប្រឆាំងនឹងរុស្ស៊ីទៅទៀត។
យ៉ាងណាមិញ នាយករដ្ឋមន្ត្រីហុងគ្រី Victor Orban ជឿជាក់ថា លោកខាងលិច និងរុស្ស៊ីអាចនឹងមានផ្លូវដើម្បីសម្របសម្រួលគ្នាដើម្បីរក្សាសន្តិសុខរបស់ភាគីទាំងអស់។
នៅថ្ងៃដដែល ប្រមុខការទូតរុស្ស៊ី និងអាម៉េរិកក៏ជួបជជែកតាមទូរស័ព្ទ។ រដ្ឋមន្ត្រីការបរទេសរុស្ស៊ី Sergei Lavrov លើកឡើងថា សមភាគីអាម៉េរិក អាន់តូនី ប្លីងខិន បានយល់ស្របពីតម្រូវការដើម្បីពិភាក្សាអំពីបញ្ហានេះបន្ថែមទៀត តែទាមទារឱ្យ ទីក្រុងមូស្គូដកទ័ពថយពីអ៊ុយក្រែន ប្រសិនបើមិនមានបំណងឈ្លានពាននោះទេ៕
Tag:
រុស្ស៊ី
អ៊ុយក្រែន
អាម៉េរិក
© រក្សាសិទ្ធិដោយ thmeythmey.com