«ទិសដៅដែលសំខាន់បំផុតនោះ គឺនាំមកជូនមីយ៉ាន់ម៉ានូវលទ្ធិប្រជាធិបតេយ្យ»។ នេះជាប្រសាសន៍របស់សម្តេច ហ៊ុន សែន ទៅកាន់លោក យូហ៊ី សាសាកាវ៉ា។ ជាមួយគ្នានេះ សម្តេច បានអរគុណលោក យូហ៊ី សាសាកាវ៉ា ចំពោះពាក្យពេចន៍ដ៏ល្អរបស់លោក ជុំវិញដំណើរទស្សនកិច្ចរបស់សម្តេចទៅកាន់មីយ៉ាន់ម៉ានាពេលកន្លងមក។ សម្តេច ថ្លែងថា សម្តេច និងលោក យូហ៊ី សាសាកាវ៉ា មានចំណាប់អារម្មណ៍ដូចគ្នា គឺការបញ្ឈប់អំពើហិង្សានៅមីយ៉ាន់ម៉ា រួមទាំងនាំអំណោយមនុស្សធម៌ជូនដល់ប្រជាជនមីយ៉ាន់ម៉ា។ 

 

លោក យូហ៊ី សាសាកាវ៉ា គាំទ្រដំណើរទស្សនកិច្ចរបស់សម្ដេច ទៅកាន់មីយ៉ាន់ម៉ាកាលពីពេលកន្លងទៅ។ លោក ចាត់ទុកដំណើរទស្សនកិច្ចរបស់ប្រមុខរដ្ឋាភិបាលកម្ពុជា​ទៅមីយ៉ាន់ម៉ា ថាជាសកម្មភាព ដែលធ្វើឡើងដោយអស់ពីចិត្ត។ លើសពីនេះ លោក មើលឃើញថា ដំណើរទស្សនកិច្ចនេះ ជាសកម្មភាព ដែលទទួលបានការគោរពផង និងផ្ដល់ក្តីសង្ឃឹមកាន់តែធំផង ទៅដល់ប្រជាជនមីយ៉ាន់ម៉ា។

 

បេសកជនពិសេសរបស់រដ្ឋាភិបាលជប៉ុន ជូនពាក្យមួយឃ្លាដល់ប្រមុខរដ្ឋាភិបាលកម្ពុជាថា៖«ជំនួប១០០ដង មិនស្មើនឹងសកម្មភាព១ដងឡើយ នោះគឺដំណើរទស្សនកិច្ចរបស់សម្ដេចទៅកាន់មីយ៉ាន់ម៉ា បានបើកទ្វា ដែលចាក់សោ [បិទ] »។  

 

សម្តេច ហ៊ុន សែន បង្ហាញការប្តេជ្ញាថា ក្នុងនាមជាប្រធានអាស៊ានឆ្នាំ២០២២ សម្ដេច នឹងខិតខំបន្តការងារជួយរកដំណោះស្រាយនៅមីយ៉ាន់ម៉ា។ មេដឹកនាំកម្ពុជារូបនេះ បានស្នើលោក យូហ៊ី សាសាកាវ៉ា ឲ្យធ្វើការជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា និងជាបេសកជនពិសេសរបស់ប្រធានអាស៊ាន លើបញ្ហាមីយ៉ាម៉ា។ 

 

ក្នុងឋានៈជាបេសជនពិសេសរបស់ប្រធានអាស៊ាន លោក ​ប្រាក់ សុខុន នឹងទៅមីយ៉ាន់ម៉ា ពីថ្ងៃទី២០ ដល់ថ្ងៃទី២៣ ខែមីនា ឆ្នាំ២០២២។ កាលពីដើមខែមករា ឆ្នាំ២០២២ លោក បានអមដំណើរសម្តេច ហ៊ុន សែន ទៅកាន់មីយ៉ាន់ម៉ា។ ក្នុងដំណើរទស្សនកិច្ចនាពេលនោះ មេដឹកនាំកម្ពុជា ស្នើឲ្យរបបយោធាមីយ៉ាន់ម៉ា បញ្ឈប់ការបាញ់គ្នា។ ទោះរបបយោធាមីយ៉ាន់ម៉ា យល់ព្រមជាមួយមេដឹកនាំកម្ពុជា ក្នុងការពន្យារពេលឈប់បាញ់ក្តី តែស្ថានភាពជាក់ស្តែង គេ នៅតែឃើញមានការផ្ទុះអាវុធនៅមីយ៉ាន់ម៉ាដដែល។ 

 

ការជួយស្វែងរកដំណោះស្រាយនៅមីយ៉ានម៉ា គឺជាបន្ទុក និងជាការទទួលខុសត្រូវដ៏ធំ១របស់កម្ពុជា ក្នុងឋានៈជាប្រធានអាស៊ានឆ្នាំ២០២២៕