ភ្នំពេញ៖ ការបៀតបៀនផ្លូវភេទ គឺសម្ដៅលើសកម្មភាព ពាក្យសម្ដី និងកាយវិការណា ដែលធ្វើឱ្យអ្នកផ្សេងមានអារម្មណ៍មិនមានសុវត្ថិភាព ទាំងផ្លូវចិត្ត និងប៉ះពាល់ដល់រូបរាងកាយរបស់ពួកគេ។ ការបំពានផ្លូវភេទ មានច្រើនរូបភាព ហើយកើតឡើងលើមនុស្សជាច្រើននាពេលបច្ចុប្បន្ន។

ក្មេងស្រី ស្ត្រី ​និងអ្នកស្រឡាញ់ភេទដូចគ្នា ជាមនុស្សដែលងាយនឹងត្រូវបានគេបៀតបៀនផ្លូវភេទច្រើនជាងគេ ។ ក្រុមមនុស្សងាយរងគ្រោះទាំងនេះ ត្រូវបានគេបៀតបៀនផ្លូវភេទច្រើន តាមរយៈពាក្យសម្ដី កាយវិការ និងលើបណ្ដាញសង្គម។

នេះបើតាមការស្រាវជ្រាវរបស់កញ្ញា បុណ្យ រចនា នាយិកាអង្គការក្លាហាន។ ជុំវិញការបៀតបៀនផ្លូវភេទនេះ កញ្ញា រចនា ដែលធ្វើការងារច្រើនលើបញ្ហានេះ បានស្នើឱ្យមនុស្សគ្រប់គ្នា និងអ្នកធ្វើការផ្លូវច្បាប់​ យកចិត្តទុកដាក់លើការបញ្ឈប់ការបៀតបៀនគ្រប់រូបភាព​ និងគ្រប់មនុស្សទាំងអស់ ដោយជៀសវាងគិតថា ការបៀតបៀនផ្លូវភេទ ជារឿងធម្មតា ឬជារឿងលេងសើច។