ចាប់តាំងពីរុស្ស៊ីបើកប្រតិបត្តិឈ្លានពានចូលអ៊ុយក្រែន អូស្រ្តាលីមិនបង្អង់យូរឡើយលើការដាក់ទណ្ឌកម្មសេដ្ឋកិច្ចលើប្រទេសនេះ។ រដ្ឋាភិបាលអូស្រ្តាលី បាននិយាយនៅក្នុងសេចក្តីថ្លែងការណ៍រួមមួយថា ៖« រុស្ស៊ី បានពឹងផ្អែកការនាំចូលអាលុយមីនីញ៉ូមប្រមាណ២០ភាគរយពីអូស្ត្រាលី»។ វិធានការនេះ នឹងជួយរឹតត្បិតសមត្ថភាពរបស់រុស្ស៊ីក្នុងការផលិតសារធាតុអាលុយមីញ៉ូម ដែលជាសារធាតុដ៏សំខាន់សម្រាប់ការនាំចេញរបស់រុស្ស៊ី។

 

ក្នុងសេចក្តីថ្លែងការណ៍ដដែល​នេះ ​ ​រដ្ឋាភិបាលអូស្ត្រាលី នឹងធ្វើការយ៉ាងជិតស្និទ្ធជាមួយម្ចាស់ក្រុមហ៊ុននាំចេញ និងស្ថាប័នកំពូល ដែលរងផលប៉ះពាល់ពីការបិទនាំចេញនេះ ហើយខ្លួននឹងស្វែងរកទីផ្សារថ្មី និងពង្រីកទីផ្សារដែលមានស្រាប់។

 

នៅសប្តាហ៍មុន អូស្រា្តលី ​បានដាក់ទណ្ឌកម្មលើបុគ្គលជំនួញរុស្ស៊ីពីររូបដែលជាប់ទាក់ទងនឹងឧស្សាហកម្មរ៉ែ។ មកទល់ពេលនេះ អូស្រ្តាលីបានដាក់ទណ្ឌកម្មលើជនជាតិរុស្ស៊ីសរុប ៤៤៣នាក់ រួមទាំងអ្នកជំនួញដ៏ជិតស្និទ្ធជាមួយប្រធានាធិបតីរុស្ស៊ី  វ្ល៉ាឌីមៀ ពូទីន និងស្ថាប័នចំនួន ៣៣ ផ្សេងទៀតដោយភាគច្រើនជាធនាគារ និងស្ថាប័នដែលទទួលខុសត្រូវលើប្រាក់កម្ចីរបស់ប្រទេស។ នេះបើតាមការចុះផ្សាយពីទីភ្នាក់ងារ​ Reuters ។

 

រដ្ឋាភិបាលអូស្រ្តាលី បានបន្តថា​ ខ្លួននឹងបរិច្ចាគធ្យូងថ្មប្រមាណ ៧ម៉ឺនតោន ដល់អ៊ុយក្រែន ដើម្បីបំពេញតម្រូវការថាមពលដែលកំពុងរងវិបត្តិ។ ប៉ុន្មានសប្តាហ៍ចុងក្រោយនេះ អូស្រ្តាលីដែលជាប្រទេសនាំចេញធ្យូងថ្មច្រើនជាងគេ ត្រូវបានអំពាវនាវឱ្យជួយផ្គត់ផ្គង់ធ្យូងថ្មទៅកាន់បណ្តាប្រទេសដូចជាអ៊ុយក្រែន និងប៉ូឡូញដែលធ្លាប់តែពឹងផ្អែកប្រភពពីរុស្ស៊ី ។ ក្រុមហ៊ុនធ្យូងថ្ម​ Whitehaven កំពុងរៀបចំដឹកជញ្ជូនយ៉ាងឆាប់រហ័ស ហើយឥឡូវនេះ។ ជាមួយគ្នានេះ​​ រដ្ឋាភិបាលអូស្រ្តាលី បានសន្យាបន្ថែមជំនួយសម្ភារយោធា និងជំនួយមនុស្សធម៌សម្រាប់អ៊ុយក្រែនផងដែរ៕