ស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន (UNHCR) នៅថ្ងៃទី២៤ ខែ មេសា រាយការណ៍ថា រយៈពេលពីរខែដែលរុស្ស៊ីបានលុកលុយលើអ៊ុយក្រែន ប្រជាជនប្រមាណ៥,២លាននាក់បានភៀសខ្លួនចេញពីប្រទេសទៅប្រទេសជិតខាងដើម្បីស្វែងរកកន្លែងសុវត្ថិភាព។ ចំណែកប្រជាជនអ៊ុយក្រែនដែលភៀសខ្លួនក្នុងប្រទេសមានជាង៧,៧លាននាក់។
យោងតាមទិន្នន័យរបស់ UNHCR គិតត្រឹមថ្ងៃទី២៤ ខែមេសា ជនភៀសខ្លួនចេញពីអ៊ុយក្រែនដោយសារតែសង្គ្រាមមានរហូតដល់៥,២លាននាក់ ដែលចំនួននេះកើនលើសទិន្នន័យកាលពីថ្ងៃទី២៣ ខែមេសារហូតប្រមាណ២ម៉ឺននាក់។ ក្នុងចំណោមនោះ ប្រជាជនអ៊ុយក្រែនចំនួន១,១លាននាក់ បានចាកចេញពីប្រទេសអំឡុងខែមេសា។
បន្ថែមពីនេះ ជាង៩០ភាគរយនៃជនភៀសខ្លួន៥,២លាននាក់នេះគឺជាស្ត្រី និងកុមារ ខណៈដែលបុរសចាប់ពី១៨ឆ្នាំទៅ៦០ឆ្នាំត្រូវបានតម្រូវឱ្យចូលបម្រើកងទ័ព និងមិនត្រូវបានអនុញ្ញាតឱ្យចេញពីប្រទេសនោះឡើយ។ UNHCR ក៏បានបញ្ជាក់ចំនួនជនភៀសខ្លួនដែលកើនឡើងនៅប្រទេសជិតខាងនីមួយៗដែរ។ ប៉ូឡូញបានទទួលជនភៀសខ្លួនអ៊ុយក្រែនយ៉ាងហោច២,៨លាននាក់, រូម៉ានី៧៧ម៉ឺននាក់, រុស្ស៊ី៥៧ម៉ឺននាក់, ហុងគ្រី៤៨ម៉ឺននាក់, ម៉ុលដាវី៤៣ម៉ឺននាក់, ស្លូវ៉ាគី៣៥ម៉ឺននាក់ និងបេឡារុស២ម៉ឺននាក់។
ជុំវិញរឿងនេះ ប្រមុខទីភ្នាក់ងារ UNHCR លោក Filippo Grandi បានបង្ហោះសារលើបណ្ដាញសង្គម Twitter ថា ខណៈសង្គ្រាម និងការបង្ហូរឈាមនៅតែបន្តប្រជាជនអ៊ុយក្រែន និងប្រជាជនទាំងអស់ដែលត្រូវបានបង្ខំឱ្យចាកចេញពីប្រទេសកំពុងតែជួបភាពភ័យខ្លាច, ទុក្ខព្រួយ, ការបាត់បង់ និងការបែកគ្នាពីមនុស្សជាទីស្រឡាញ់។ លោក Grandi ក៏បានជូនពរឱ្យពួកគេអាចបន្តការរស់នៅដោយមានសុវត្ថិភាពទៅមុខទៀតផងដែរ។
ក្រៅពីនេះ អង្គការអន្តរជាតិចំណាកស្រុក (IOM) ក៏បានបញ្ជាក់ ថា ក្រៅពីជនភៀសខ្លួនអ៊ុយក្រែន៥,២លាននាក់ខាងលើ ពលរដ្ឋចំនួន២១ម៉ឺននាក់ដែលភាគច្រើនជានិស្សិតបរទេស និងពលករចំណាកស្រុកក៏បានភៀសខ្លួនទៅកាន់ប្រទេសអ៊ុយក្រែនជិតខាងផងដែរតាំងពីថ្ងៃទី២៤ ខែកុម្ភៈមក។ ចំណែកឯក្នុងស្រុកវិញ IOM ប៉ាន់ស្មាន ថាប្រជាជន៧,៧លាននាក់បានចាកចេញពីលំនៅឋានរបស់ពួកគេតែកំពុងស្ថិតនៅអ៊ុយក្រែននៅឡើយ៕