«នៅក្នុងទិដ្ឋភាពសង្រ្គាមដែលកំពុងកើតមាននៅអ៊ុយក្រែន ការប្រើអំពើហិង្សាលើជន​ស៊ីវិល និងកុមារ បានកើតឡើងដោយសារជម្លោះដ៏តានតឹងនេះ។ វានឹងក្លាយ​ជាស្ថានភាពគួរ​ឱ្យ​ព្រួយ​បារម្ភ​ដែល​ផ្ដល់​ផលប៉ះពាល់ភ្លាមៗ ហើយគួរតែដាក់បញ្ចូលក្នុង​របាយការណ៍ឆ្នាំក្រោយ»។ អគ្គលេខាធិការ UN  អាន់​តូ​នី​ញ៉ូ ហ្គូ​តេ​រ៉េស បានបញ្ជាក់បែបនេះក្នុងរបាយ​ការណ៍ស្តីពីកុមារ និង​ជម្លោះប្រដាប់អាវុធឆ្នាំ២០២២ ចេញថ្ងៃទី១១ ខែកក្កដា ជាមួយនឹងការបង្គាប់ឱ្យស៊ើបអង្កេតករណីបំពានលើកុមារ​អ៊ុយក្រែន​។
 

ការបញ្ជាឱ្យស៊ើបអង្កេតករណីកុមារដែលរងគ្រោះនៅអ៊ុយក្រែនធ្វើឡើងក្រោយ ឧត្តមស្នង​ការអង្គការសហ​ប្រជាជាតិទទួលបន្ទុកសិទ្ធិមនុស្ស (UNHCHR) លោកស្រី Michelle Bachelet អះអាងថា ការិយាល័យលោកស្រីប្រមូលបានព័ស្តុតាងដែលបង្ហាញថារុស្ស៊ី​ប្រព្រឹត្តឧក្រិដ្ឋកម្មសង្គ្រាម ដោយសម្លាប់មនុស្សខុសច្បាប់។
 

កន្លងមក ក្រុមអ្នកស៊ើបអង្កេតរបស់អង្គការសហប្រជាជាតិបានរកឃើញសាកសពជន​ស៊ីវិលជាង១​ពាន់នាក់នៅទីក្រុងកៀវ។ ចំណែកអង្គការមូលនិធិកុមាររបស់អង្គការសហ​ប្រជាជាតិ (UNICEF) អះអាងថា កុមារប្រហែលពីរភាគបីនៃកុមារអ៊ុយក្រែន ត្រូវ​ភៀសខ្លួនតាំងពី​សង្គ្រាមចាប់ផ្ដើម​ក្នុង​ខែកមុ្ភៈ​មក។ ជាមួយគ្នានេះ សាលា​រៀនក្នុងប្រទេសត្រូវខូចខាត និងបិទទ្វារដែលជា​បញ្ហាប្រឈម​មួយ​ផ្សេង​ទៀតក្នុងការ​អភិវឌ្ឍកុមារ។
 

បើតាមរបាយការណ៍របស់អង្គការសហប្រជាជាតិស្តីពីកុមារ និង​ជម្លោះប្រដាប់អាវុធឆ្នាំ២០២២ កុមារ​ជាង២៥០០នាក់​ ត្រូវបាន​សម្លាប់នៅក្នុងជម្លោះទូទាំងពិភពលោក​ និង៥៥៥៥នាក់ ​រងរបួស និង​ពិការ​ជាដើមនៅឆ្នាំ២០២១។ តំបន់ដែលកុមាររង​គ្រោះភាគច្រើនមាននៅយេម៉ែន ស៊ីរី អាហ្វហ្គានី​ស្ថាន កុងហ្គោ សូម៉ាលី អ៊ីស្រាអែល និងប៉ាឡេស្ទីន។ 
 

ចំណែកក្នុងខែមេសា ឆ្នាំ២០២២ អង្គការសហប្រជាជាតិបានបោះឆ្នោតដករុស្ស៊ីចេញពី​ក្រុម​ប្រឹក្សា​សិទ្ធិមនុស្ស បន្ទាប់ពីមានការចោទប្រកាន់ថាទាហានរុស្ស៊ីបានធ្វើទារុណកម្ម និង​សម្លាប់​ជន​ស៊ីវិល​អ៊ុយក្រែននៅ Bucha ក្បែរទីក្រុងកៀវ៕