ជាតិ
អាជ្ញាធរខេត្តកំពត ឱ្យពលរដ្ឋប្រុងប្រយ័ត្ន ក្រោយទឹកអាងកំចាយ ជិតដល់កម្រិតប្រកាសអាសន្ន ( រូបភាព នៅទំនប់កំចាយ ខេត្តកំពត នៅថ្ងៃទី១៣ ខែកក្គដា) រូបផ្តល់ដោយ កញ្ញា អ៊ុង ស្រីអូន
× ក្រោយភ្លៀងធ្លាក់បីថ្ងៃជាប់គ្នា ក្រុមបច្ចេកទេសនៃទំនប់វារីអគ្គិសនីកំចាយ ក្នុងខេត្តកំពត បានបើកបង្ហូរទឹកសន្សឹមៗ ចេញពីទំនប់វារីអគ្គិសនីកំចាយ។ កម្ពស់ទឹកក្នុងអាងនេះ កើនឡើងដល់ ១៤៧,៥៩ម៉ែត្រ នៅព្រឹកថ្ងៃទី១៣ ខែកក្កដា។ កម្រិតទឹកប្រកាសអាសន្ន នៅក្នុងអាងទឹកកំចាយ មានកម្ពស់ ១៤៨ម៉ែត្រ។
លោក មី សាវុធ គណៈកម្មាធិការគ្រប់គ្រងគ្រោះមហន្តរាយខេត្តកំពត បានប្រាប់សារព័ត៌មាន ThmeyThmey25 ថា បន្ទាប់ពីភ្លៀងធ្លាក់ជាប់គ្នាបីថ្ងៃ ធ្វើឱ្យកម្ពស់ទឹកក្នុងទំនប់កំចាយឡើងដល់ ១៤៧,៥៩ ម៉ែត្រ។ កម្រិតនេះ ឡើងស្ទើរដល់កម្ពស់ទឹកប្រកាសអាសន្ន ១៤៨ម៉ែត្រ។ ជាមួយគ្នានេះ ក្រុមបច្ចេកទេស បានសម្រេចចិត្តបើកទ្វារទឹកទី៤ នៅព្រឹកនេះ ដើម្បីបង្ហូរទឹកចេញបណ្ដើរៗ។
« ស្ថានភាពទឹកធម្មតានៅធម្មតា។ ដោយសារភ្លៀងជាប់គ្នា បណ្ដាលធ្វើឱ្យកម្ពស់ទឹក នៅក្នុងអាងកើនដល់ជាង ១៤៧ម៉ែត្រ។ យើងត្រូវបើករំដោះទឹកនេះ ហើយធ្វើបែបនេះ ក៏ដូចជាការជូនដំណឹងដល់ពលរដ្ឋ ក្នុងតំបន់រួមជាមួយទេសចរ ដែលទៅកម្សាន្ដនៅតំបន់នោះ បានត្រៀមជាមុនផង»។ លោក មី សាវុធ អះអាងដូច្នេះ។
ទន្ទឹមនឹងនេះគណៈកម្មាធិការគ្រប់គ្រងគ្រោះមហន្ដរាយខេត្តកំពត បានអំពាវនាវឱ្យពលរដ្ឋទាំងអស់ ប្រុងប្រយ័ត្ន និងរៀបចំការពារខ្លួនទឹកជាមុន ក្នុងករណីភ្លៀងនៅបន្តធ្លាក់។
គួរបញ្ជាក់ថានៅថ្ងៃទី១២ ខែកក្កដា អាងទឹកក្នុងទំនប់វារីអគ្គិសនីកំចាយ មានកម្ពស់ទឹក១៤៦,៦៨ម៉ែត្រ និងបន្តកើនដល់ ១៤៧,៥៩ នៅថ្ងៃទី១៣ ខែកក្កដានេះ ។ ទំនប់វារីអគ្គិសនីកំចាយ មានទីតាំងស្ថិតនៅស្ទឹងកំចាយ ឃុំម៉ាក់ប្រាង្គ ស្រុកទឹកឈូ ខេត្ដកំពត៕
© រក្សាសិទ្ធិដោយ thmeythmey.com