បងទី៣ បងទី៤ ប្អូនទី៧ ឬកូនទី១០ ប្រហែលជាមិនមានច្រើននោះឡើយក្នុងសង្គមគ្រួសារខ្មែរនាពេលបច្ចុប្បន្ន ដោយគូស្វាមីភរិយាជាច្រើន សម្រេចគម្រោងរួមគ្នារួចទៅហើយ។ ជាទូទៅ គ្រួសារសម័យនេះ យកកូនតែពីរ ជាពិសេសអ្នកដែលមានកូនប្រុស ស្រី តាមបំណង ហើយគ្រួសារខ្លះ ឈានដល់មានកូនបី ឬបួននាក់ ដោយសារតែការតាមយកកូនផ្អែកលើភេទប្រុស ឬភេទស្រី។ ការសម្រេចយកកូនតិច ភាគច្រើនបណ្តាលមកបញ្ហាសេដ្ឋកិច្ចគ្រួសារ ការយល់ដឹងពីសុខភាពបន្តពូជ កង្វះពេលថែទាំ និងការប្រើប្រាស់ពេលវេលាសម្រាប់ខ្លួនឯង ជាដើម។
ទើបតែរៀបការកាលពីពេលថ្មីកន្លងមក លោក យ័ន រតនា បានដាក់គម្រោងការរួចទៅហើយជាមួយភរិយា ដោយកំណត់យកកូនតែពីរនាក់ប៉ុណ្ណោះ។ បុគ្គលិកក្រុមហ៊ុនឯកជនដែលមានវ័យ៣០ឆ្នាំរូបនេះ បានបញ្ជាក់ថា លោកមមាញឹកខ្លាំងក្នុងការងារ ដោយមិនសូវមានពេលគ្រប់គ្រាន់ក្នុងការថែទាំកូននោះឡើយ ហើយក៏គួបផ្សំនឹងបញ្ហាហិរញ្ញវត្ថុផងដែរ។
លោក រតនា បានរៀបរាប់ថា៖ «បើយកកូនច្រើន អាចប៉ះពាល់កញ្ចប់ថវិកាសន្សំក្នុងគ្រួសារ ដូចជាត្រូវទិញផ្ទះធំ ថ្លៃអាហារ ការពិនិត្យសុខភាព ការដើលេងកម្សាន្ត បន្ថែមការចំណាយលើថ្លៃរស់នៅផ្សេងៗ ទន្ទឹមនឹងទំនិញនៅលើទីផ្សារចេះតែឡើងថ្លៃពីមួយថ្ងៃទៅមួយថ្ងៃ»។
ដូចគ្នាផងដែរ អ្នកស្រី ធាវ រចនា ដែលជាអាជីវករលក់ចាប់ហួយមួយកន្លែងនៅខេត្តព្រៃវែង បានអះអាងប្រាប់សារព័ត៌មានថ្មីៗថា គ្រួសារគាត់សម្រេចយកកូនត្រឹមតែ៣នាក់ប៉ុណ្ណោះ។ អ្នកស្រីពន្យល់ថា៖ «សម័យឥលូវគេរកស៊ីដោយចងការធនាគារ តែបើយកកូនច្រើនមានពេលឯណាទៅរកស៊ីបង់ធនាគារវិញនោះ»។
ម្តាយវ័យ៣៥ឆ្នាំរូបនេះ រអ៊ូរទាំទាក់ទងនឹងការចាយវាយជាប្រចាំលើទឹក ភ្លើង អាហារ ការសិក្សា ហើយអ្វីដែលបារម្ភបំផុតនោះ គឺខ្ទង់ចំណាយកាន់តែកើនឡើងនៅពេលដែលកូនឈឺ។ អ្នកស្រីលើកឡើងពីភាពខុសគ្នាដែលកាលពីដើម ចាស់ៗយកកូនច្រើនដើម្បីជួយជាកម្លាំងក្នុងគ្រួសារ ដូចជាភ្ជួររាស់ ដកស្ទូង ដាំបន្លែ រកត្រីសាច់ ...ជាដើម ហើយករណីកូនច្រើននាពេល ក៏មានមួយផ្នែកបណ្តាលមកពីកង្វះការយល់ដឹងពីបញ្ហាសុខភាពបន្តពូជផងដែរ។
បើតាម បណ្ឌិត គី សិរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា ការកំណត់ចំនួនកូន គឺអាស្រ័យលើការវិវត្តនៃសេដ្ឋកិច្ច បើប្រទេសមួយមានកំណើនសេដ្ឋកិច្ចខ្ពស់ ពលរដ្ឋត្រូវបោះបង់ចោលការងារក្នុងផ្ទះ ទៅចាប់យកការងារខាងក្រៅដើម្បីទទួលបានប្រាក់ចំណូលខ្ពស់ គួបផ្សំជាមួយការយល់ជ្រួតជ្រាបពីវិស័យសុខាភិបាល ដែលធ្វើឲ្យអត្រាយកកូននាពេលបច្ចុប្បន្នមានចំនួនតិច។
![](https://image.thmeythmey.com/pictures/2022/08/23/nn__2_.jpg)
លោកបណ្ឌិត គី សិរីវឌ្ឍន៍
អ្នកជំនាញរូបនេះបានសង្កត់ធ្ងន់ថា ៖ «ការយកកូនតិចមិនប៉ះពាល់ដល់កម្លាំងផលិតកម្មទេ កម្ពុជាឆ្លងផុតដំណាក់កាលវិស័យកាត់ដេរហើយ ការវិវត្តនៃវិស័យឧស្សាហកម្មត្រូវតែមានការផ្លាស់ប្តូរ ដោយកម្លាំងពលកម្មត្រូវតែភ្ជាប់ជាមួយសមត្ថភាពនៃការប្រើប្រាស់បច្ចេកវិទ្យា»។
ប្រព័ន្ធអប់រំនៅកម្ពុជាដើរតួនាទីយ៉ាងសំខាន់ក្នុងការបណ្តុះបណ្តាលធនធានមនុស្ស និងកម្មករជំនាញដែលប្រកបទៅដោយវិជ្ជាជីវៈ។ ចំពោះករណីនេះ លោក សិរីវឌ្ឍន៍ បានលើកទឹកចិត្តគ្រប់ស្ថាប័នពាក់ព័ន្ធចូលរួម ជំរុញ ការបណ្តុះបណ្តាលវិជ្ជាជីវៈឱ្យបានលឿននិងឆាប់រហ័សដើម្បីឆ្លើយតបនឹងតម្រូវការទីផ្សារ ជាជាងមានផ្នត់គំនិតក្នុងការយកកូនច្រើនដើម្បីបង្កើនកម្លាំងពលកម្ម ។
ការយកកូនជាការវិនិយោគទៅលើកុមារ និងវិនិយោគលើធនធានមនុស្ស មិនមែនជាការចិញ្ចឹមកូនដូចពីមុនទេ ដោយបច្ចប្បន្ននៅពេលដែលសេដ្ឋកិច្ចរីកចម្រើន សាលារៀនឯកជនរីកដុះដាលដូចផ្សិត ហើយដោយសារការឱ្យតម្លៃទៅលើការបណ្តុះបណ្តាល ឪពុកម្តាយ បានចំណាយយ៉ាងច្រើនទៅលើការសិក្សារបស់កូនៗ ដើម្បីឱ្យពួកគេក្លាយជាធនធានមនុស្ស ត្រៀមខ្លួនប្រកួតប្រជែងទីផ្សារការងារនាពេលអនាគត។ នេះជាការលើកឡើងបន្ថែមរបស់លោកបណ្ឌិត សិរីវឌ្ឍន៍។
បណ្ឌិត អ៊ី រតនា អ្នកប្រឹក្សាសង្គមមួយរូប ក៏ធ្លាប់បានលើកឡើងប្រាប់សារព័ត៌មានថ្មីៗ អំពីលទ្ធភាពដែលគូស្វាមីភរិយាគួរយកកូនផងដែរ។ លោកតម្រូវឲ្យមើលលើកត្តាមួយចំនួនដូចជា កត្តាសុខភាព ដែលជាកត្តាសំខាន់ជាងគេ ប្រសិនបើភរិយា និងស្វាមីមានសុខភាពល្អគឺពួកគាត់អាចយកកូនបានច្រើនតាមបំណងប្រាថ្នារបស់ខ្លួន។
កត្តាទីពីរ លោក រតនា ផ្តោតលើសេដ្ឋកិច្ច។ លោកថា ប្រសិនបើសេដ្ឋកិច្ចគ្រួសារ ដូចជាផ្ទះ ដីស្រែ ចម្ការ ឬដីសម្រាប់ធ្វើអ្វីមួយ រួមជាមួយទ្រព្យសម្បតិ្តលុយកាក់មិនសូវមានបាន កម្រិតមធ្យម គួបផ្សំជាមួយការរស់នៅថ្លៃ ក៏ជាកត្តាជះឥទ្ធិពលដល់ការមានកូនតិចឬច្រើនផងដែរ។
ការអប់រំ ជាកត្តាទីបីដែលបណ្ឌិតរូបនេះ ចង់ឲ្យផ្តោតអារម្មណ៍។ លោកគូសបញ្ជាក់ថា មនុស្សដែលមានការអប់រំខ្ពស់ មានការយល់ដឹងអំពីបញ្ហាច្រើនអំពីសង្គម ការកសាងគ្រួសារ ការកសាងសង្គម ផលវិបាកនានា និងមិនសូវមានពេលទំនេរគិតគូរអំពីគ្រួសារ មើលថែទាំ និងអប់រំកូននោះទេ។
![](https://image.thmeythmey.com/pictures/2022/08/23/nn__3_.jpg)
លោកបណ្ឌិត អ៊ី រតនា
កត្តានយោបាយ ជាចំណុចទីបួន ព្រោះស្ថានភាពប្រទេសល្អ ឬមិនល្អក៏ជាកត្តាជះឥទ្ធិពលដល់ការសម្រេចចិត្តយកប្តី ឬប្រពន្ធ និងការយកកូនតិច ឬច្រើនផងដែរ ។ រីឯកត្តាចុងក្រោយ លោក អ៊ី រតនា គូសបញ្ជាក់អំពីទស្សនវិជ្ជាថ្មីនៃគ្រួសារ។ ត្រង់បញ្ហានេះ លោករៀបរាប់ថា យុគសម័យជឿនលឿន វិទ្យាសាស្ត្រ និងបច្ចេកវិទ្យាទំនើបដូចបច្ចុប្បន្នធ្វើឱ្យមនុស្សប្រែប្រួល ផ្លាស់ប្តូរ និងសម្របសម្រួលខ្លួនទៅតាមស្ថានភាពជឿនលឿននៃបណ្តាប្រទេសវិទ្យាសាស្ត្រ និងបច្ចេកវិទ្យាទំនើប ពោលគឺមនុស្សដែលមានជីវភាពមធ្យម និងមានការអប់រំល្អឡើងទៅមិនចង់រៀបការលឿនក្នុងវ័យក្រោម៣០ឆ្នាំទេសម្រាប់បុរស ហើយស្ត្រីក្នុងវ័យចន្លោះ២៥-២៩ឆ្នាំ។
និយាយឲ្យចំទៅ ទំនោរយកកូនតិចនៅកម្ពុជា ដោយភាគច្រើនអ្នករស់នៅទីប្រជុំជន គឺបណ្តាលមកពីបញ្ហាពេលវេលា ការចំណាយសព្វសារពើ ទាំងការហូបចុក ថ្នាំសង្កូវ ទឹកដោះគោ ថ្លៃសិក្សា និងតម្រូវការផ្សេងៗផ្ទាល់ខ្លួន។ ឪពុកម្តាយខ្លះ មិនទាន់គិតគូរឿងយកកូន ដោយទុកពេលវេលាអភិវឌ្ឍន៍ខ្លួន ឬពេលវេលាផ្ទាល់ខ្លួនលើការសម្រេចចិត្តអ្វីមួយ រីឯអ្នកខ្លះ មានកូនលើសផែនការ ដោយសារតែការតាមយកកូន បន្ទាប់ពីបង្កើតបានកូន ប្រុស ប្រុស ឬស្រី ស្រី ជាដើម៕