កញ្ញា ម៉េង មុនីរួត្ន កំពុងប្រកបអាជីពជាមេធាវី នៅក្នុងក្រុមហ៊ុនមេធាវីឯកជនមួយនៅរាជធានីភ្នំពេញ ហើយ​ក៏ជា​សមាជិកគណៈកម្មាធិការសិទ្ធិមនុស្សកម្ពុជា​ដែរ។ ​មុនីរួត្ន ក៏ធ្លាប់​បម្រើការងារពាក់ព័ន្ធនឹងផ្នែកច្បាប់ នៅស្ថានបេសកកម្មអចិន្ត្រៃយ៍នៃកម្ពុជា ប្រចាំអង្គការសហប្រជាជាតិ នៅទីក្រុងហ្ស៊ឺណែវផងដែរ។ ដ្បិតទើបក្លាយជាមេធាវីពេញសិទ្ធិ និងស្បថចូលកាន់តំណែង​ប្រមាណ១ឆ្នាំពិតមែន ប៉ុន្តែ មុនីរួត្ន បានប្រឡូកក្នុងការងារពាក់ព័ន្ធនឹងផ្នែកច្បាប់នេះ តាំងពីអំឡុងឆ្នាំ២០១៥មកម្ល៉េះ។  ជាកូនអ្នកភ្នំពេញ មុនីរួត្ន បានបញ្ចប់ការសិក្សា​បរិញ្ញាបត្រផ្នែកច្បាប់ ពីសាកលវិទ្យាលួយភូមិន្តនីតិសាស្ត្រ និងវិទ្យាសាស្ត្រសេដ្ឋកិច្ច និងបញ្ញាបត្រអប់រំភាសាអង់គ្លេស ពីវិទ្យាស្ថានភាសាបរទេស។ ជាមួយគ្នានេះ មេធាវី ម៉េង មុនីរួត្ន ក៏បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកនីតិសាស្រ្ត ពីសាកលវិទ្យាល័យណាហ្គូយ៉ា ប្រទេសជប៉ុន ថែមទៀតផង។  

 

ក្លាយជាមេធាវីមួយរូប ដែលមានការទទួលស្គាល់ដូចសព្វថ្ងៃ មិនមែនជារឿងចៃដន់ឡើយ សម្រាប់ មុនីរួត្ន ដែលមានឈាមជ័រជាកូនចៅចិន​។ ជាកូនស្រីតែម្នាក់ក្នុងគ្រួសារ និងជាកូនច្បងផងនោះ មុនីរួត្ន ត្រូវបានសាច់ញាតិរំពឹងថា ​នាងនឹង​ឆាប់រៀបការ បង្កើតកូន និងប្រកបអាជីវកម្មដូចកូនចៅចិនភាគច្រើនដទៃទៀត។ ​ ប៉ុន្តែ មុនីរួត្ន ដែលជាយុវជនសម័យថ្មី ​​មិនចង់បន្តប្រពៃណី និងផ្នត់គំនិតចាស់ ដែលថាស្រីបង្វិលចង្ក្រានមិនជុំនោះឡើយ។ យុវតីរូបនេះ ចង់សិក្សាបានខ្ពស់ និងស្វែងយល់ពីជីវិតនៅក្នុងសង្គមបានច្រើន។  

 

កញ្ញា ម៉េង មុនីរួត្ន រៀបរាប់ដូច្នេះ៖​«ខ្ញុំកូនកាត់ចិន។ ក្រុមគ្រួសារចិន គាត់អត់សូវគាំទ្រ ឱ្យកូនស្រី រៀន​បានខ្ពស់ទេ។ គាត់​ចង់​ឱ្យតែឆាប់មានគ្រួសារ ឆាប់មានកូន មានចៅ ទៅឆាប់ចប់។ ម្តាយខ្ញុំ គាត់គាំទ្រខ្លាំង បំណងប្រាថ្នារបស់គាត់ គាត់ចង់ឱ្យកូនស្រី មានចំណេះដឹង។ គាត់​អត់ចង់ឱ្យកូនល្ងង់ កុំឱ្យដូចគាត់។ ហើយឪពុកខ្ញុំ ក៏គាត់គាំទ្រដែរ ដល់ការសិក្សានេះ។ ទោះជាពីមុនៗ គេថាកុំឱ្យកូនស្រីរៀន។ រៀនធ្វើអី រៀនទៅ ចេះពេកអត់ប្តី។ មានការនិយាយច្រើន។ ប៉ុន្តែខ្ញុំនៅតែអរគុណឪពុកម្តាយខ្ញុំ ដែលគាត់នៅតែគាំទ្រ ទោះជាគេនិយាយទិតៀនយ៉ាងណាក៏ដោយ ក៏គាត់នៅតែគាំទ្រ។ នៅតែរក្សាជំហរ ឱ្យកូនស្រី រៀន​ឱ្យចប់​។ ណាមួយយើងខំប្រឹង តស៊ូដែរ​។​»។ 

 

នៅចំពោះការងារដ៏មមាញឹក កញ្ញា ម៉េង មុនី បានឆ្លៀតពេលផ្តល់សម្ភាសចែករំលែក ពីបទសម្ពោធសិក្សា និងការប្រកបអាជីពរបស់ខ្លួនដល់សារព័ត៌មានថ្មីៗ ​នៅការិយាល័យការងាររបស់ខ្លួន ដែលស្ថិតនៅអគារផ្ទះល្វែងមួយ ​នៅតំបន់បឹងកក់ ក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។ បើតាម កញ្ញា ម៉េង មុនីរួត្ន ដោយសារការស្រឡាញ់ការសិក្សា និងមានការគាំទ្រយ៉ាងខ្លាំងពីម្តាយ និងជីដូនផង នាងអាចយកឈ្នះ​បានផ្នត់គំនិតរបស់សាច់ញាតិ ហើយបន្តការសិក្សានៅសាកលវិទ្យាល័យដូចបំណង។ 

 

​មុនីរួត្ន រំឭកថា ​សិក្សាជំនាញច្បាប់បាន២ឆ្នាំទើប អាចស្វែងរកនូវឧបនិស្ស័យក្នុងវិស័យច្បាប់នេះឃើញ ខណៈការសិក្សានៅក្នុងថ្នាក់ គឺផ្តោតច្រើនទៅលើមុខវិជ្ជាទូទៅ។ នៅឆ្នាំទី២ ម៉េង មុនីរួត្ន បានដឹងថា ​នាងចង់ក្លាយ​ជា​មេធាវី។ គឺចាប់តាំងពីពេលនោះហើយដែល យុវនិស្សិត មុនីរួត្ន បានខិតខំសំលៀងចំណេះខ្លួន ឱ្យខ្លាំងពូកែ ដែលជាឱកាស​សម្រាប់ការប្រកបអាជីពនេះ ក្នុងពេលអនាគត។ 

 

ដឹងពីអាជីពដែលខ្លួនចង់ធ្វើហើយ ប៉ុន្តែនៅត្រូវឆ្លងកាត់កងព័ន្ធមួយទៀត នោះគឺការលើកឡើងពីវប្បធម៌ស៊ីសំណូក ឬទាល់តែមានខ្សែ មានខ្នង ទើបអាចប្រឡងជាប់ ប្រកបវិជ្ជាជីវៈជាមេធាវីបាន។  មុនីរួត្ន សារភាពថា នាងពិតជាបានដឹងរឿងទាំងអស់នេះ​។ ប៉ុន្តែទោះជាយ៉ាងនេះក្តី ការលើកឡើង​ទាំងអស់នោះ មិនអាចរារាំង ឬបញ្ឈប់ មុនីរួត្ន ពីការប៉ុនប៉ងប្រឡូកក្នុងអាជីពជាមេធាវីបានឡើយ។ គ្រានោះយុវនិស្សិត ម៉េង មុនីរួត្ន តាំងចិត្តថា នាងនឹង​ធ្វើជាមេធាវី ដោយសារតែចំណេះដឹង និងសមត្ថភាពរបស់នាង​។ «ជំនាន់ហ្នុង អ្នកណាក៏និយាយដែរ អ្នកឯងអត់មានខ្សែ ទៅរៀន(ធ្វើ)អី? រៀនមេធាវីរៀន(ធ្វើ)អី? រៀនច្បាប់ធ្វើអី គេចង់ធ្វើអ្នកធំ ទៅរៀនធ្វើអី។ ខ្ញុំថា ខ្ញុំសាកល្បង ខ្ញុំចង់ដឹងថាខ្លួនឯងអាចឈានដល់កម្រិតណា។ Limit ខ្ញុំដល់ណា?»។ នេះជាការរៀបរាប់របស់មេធាវី ម៉េង មុនីរួត្ន។ 

​

​

ជាយុវជនដែលពោរពេញទៅដោយកម្លាំង ពលំ មិនត្រូវស្ពឹកស្រពន់ និងត្រូវស្រឡាញ់ការប្រឹងប្រែង។ នេះជាការយល់ឃើញរបស់ កញ្ញា ម៉េង មុនីរួត្ន ដែលមិនបដិសេធឡើយថា ធ្វើការច្រើន ប្រឹងប្រែងច្រើន ហត់នឿយ។ មេធាវីរូបនេះ អះអាងយ៉ាងក្លៀវក្លាថា ការចាយកម្លាំង និងពេលវេលាឱ្យអស់នោះ មិនមែនជារឿងខាតបង់អ្វីឡើយ។ ផ្ទុយទៅវិញ វាអនុញ្ញាតឱ្យយុវជនបានស្វែងយល់ពីជម្រៅ នៃក្តីស្រឡាញ់លើអាជីពសម្រាប់អនា​គ​ត និង​ដឹងពីកម្រិតសមត្ថភាពរបស់ខ្លួន។ ​ 

 

មេធាវី ម៉េង មុនីរួត្នពន្យល់ដូច្នេះ៖ «​យើងនៅក្មេង កម្លាំង​យើងច្រើនណាស់។ កុំគិតថា ខ្ញុំធ្វើទៅ ខ្ញុំហត់ណាស់។ សម្រាប់ខ្ញុំ ឱ្យតែមានឱកាស។ ខ្ញុំតែងប្រាប់មិត្តភក្តិខ្ញុំថា ឱ្យតែមានឱកាស យើងចាប់ យើងធ្វើ យើងបញ្ចេញសមត្ថភាពរបស់យើង។ យើងមើលថាសមត្ថភាពយើង កម្រិតយើងបានប៉ុនណា? យើងបន្ថែមបន្តទៀត។ តើពេលណា យើងអាចបន្ថែមប៉ុនណាទៀត? មែនទែនយើងដឹងlimit(កម្រិត) របស់យើង។ ជារួម បើសិនជាយើងរិះថាំកម្លាំងរបស់យើង យើងនៅតែផ្ទះ យើងអត់អាច Explore(រុករក) យើងអត់អាចដឹងថា យើងចូលចិត្តអីទេ។ យើងនៅក្មេង យើងចាយឱ្យអស់កម្លាំងរបស់យើង ប៉ុន្តែក៏ត្រូវមើលថែសុខភាពដែរ​។​»។

​

សម្រាប់ មុនីរួត្ន អ្នកណាក៏អាចប្រកបអាជីពជាមេធាវីបានដែរ ឱ្យតែពួកគេច្បាស់ថាស្រឡាញ់អាជីពនេះ។ ខ្ញុំគិតថា មនុស្សបែបណា ក៏អាចចូលធ្វើជាមេធាវីបានដែរ។ សំខាន់តើយើងសប្បាយចិត្ត យើងចូលចិត្តនឹងអាជីពហ្នឹងអត់? យើងសួរខ្លួនឯងថា ហេតុអ្វីបានខ្ញុំចង់ក្លាយជាមេធាវីវិញ? ​យើងចូលចិត្តទៅ យើងចាប់ផ្តើម លុតដំខ្លួនឯងម្តងបន្តិចៗ។ វាក្លាយទៅជាមេធាវីបាន​។ ប៉ុន្តែបើសិនជាយើងអត់ចូលចិត្ត យើងប្រាកដជាធ្វើហើយ អស់កម្លាំងចិត្តក្នុងការធ្វើតែម្តង។ »។

 

កញ្ញា ម៉េង មុនីរួត្ន ក៏លើកទឹកចិត្តដល់អ្នកដែលមានបំណង ប្រកបអាជីពជាមេធាវី នេះ ឱ្យប្រឹងប្រែងសិក្សា និងធ្វើការឱ្យអស់ពីលទ្ធភាព ដើម្បីបង្កើនសមត្ថភាពរបស់ខ្លួន ដែលជាអំណាច និងដើមទុនដ៏មុតស្រួច នៅក្នុងការឈរជើងនៅក្នុងវិជ្ជាជីវៈមួយនេះ៕

 

 

 

 

​