លោក មិន សារិន តួសម្ដែងជើងចាស់លក់ផ្ទះដើម្បីព្យាបាលជំងឺ

ជាតិ

លោក មិន សារិន តួសម្ដែងជើងចាស់លក់ផ្ទះដើម្បីព្យាបាលជំងឺ

13, Oct 2022 , 4:36 pm

រូបភាព

លោក_មិន_សារិន_ហៅម៉ែ_តួសម្ដែងភាពយន្តជើងចាស់_រូបពីហ្វេសប៊ុក_មិន

ដោយ: ប៉ូ សាគុន

ភ្នំពេញ៖ ស្ថិតក្នុងជន្មាយុ៨៣ឆ្នាំ លោក មិន សារិន ហៅ ម៉ែន ដែលជាតួសម្ដែងជើងចាស់នោះ កំពុងមានជំងឺ ស្ពឹកដៃជើង លើសឈាម ក្រួសក្នុងតម្រងនោម និងហត់។ ព្រោះជីវភាពខ្វះខាត លោក បានសម្រេចចិត្តលក់ផ្ទះនិងដី ក្នុងតម្លៃ២២ម៉ឺនដុល្លារអាមេរិក ដើម្បីព្យាបាលជំងឺ។

អ្នកស្រី មិន ស្រីទូច ត្រូវជាកូនស្រីរបស់លោក មិន សារិន បានប្រាប់សារព័ត៌មានថ្មីៗតាមទូរសព្ទថា ឪពុករបស់អ្នកស្រីមានជំងឺលើសឈាមប្រចាំកាយ យូរឆ្នាំមកហើយ។ ដោយឡែកជំងឺស្ពឹកដៃជើង ក្រួសក្នុងតម្រងនោម និងហត់ ទើបតែមានប្រមាណជា៣ទៅ៤ខែចុងក្រោយនេះប៉ុណ្ណោះ។

អ្នកស្រីថា ជីវភាពក្នុងគ្រួសាររបស់អ្នកស្រី កំពុងជួបការខ្វះខាត ទើបបានជា គ្រួសារទាំងមូលសម្រេចលក់ផ្ទះនិងដី ដើម្បីយកប្រាក់នោះទៅព្យាបាលជំងឺឪពុក។ ដីដែលមានទំហំទទឹង៨.៣ និងបណ្ដោយ២៥ម៉ែត្រ ដែលស្ថិតនៅខាងក្រោយវត្តច្បារអំពៅ ប្រមាណ២៥០ម៉ែត្រ ក្នុងសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ អ្នកស្រី មិន ស្រីទូច លក់ក្នុងតម្លៃ២២ម៉ឺនដុល្លារអាមេរិក។

អ្នកស្រី មិន ស្រីទូច បន្ថែម៖«ឪពុកខ្ញុំអង្គុយមិនបានយូរទេ គាត់ឆាប់ហត់ ហើយគាត់ធ្ងន់ត្រចៀកខ្លាំង (ស្ដាប់មិនសូវឮ)។ ឥឡូវយើងកំពុងខ្វះខាតខ្លាំង យើងត្រូវការប្រាក់ ដើម្បីព្យាបាលគាត់(លោក យិន សារិន)។ សព្វថ្ងៃបានសមាគមន៍សិល្បករខ្មែរឧបត្ថម្ភជាប្រចាំខែ បងអ៊ឹមជីវ៉ាគាត់ក៏ជួយខ្លះដែរ ហើយមានឧកញ៉ាម្នាក់ទៀតក៏បានជួយខ្លះដែរ»។

សូមបញ្ជាក់ថា លោក មិន សារិន ហៅម៉ែន បានសម្ដែងភាពយន្តប្រមាណជា៧០រឿង មានរឿង “ចិត្តចងចាំ” ជាស្នាដៃរបស់លោក ម៉ៅ អាយុទ្ធ។ រឿង “ទុក្ខស្រីប្ដីព្រាត់” ស្នាដៃរបស់លោក សោម ដូរិន្ទ។ រឿង “ម្ជុលបាតសមុទ្រ” របស់ភូមិពេជ្រភាពយន្ត។ រឿង “ដងរែក” ជារឿងបែបអប់រំ ដែលស្រង់ចេញពីគម្ពីរព្រះពុទ្ធសាសនា រឿង “នរក៩ជាន់” ដែលមានអ្នកស្រី អ៊ុំ សុវណ្ណនី ត្រូវជាកូនស្រីច្បងរបស់លោក មិន សារិន សម្ដែងជាតួឯកស្រី និងមានរឿងជាច្រើនទៀត ដែលលោកបានសម្ដែង។ ក៏មានដែរលោកបានថតស្ពតនានា និងថតខារ៉ាអូខេច្រើនទៀត។

លោក មិន សារិន ធ្លាប់បានចូលបម្រើកងទ័ពសម័យសង្គមរាស្ត្រនិយម នៅឆ្នាំ១៩៦៣។ លុះដល់ឆ្នាំ១៩៧០-១៩៧៥ លោកជាកងទ័ពក្នុងរបប លន់ នុល។ ពីឆ្នាំ១៩៧៥-១៩៧៩ លោកក៏ធ្លាក់ក្នុងសម័យសង្រ្គាម ត្រូវធ្វើការហួសកម្លាំងដូចពលរដ្ឋខ្មែរដទៃទៀតដែរ។

បច្ចុប្បន្នលោក មិន សារិន ហៅ ម៉ែន រស់នៅរាជធានីភ្នំពេញ ក្នុងខណ្ឌច្បារអំពៅ។ លោកមានកូន១៣នាក់។ ប្រពន្ធមុនមានកូនម្នាក់ គឺអ្នកស្រី អ៊ុំ សុវណ្ណនី ដែលជាតួសម្ដែងល្បីឈ្មោះកាលអំឡុងទសវត្សរ៍៩០។ សម្រាប់ប្រពន្ធក្រោយ លោកមានកូន១២នាក់ (កូនមានសរសៃប្រសាទម្នាក់) ហើយបានស្លាប់៤នាក់។ នេះបើតាមអ្នកស្រី មិន ស្រីទូច បញ្ជាក់ប្រាប់សារព័ត៌មានថ្មីៗ៕