បើតាមចៅសង្កាត់រងដដែល សេវាដែលពលរដ្ឋមានតម្រូវការច្រើនជាងគេ គឺការធ្វើអត្រានុកូលដ្ឋាន ពោលគឺសេវាពាក់ព័ន្ធនឹងការរៀបអាពាហ៍ពិពាហ៍ និងធ្វើសំបុត្រកំណើតជាដើម។ លោក រ៉ន សំអាន់ បានអះអាងថា ការផ្ដល់សេវាសាធារណៈក្នុងសង្កាត់ មានភាពយឺតយ៉ាវបន្តិចបន្តួច ដោយសារក្នុងសង្កាត់មានរហូតដល់៣០ភូមិ ដែលក្នុងមួយថ្ងៃៗ មានពលរដ្ឋជាច្រើននាក់មកទទួលសេវាដោយផ្ទាល់។
 

ចៅសង្កាត់រងទី១រូបនេះ បញ្ជាក់ថា ដោយសារចំនួនពលរដ្ឋមកទទួលសេវាច្រើន និងដើម្បីចង់ពន្លឿតការផ្ដល់សេវាជូនពលរដ្ឋ ពេលខ្លះខាងសង្កាត់ ធ្វើការដោយមិនគិតពេលវេលា និងថ្ងៃឈប់សម្រាក។ «ក្នុងសង្កាត់មានពលរដ្ឋច្រើនមកទទួលសេវា ពលរដ្ឋខ្លះនៅឆ្ងាយ ដូចនេះយើងផ្ដល់អទិភាពដល់ពលរដ្ឋពិការ ឬស្រ្តីមានផ្ទៃពោះមុន និងព្យាយាមធ្វើជូនឱ្យលឿនគ្រប់គ្នា»។ 
  

ជាមួយគ្នានេះ ក្រៅពីបម្រើសេវាជូនពលរដ្ឋដោយផ្ទាល់ អាជ្ញាធរតែងចុះជួយ និងជួបពលរដ្ឋដោយផ្ទាល់តាមមូលដ្ឋាននៅពេលមានគ្រោះមហន្តរាយ ការផ្សព្វផ្សាយពីបញ្ហាផ្សេងៗ ដើម្បីផ្ដល់ភាពងាយស្រួលដល់ពលរដ្ឋ។ លោក រ៉ន សំអាន់ បន្ថែមថា៖«ជាចាំបាច់ណាស់ ពេលខ្លះយើងត្រូវចុះជួបពលរដ្ឋដោយផ្ទាល់  ដោយរឿងខ្លះយើងត្រូវបង្កើតជាវេទិកាផ្សព្វផ្សាយ។ មានរឿងខ្លះ យើងត្រូវចុះមូលដ្ឋានជាចាំបាច់»។ 
 

ក្នុងនាម​ ជាចៅសង្កាត់រងទី១ លោក រ៉ន សំអាន់ ថាខ្លួនមានការសប្បាយចិត្តយ៉ាងខ្លាំងក្នុងការផ្ដល់សេវាដល់ប្រជាពលរដ្ឋគ្រប់ៗគ្នា។ ជាមួយគ្នានេះលោក  ក៏​តាំងបានតាំងចិត្តថានឹងផ្តល់សេវាដល់ពលរដ្ឋឱ្យកាន់តែប្រសើរថែមទៀត៕