ជាតិ
ជប៉ុន ផ្ដល់ឧបករណ៍រាវមីនប្រភេទទំនើបចំនួន១២គ្រឿង ជូនកម្ពុជា លោក អ៊ូអិណុ អាត់ស៊ូស៊ី ឯកអគ្គរដ្ឋទូតជប៉ុនប្រចាំនៅកម្ពុជា បានប្រគល់ឧបករណ៍រាវមីនប្រភេទ ALIS ដល់ស៊ីម៉ាក់ កាលពីថ្ងៃទី០៣ ខែមីនា ឆ្នាំ២០២៣។ រូបថត៖ ស៊ីម៉ាក់
× ភ្នំពេញ៖ លោក អ៊ូអិណុ អាត់ស៊ូស៊ី ឯកអគ្គរដ្ឋទូតជប៉ុនប្រចាំនៅកម្ពុជា បានប្រគល់ឧបករណ៍រាវមីនប្រភេទ ALIS ផលិតនៅប្រទេសជប៉ុន ចំនួន១២គ្រឿង ដែលគិតជាថវិកាជិត៥០ម៉ឺនដុល្លារអាម៉េរិក។
ឧបករណ៍រាវមីននេះ ត្រូវបានប្រើប្រាស់បច្ចេកវិទ្យាទំនើបរបស់ជប៉ុន ក្រោមការសហការអភិវឌ្ឍស្រាវជ្រាវបច្ចេកទេសរវាងវិស្វករ និងអ្នកវិទ្យាសាស្ត្រជប៉ុន ជាមួយអង្គភាពស៊ីម៉ាក់ អស់រយៈពេលជិត១៦ឆ្នាំ។ ឧបករណ៍រាវមីនប្រភេទ ALIS នេះ មានបំពាក់រួមគ្នាប្រពន្ធ័រ៉ាដា ឧបករណ៍ស្កែនរូបភាពក្រោមដី និងឧបករណ៍រូបលោហធាតុ ការបញ្ជូនរលកសញ្ញាជារូបភាព។
លោក ហេង រតនា អគ្គនាយកស៊ីម៉ាក់ រំពឹងថា ឧបករណ៍នេះ នឹងអាចជួយពង្រឹងសុវត្ថិភាពសម្រាប់អ្នកដោះមីន និបង្កើនប្រសិទ្ធផល ដោយកាត់បន្ថយសកម្មភាពជីកកាយដីរកគ្រាប់មីននិងគ្រាប់មិនទាន់ផ្ទុះ។
លោក ហេង រតនា បញ្ជាក់កាលពីដើមឆ្នាំ២០២៣ថា អង្គភាពខ្លួន បានរំដោះខេត្តឱ្យអស់គ្រាប់មីនចំនួន៩ខេត្ត ដូចជា ខេត្តកែប កំពត តាកែវ កំពង់ឆ្នាំង កំពង់ចាម ភ្នំពេញ ព្រះសីហនុ ស្វាយរៀង និងព្រៃវែង៕
© រក្សាសិទ្ធិដោយ thmeythmey.com