តាំងពីរុស្ស៊ីចាប់ផ្ដើមលុកលុយអ៊ុយក្រែនកាលពីខែកុម្ភៈឆ្នាំ ២០២២ មក កញ្ចប់ជំនួយផ្នែកសន្តិសុខ និងយោធារបស់អាមេរិកឈានចូលកញ្ចប់លើកទី ៣៧ ហើយ បើគិតជាថវិកាមានរហូតដល់ ៣៥,៧ ពាន់លានដុល្លារ។

 

«អាមេរិក សម្ព័ន្ធមិត្ត និងដៃគូរបស់យើង នឹងឈររួបរួមជាមួយអ៊ុយក្រែនដរាបណាអ៊ុយក្រែនត្រូវការ»។ ប្រមុខការទូតអាមេរិក លោក អាន់តូនី ប្លីងខិន បានលើកឡើងក្នុងសេចក្ដីថ្លែងការណ៍មួយបែបនេះចេញនៅថ្ងៃទី៣ ខែឧសភា ខណៈប្រកាសពីកញ្ចប់ជំនួយខាងលើដែលមានតម្លៃ ៣០០ លានដុល្លារ។

 

ទន្ទឹមនេះ ប្រព័ន្ធបាញ់គ្រាប់រ៉ុក្កែត Hydra-70 ដែលរួមក្នុងកញ្ចប់ជំនួយអាមេរិកសម្រាប់អ៊ុយ ក្រែនជាលើកដំបូងនឹងជួយឱ្យក្រុងកៀវបំបាក់កម្លាំងកងទ័ពជើងគោករុស្ស៊ី ខណៈរុស្ស៊ីមាន គម្រោងវាយលុកក្នុងខែឧសភានេះ។ 

 

ប្រព័ន្ធបាញ់គ្រាប់រ៉ុក្កែត Hydra-70 ជាគ្រាប់រ៉ុក្កែតបាញ់តាមអាកាស ដែលផលិតដោយ ក្រុមហ៊ុនសាជីវកម្មអាកាសចរណ៍ និងការពារជាតិអាមេរិក General Dynamics Corp​ ។ គ្រាប់រ៉ុក្កែត ជាធម្មតាត្រូវបានបាញ់ចេញពីផ្នែកដែលភ្ជាប់ទៅនឹងយន្តហោះ ដើម្បីផ្តល់ការគាំទ្រ ដល់កងទ័ពជើងគោក។

 

កញ្ចប់នេះក៏រួមបញ្ចូលផងប្រព័ន្ធអាវុធប្រឆាំងរថក្រោះ AT-4 និង Carl Gustaf, មីស៊ីលប្រឆាំងរថក្រោះ TOW, កាំភ្លើងត្បាល់ជាច្រើនទំហំ និងប្រព័ន្ធរ៉ុក្កែតកាំភ្លើងធំចល័តខ្ពស់ (HIMARS) ។ ការរុះរើគ្រឿងបរិក្ខារ និងរថយន្តដឹកទំនិញក៏ជាផ្នែកនៃកញ្ចប់ជំនួយក៏ដូចជា ឧបករណ៍វិនិច្ឆ័យដើម្បីថែទាំយានយន្តទាំងនោះផងដែរ៕