តៃវ៉ាន់ នឹងរៀបចំការបោះឆ្នោតប្រធានាធិបតីខែមករា ឆ្នាំ២០២៤។ មុនការបោះឆ្នោត តៃវ៉ាន់តែងតែលើកឡើងពីហានិភ័យនៃការជ្រៀតជ្រែកពីទីក្រុងប៉េកាំងទៅក្នុងការបោះឆ្នោតនេះ ដើម្បីបង្វែរលទ្ធផលទៅឱ្យបេក្ខជនដែលមានជំហរអំណោយផលចំពោះខ្លួន។

 

«វិធីដែលពួកកុម្មុយនីស្តចិនជ្រៀតជ្រែកក្នុងការបោះឆ្នោតគឺមានភាពចម្រុះខ្លាំង។ ចិនអាចប្រើវិធីដូចជា សម្ពាធយោធា ការបង្ខិតបង្ខំសេដ្ឋកិច្ច ឬបង្កើតព័ត៌មានក្លែងក្លាយ ដើម្បីបង្កើតឱ្យមានជម្រើសភ័ន្តច្រឡំរវាងសង្រ្គាម និងសន្ដិភាពក្នុងការបំភ័យដល់អ្នកចូលរួមបោះឆ្នោតនាពេលខាងមុខ»។ អគ្គនាយកការិយាល័យសន្តិសុខជាតិតៃវ៉ាន់ Tsai Ming-yen និយយាបែបនេះក្នុងប្រជុំគណៈកម្មាធិការសភា។ 

 

លោក Tsai បន្ថែមទៀតថា តៃវ៉ាន់កំពុងយកចិត្តទុកដាក់ជាពិសេសលើពួកកុម្មុយនិស្តចិនដែលសហការជាមួយនឹងការស្ទង់មតិ និងក្រុមហ៊ុនទំនាក់ទំនងសាធារណៈនានាពាក់ព័ន្ធនឹងការរៀបចំការស្ទង់មតិ ហើយដែលជ្រៀតជ្រែកក្នុងការបោះឆ្នោត។ 

 

យោងតាមការស្ទង់មតិ អនុប្រធានាធិបតីតៃវ៉ាន់ លោក William Lai មកពីគណបក្សប្រជាធិបតេយ្យជឿនលឿនដែលកំពុងកាន់អំណាច ជាបេក្ខភាពឈានមុខគេក្នុងការបោះឆ្នោតប្រធានាធិបតីតៃវ៉ាន់។

 

ចិន បានចាត់ទុកលោក Lai និងគណបក្សកាន់អំណាចជាក្រុមផ្ដាច់ខ្លួន។ យ៉ាងណាក្ដី លោក Lai បានប្រកាសជំហរមិនផ្លាស់ប្តូរស្ថានភាពបច្ចុប្បន្នរបស់តៃវ៉ាន់ឡើយ ហើយបញ្ជាក់ច្បាស់ថាមានតែប្រជាជនតៃវ៉ាន់ទេដែលអាចសម្រេចអនាគតរបស់ពួកគេបាន។

 

ចិនបានបង្កើនសកម្មភាពយោធានៅជុំវិញកោះតៃវ៉ាន់ចាប់តាំងពីការបោះឆ្នោតចុងក្រោយក្នុងឆ្នាំ២០២០ មកម្ល៉េះ ហើយតែងតែបានបញ្ជូននាវាចម្បាំង និងយន្តហោះចម្បាំងចូលទៅក្នុងសមុទ្រ និងលំហអាកាសនៅជិតកោះតៃវ៉ាន់៕