លោក សុខ ចិន្តាសោភា បានប្រាប់ភាគីវៀតណាមថា ការបង្ហោះសារតាម Tik Tok ជេរប្រមាថថ្នាក់ដឹកនាំជាន់ខ្ពស់កម្ពុជា ពាក់ព័ន្ធនឹងគម្រោងព្រែកជីកហ្វ៊ូណនតេជោ បានបង្កឱ្យមានអារម្មណ៍មិនល្អ ក្នុងរង្វង់រាជរដ្ឋាភិបាល និងប្រជាជនកម្ពុជា។ រដ្ឋមន្ត្រីការបរទេសកម្ពុជា បានស្នើឱ្យរដ្ឋាភិបាលវៀតណាមផ្តល់កិច្ចសហការស្រាវជ្រាវ ដើម្បីកំណត់សមាសភាព អត្តសញ្ញាណរកជនជាតិវៀតណាម ដែលបានបង្ហោះខ្លឹមសារអមិត្តទាំងនោះ ដើម្បីទប់ស្កាត់ការប៉ុនប៉ងណាមួយ សំដៅលើការបំផ្លាញចំណងមិត្តភាពជាប្រពៃណី និងកិច្ចសហប្រតិបត្តិការដ៏ល្អប្រសើររវាងថ្នាក់ដឹកនាំ និងប្រជាជននៃប្រទេសទាំងពីរ។

 

ឯកអគ្គរដ្ឋទូតវៀតណាមលោក Nguyễn Huy Tăng ក៏បានយល់ស្របដែរថា ការបង្ហោះខ្លឹមសារអមិត្តទាំងនោះ ជាសកម្មភាពអវិជ្ជមាន ដែលចាំបាច់ត្រូវមានកិច្ចសហការយ៉ាងជិតស្និទ្ធរវាងស្ថាប័នមានសមត្ថកិច្ចនៃប្រទេសទាំងពីរ ដើម្បីស្រាវជ្រាវកំណត់សមាសភាព អត្តសញ្ញាណជនដែលនៅពីក្រោយសកម្មភាពទាំងនោះ។

 

កាលពីយប់ថ្ងៃទី១៩ ឧសភា សម្ដេច ហ៊ុន សែន បានបង្ហាញអារម្មណ៍មិនសប្បាយចិត្ត ចំពោះពលរដ្ឋវៀតណាម ដែលបានបង្ហោះខ្លឹមសារបែបជេរប្រមាថ តាមរយៈបណ្ដាញសង្គម Tik Tok ពាក់ព័ន្ធនឹងគម្រោងព្រែកជីកហ្វូណនតេជោ។ ប្រធានព្រឹទ្ធសភាកម្ពុជា ក៏មិនច្បាស់ថា ជនជាតិវៀតណាម ដែលបានបង្ហោះសារជេរប្រមាថទាំងនេះ ជាអ្នករស់នៅកម្ពុជា ឬនៅវៀតណាមឡើយ ហើយរឹតតែមិនដឹងច្បាស់ទៀតថា តើអ្នកណានៅពីក្រោយករណីនេះ?

 

ដោយសារតែមានមន្ទិលសង្ស័យ ទើបអតីតនាយករដ្ឋមន្ត្រីកម្ពុជា ស្នើឱ្យមានកិច្ចសហការរវាងរដ្ឋាភិបាលប្រទេសទាំងពីរ ស៊ើបអង្កេតស្រាវជ្រាវលើករណីនេះជាបន្ទាន់ ដើម្បីបញ្ចៀសកុំឱ្យមានភាពល្អក់កកររវាងថ្នាក់ដឹកនាំ និងប្រជាជនទាំងសងខាង។

 

«ខ្ញុំមិនចោទប្រកាន់ថ្នាក់ដឹកនាំវៀតណាមថា ប្រើប្រាស់មនុស្សបែបនេះឱ្យចូលមកជេរខ្ញុំទេ។ ដូចនេះទើបខ្ញុំស្នើសុំកិច្ចសហការស្រាវជ្រាវដើម្បីចៀសវាងពួកអាក្រក់ឆ្លៀតបំបែកបំបាក់»។ នេះបើតាមសម្ដេច ហ៊ុន សែន ដែលបានបន្ថែមថា ករណីជេរប្រមាថសម្ដេច ពីសំណាក់ជនជាតិវៀតណាមលើបណ្ដាញសង្គមនេះ មិនមែនជាលើកទី១ឡើយ៕